Luc 1
1
Dibandu
1Ombu Theophile! Bapuela bamasona miganda mu diambu dimambu amamalabana va gari etu. 2Bamasona nana jogu abamaba basalitsi baMambu maNsambi ubanda va dibandu nana bamamalabila na nana bamavosila. 3Kabogu Theophile menu wami nyilabi ubueji ugusonina mambu meni nana mamabila ubanda va dibandu. 4Nyimamakelula, kabogu jaba yiri ama guranga mavu mangensa.
Yiansa yitubuli duburu duJean
5Motsu mamabanda mu temu Herode amaba kagao Judee. Vamaba muvagulitsi upagu, diina diandi Zacharie agumaba mu yinombu yibavagulitsi bapagu baAbia. Mugatsi andi Elisabeth amaba mutegula uAaron agumaba muvagulitsi upagu utega. 6Jogu botsu babeji bamaba basungama va gusu Nsambi, bamadedila migaga miotsu na maruma motsu maFumu. 7Basamaba na baana mu mbari Elisabeth amaba yinguma; va julu vana botsu babeji bamakenunina.
8Kabogu yilumbu yimosi Zacharie amavagula pagu ombu Nsambi mu mbari yimaba yilumbu yiandi. 9Mu temu eni bavagulitsi bapagu bamabuaga mbanda Ujaba yilumbu ayi mutu mutu ovagula pagu. 10Kabogu jandi amakota uyevagula pagu ombu Fumu ava batu bamamukelila va gusu kana. 11Mbana yiansa yiFumu yimalabana ombu Zacharie; yimarelama va mabaala mayinyensulu yipagu. 12Zacharie anoyilaba amaregama na goma jimamugaanga. 13Tumba yiansa yimamutsingula rie: Zacharie guyalaba goma! Nsambi amagulu tsambu tsiagu na mugatsi agu Elisabeth oguburila muana udibaala. Diina diandi diuba Jean. 14Guba na nsangu jineni na batu bapuela bosangila mu diambu diduburu duandi. 15Jandi oba muneni va gusu Fumu. Agonu malamu ne minongu miotsu amilansi. Obasu na Yinyunyi yiNsambi ne akaburu. 16Ogabusa baIsrael bapuela ombu Fumu Nsambi ogu. 17Oba yilumbi yiNsambi na mangolu mandi moba dedi na maElie. Ogusula yikenganyi va gari bataji na baana; olonsa abelensi migaga miNsambi yiri bomuebanganga basungama; olubusa batu baFumu yiri obarasuna bakunsama.
18Zacharie amawivula yiansa rie: Tsie nyujabila yiri dingensa guivosi? Gugelabi yiri nyimanuna na mugatsi ami aji yinunu wandi? 19Yiansa yimamugabusa rie: Menu la Gabriel oyitsani va gusu Nsambi. Jandi amansindiga uvosa nagu nogutsingula musamu egugu uboti. 20Guitumini paga na mambu amamatabulu kala na gugemavayili yitu kabogu guba dibaba. Ngensa te na yilumbu ayi mambu memama molabana gugobakula ne diambu dimosi.
21Yiotsu yina batu bamavivanga Zacharie na bamakambulu mu mbari amatsinga o uvagula pagu. 22Ava amapalila asamamuerungula uvosa kabogu bamajaba yiri amalaba yiriariamu o Ndagu Nsambi; amavosanga nogu yika na milembu mu mbari amaba dibaba.
23Anomana temu andi uvagula pagu amagabuga o dimbu diandi. 24Mua temu jinovioga mugatsi andi Elisabeth amadila dimi na amakesuega te na tsungi yiranu; amavosa rie: 25Laba adi Fumu amapayila. Ngensa amakusula yisonyi va misu mabatu.
Yiansa yitubuli duburu duJesus
26Mu tsungi jimusiamunu jidimi diElisabeth, Nsambi amasindiga yiansa Gabriel o Nazareth o Galilee. 27Yimawenda na bulumbi ombu tsiemi ajimakumu na dibaala diina diandi Joseph agumaba mu yifumba yiDavid. Tsiemi eni diina diandi Marie. 28Yiansa yimalabana nandi novosa rie: Buega, Fumu aji nagu! Amagugabila miula! 29Marie amaregama na amakambulu mu diambu dibuega eni. 30Yiansa yimamutsingula rie: Guyalaba goma mu mbari Nsambi amagugabila miula. 31Gulu, gudila dimi na gubura muana dibaala, diina diandi diuba Jesus. 32Oba muneni na onengulungu Muana Nsambi aguvu uneni. Fumu Nsambi omuvega durumu dutaji andi David. 33Orumanga batu baIsrael mutubu na durumu duandi dugovioga.
34Marie amawivula yiansa rie: Tsie diurungulila uba vana nyisakajaba dibaala?
35Yiansa yimamugabusila rie: Yinyunyi YiNsambi oruga ombu gagu na mangolu maNsambi aguvu uneni mogukelisanga. La dibandu muana onengulungu Muana Nsambi. 36Legulu disusu: muana nguji agu Elisabeth, diuleba bamamunengilanga yinguma aka na dimi ditsungi yisiamunu nesi mu bununu buandi. 37Vagaa diambu divura ombu Nsambi.
38Kabogu Marie amavosa rie: Menu nyiji musalitsi uFumu, apayili nana guivosili.
Mbana yiansa yimamusila.
Mulingu uMarie ombu Elisabeth
39Vana vana Marie amasundila uwenda o yiari yimikongu o Judee. 40Amakota o ndagu Zacharie; jogu na Elisabeth bamabumbasana. 41Ava Elisabeth amagululu diufi diMarie, muana andi amakunga o gari moji. Vana vana Elisabeth amabasu na Yinyunyi yiNsambi 42na amagamuga na diufi dineni rie: Nsambi amagugabila miula uviolila bagetu botsu na muana agu gubura oba na miula miNsambi wandi. 43Ka muna ubueji gu nyilabi, laba nguji Fumu ami eruyi ombu gami! 44Yika nyigulu diufi diagu muana atsikunga na nsangu o gari moji ami. 45Ka muna ubueji gu gulaba mu mbari diambu diFumu adi gumatsingulu diudugusu!
Duimbu duduyitsu duMarie
46Marie amavosa rie:
Nyiyitsi Fumu na murima ami uotsu,
47Nyilabi ubueji na Nsambi, Mugobutsi ami.
48Amarangimina mua musalitsi andi nana menu.
Ubongila namunyi botsu bondengilanga mungo miula,
49mu mbari aguvu na mangolu uvaga motsu
amapayila diboti dineni.
Ngensa diina diandi divu Nsambi.
50Elasi yingeba ombu botsu abemudumi.
51Amalasa mangolu mandi
ava amapansila bango dunangu.
52Amasundusa bakaga
na amamatisa mavolambombu.
53Amagukurusu jogu abamaguiu nsala
na amagabusa bisina yika miogu na miogu.
54Amakelisa pangini atsi amavangana na batu baIsrael,
asamalibana ubalasa maboti mandi.
55Amalasa Abraham na bategula bandi botsu maboti
nana amavanginina na bivunda bietu.
56Marie amamana tsungi yirieru ombu Elisabeth mbana amagabusila o dimbu diandi.
Duburu duJean
57Diweru diElisabeth dimatola na amabura muana udibaala. 58Bambatsi baElisabeth na biburu biandi banogulu nana Fumu amamulasila mangolu mandi bamasangila va mosi nandi. 59Bamamureba mu yilumbu yimunana. Mbe baronda umuluga Zacharie, diina ditaji andi. 60Tumba nguji andi amabusa, amavosa rie: Diina diandi diuba Jean. 61Bamawaka rie: Vagaa mutu mu biburu biagu aguvu na diina dieni.
62Kabogu bamavosa na taji andi na milembu ujaba nana omuluyila. 63Zacharie amavonda miganda na amasona rie: Diina diandi diuba Jean. Botsu bamakambulu puela. 64Vana vana Zacharie amabanda uvosa na amagabusa diboti ombu Nsambi na diufi dineni. 65Bambatsi botsu bamagaangu na goma na misamu mieni mimanyava te no mikongu miotsu miJudee. 66Botsu abamamugulungu bamakambulu na bamavosa rie: Tsie muana eni obila?
Dimajabunu yiri tindi mangolu maFumu mamamubasa.
Mbigulu jiZacharie
67Taji andi Zacharie anobasu na Yinyunyi YiNsambi amabiga mambu memama rie:
68Diboti ombu Fumu Nsambi Israel
mu mbari amalingula nogobula batu bandi.
69Amatuvega Mugobutsi aguvu na mangolu
agumapalila o ndagu musalitsi andi David.
70Va kala babiyitsi bandi bamabiga rie:
71Jandi amavangana utuwamusa na jogu abetulasi maguga
nodetsa batu abetuvini
72nolasa bataji betu yingeba
nokelisanga pangini andi.
73Nsambi amavangana na taji etu Abraham
74yiri otuwamusa na batu abetuvini
notugusula goma yiri tumusalila na mirima misunda
75nobanganga basigama na bawelimina va gusu andi te na mutubu.
76Na ndeʼ muana ami, gunengulungu mubiyitsi uNsambi aguvu uneni
mu mbari gurela Fumu uyenabala nsila andi
77na guyenatsingulanga batu bandi
yiri obagobula nobatandila masumu mogu.
78Nsambi etu ana yingeba na murima udeda.
Obatsa yijalala yijulu mu mirima mietu
ayiubagunu na yijalala yiwisi.
79Ombu jogu abavu o tsi pisama jimasumu na dufu
yijalala yimamonutsu ayiutuvotsa mirima.
80Muana amabanguganga na amajabanga ukekelisa. Amatsananga o kumu te na yilumbu ayi amalabana ombu batu baIsrael.
Currently Selected:
Luc 1: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
