Josue 6

Mbongulu jiJericho

1Kabogu Jericho umadibugu tindi udibugu mu diambu digoma jibaIsrael; ne mutu mosi asamarungula upala nesi ukota.

2Mbana Fumu amatsingula Josue rie: Nyimaguwakisa Jericho nesi kaga andi nesi bagora bandi bamangolu. 3Tsiengilanganu musiengi, jenu botsu na bagora botsu, dukatsiengilanga musiengi temu mosi yilumbu na yilumbu. Anana duvayilanga te na bilumbu bisiamunu. 4Yisambuali yibavagulitsi bapagu bowendanga va gusu yigara yipangini na yisambuali yimimbanda amivu na mufi maneni; bavagulitsi bapagu bosiga mimbanda. 5Ava bosiyila ndundu ajivu na diufi dineni na ava dugululu diufi dimumbanda batu botsu bagamuyi migamu mineni. Mbana bibaga bimusiengi biurakuga na baIsrael botsu bosundila uyenakotanga.

6Josue muana dibaala uNoun, amanengila bavagulitsi bapagu na amabaruma rie: Nangulanu yigara yipangini; yisambuali yibavagulitsi bapagu babongi yisambuali yimimbanda amivu na mufi maneni amiusigu va gusu yigara yipangini yiFumu.

7Mbana amaruma batu rie: Wendanu, tsiengilanu musiengi; bagora babi va gusu yigara yipangini yiFumu.

8Josue anomana uvosa na batu, yisambuali yibavagulitsi bapagu abamabeganga yisambuali yimimbanda va gusu Fumu amimaba na mufi maneni bamasogama noyenasiganga mimbanda. Yigara yipangini yiFumu yimayenabadukanga. 9Bagora bamosi bamawendanga va gusu bavagulitsi bapagu abamayenasiganga mimbanda na bagora basusu bamayenadukanga yigara yipangini; bamayenasiganga mimbanda ava bamawendilanga. 10Josue amaruma batu diruma diedidi rie: Duyagamuga, bayagulu mufi menu na duyavosa ne diambu dimosi te na yilumbu ayi nyuduramina rie: Gamuganu! Mbana dugamuga. 11Bamatsiengila musiengi na yigara yipangini yiFumu temu mosi; mbana bamagabuga o mulaku uyesilama mukolu eni.

12Josue amarelama kedi jineni na bavagulitsi bapagu bamayenabeganga yigara yipangini yiFumu. 13Yisambuali yibavagulitsi bapagu abamabeganga yisambuali yimimbanda amimaba na mufi maneni va gusu yigara yipangini yiFumu bamasogama na bamasiga mimbanda. Bagora bamosi bamawendanga va gusu ogu na bagora basusu bamayenadukanga yigara yipangini yiFumu; mu muendu uotsu bamayenasiganga mimbanda. 14Yilumbu ayimubeji bamatsiengila musiengi temu mosi mbana bamayenagabuga o milaku. Anana bamavayilanga te na bilumbu bisiamunu. 15Yilumbu ayimusambuali bamamuerelama kedi jineni ava mavuvimgi, bamayenatsiengila musiengi yisambuali yikumbu; yika muna yilumbu yieni bamatsiengila musiengi yisambuali yikumbu. 16Kumbu ajimusambuali va temu aji bavagulitsi bapagu bamasiyila mimbanda Josue amaruma batu rie: Gamuganu, Fumu amaduwakisa musiengi! 17Musiengi upansu, musiengi uotsu na biotsu abivu muna bimavegu Fumu na mugeli; tumba bayaboka Rahab aguvu yimbembu yimugetu na batu aboba nandi o ndagu andi mu mbari jandi agumasuega baleyitsi aba tumatinda. 18Dimosi buandi, kebananu na abimavegu na mugeli; pa dumuebonga abimavegu na mugeli mbe durombisa milaku mibaIsrael upansu na durombisa kindu muna. 19Lora tsiotsu tsivema na lora tsiotsu na bima biotsu bikunga nesi bimadilu biuwakusu ombu Fumu na biukotusu o yilundulu yiFumu.

20Batu bamagamuga na bavagulitsi bapagu bamasiga mimbanda. Ava batu bamagululu mufi mamimbanda bamagamuga tindi ugamuga na bibaga bimarakuga; baIsrael bamakota o musiengi, mutu mutu va mbura ajiasungasana nandi. Musiengi umabongu, 21bamabapansa na bamaboka botsu abamaba o musiengi: nesi babaala nesi bagetu nesi baana nesi binunu na bamaboka bangombi na bindombu na baburu wandi.

Josue uwaka ewaki Rahab kalala

22Josue amaruma babaala babeji abamayesieenga bulongu rie: Kotanu o ndagu yimbembu yimugetu yieni na palisanu mugetu eni na botsu abavu nandi muna, nana dumavanginina pangini nandi.

23Baleyitsi bamayelanda Rahab na taji andi na nguji andi na baana banguji bandi na bandi botsu; bamapalisa mukuta andi uotsu, bamabatsanisa va tsomu milaku mibaIsrael. 24Bamanyensa musiengi na biotsu abimaba muna; dimosi buandi bamakotisa lora jivema na lora na bima biotsu bikunga na bimadilu o yilundulu yiNdagu Fumu. 25Josue asamabokisa Rahab agumaba yimbembu yimugetu na mukuta utaji andi na botsu abamaba nandi; bategula bandi betsani va mosi na baIsrael te na namunyi mu mbari amasuega baleyitsi aba Josue amasindiga uyesieenga Jericho.

26Josue amatubula diambu diedidi va gusu Fumu rie: Mulogu ubi va julu muru ujandi agumuerungisa musiengi uJericho!

Ava osundila yibuga tsomi andi afu!

Ava onamiyila biabutsu marina mandi afu!

27Fumu amaba na Josue te na diduma diandi dimanyava o malongu motsu.

Currently Selected:

Josue 6: PUU1992

Highlight

Copy