Josue 7

Dibi na mukilu biAkan

1BaIsrael bamavaga dibi mu diambu dibima abimavegu na mugeli. Akan muana dibaala uKarmi, muana dibaala uZabdi mutegula uZera mu yifumba yiJuda amabonga bima abimavegu na mugeli. Mbana Nsambi amanyoyila baIsrael tindi kabu.

2Ava Josue amabila o Jericho amasindiga babaala o Ai, aguvu bebeli na Bet-Aven o yiari ayi wisi epalili yiBethel. Amabaruma rie: Wendanu, yesieenganu bulongu. Babaala beni bamawenda na bamayesieenga Ai. 3Bamagabuga ombu Josue na bamamutsingula rie: Digaa diambu uwenda na bagora botsu; tosini beji vo yirieru tsibagora tsiuba tsiwelimina utoyisa Ai; guyatsoyisa batu botsu mu mbari bisi Ai bavu mua dutalu dugeyi.

4Tosini yirieru tsibagora tsimawenda o utoga tumba bisi Ai bamababingisa. 5Bisi Ai bamaboka bebeli na magumarieru na gora yisiamunu, bamabaduka ubandila va dikotulu dimusiengi te no Chebarim na bamababokisa ava bamavindimina mukongu. Bagora bamabakama mirima na bamakambulu.

6Josue amapasa biduaru biandi, amagudama va gusu yigara yipangini yiFumu kedi kedi te na tsisiga, jogu na bivunda biIsrael bamagolana difufundu. 7Josue amawivula rie: Aa Fumu Nsambi, dibandu yi gumasabusila batu bebaba Jourdain? Yika uyituwakisa ombu baAmor noyitubokisa? Aa! Mbe tumajaba mbe tumasiala o disimu dina diJourdain! 8Aa Fumu, baIsrael bamarina bavinitsi bogu, yi nyuvosa? 9Bisi Canaan na bisi bulongu botsu bodigulu, botutsiengila na botsiemusa diina dietu vava tsi. Gugekipi diina diagu dineni?

10Fumu amaruma Josue rie: Simbuga! Dibandu yi guvu magudama? 11BaIsrael bamavaga dibi, bamabunsa pangini ami, aji nyimavangana nogu, bamabonga bima abimavegu na mugeli, bamabidaga na bamafura na bamabisuega va gari mifuna miogu. 12La dibandu baIsrael bagaa na mangolu va gusu bavinitsi bogu; bamarina bavinitsi bogu mu mbari bamadaga bima abimavegu na mugeli. Ngomueba nenu pa dugotubula abimadagu, abivu nenu. 13Simbuga liomisa batu. Gukabaruma rie: Keliomisanu mugesa; mu mbari Fumu Nsambi Israel, jandi rie: Jenu baIsrael, vavu bima abi dumadaga; dugorungula uba na mangolu va gusu bavinitsi benu te na dumagusula abimadagu abivu nenu. 14Kedi dukaruga yifumba yifumba; yifumba ayi Fumu osola yiuruga muna mikuta mikuta, na mukuta agu Fumu osola uruga muna mandagu mandagu, na ndagu aji Fumu osola jiuruga muna dibaala dibaala. 15Jandi agugaangu yiri amadaga abimavegu na mugeli onyensu, jaʼ beni na biandi biotsu mu mbari amabunsa pangini jiFumu na amavaga nsoruru o Israel.

16Josue amarelama kedi jineni na amanengila baIsrael muna bifumba biogu na yifumba yiJuda yimagaangu. 17Amaruma batu unengila mikuta miotsu na mukuta uZera umagaangu. Amaruma batu unengila mukuta uZera muna mandagu mandagu na Zabdi amagaangu. 18Amaruma batu unengila bisi ndagu jiZabdi muna dibaala dibaala na Akan, muana dibaala uKarmi mutegula uZera mu yifumba yiJuda amagaangu. 19Josue amatsingula Akan rie: Muana ami, levati na diina diNsambi Israel, guyamulensa. Nsinguli adi gumavaga, guyansueyila diambu.

20Akan amawagula Josue rie: Dingensa nyimavayila Fumu Nsambi Israel dibi, adi nyimavaga adidi: 21Va gari abimakindu, nyimalaba yijungi yiboti yiMesopotamie na kama beji tsimbongu na dimanyi dilora, utsira udionyi dimaba mua yibuku yikilu; nyimalebinyungila mbana nyimabibonga; gubilaba o tsi butamba o gari ndagu ami jitsanda na mbongu tsiivu o tsi.

22Josue amasindiga batu abamawenda mambangu o ndagu andi jitsanda na dingensa bamabilaba. 23Bamabibongila o ndagu andi jitsanda, bamabibeyila Josue na baIsrael botsu mbana bamabisunsa va gusu Fumu. 24Josue na baIsrael botsu bamabonga Akan muana dibaala uZera na mbongu na yijungi na dimanyi dilora na baana bababaala na babagetu baAkan nesi bangombi bandi nesi baburu bandi nesi bindombu biandi nesi binsabi biandi nesi ndagu andi jitsanda nesi biotsu abimaba nandi; bamabega biotsu o yibususu yiAkor. 25Josue amamuwivula rie: Dibandu yi gumatutsoyisila? Namunyi Fumu ogutsoyisa.

BaIsrael botsu bamabatindila mamanyi; banomana ubatindila mamanyi bamabanyensa. 26Mbana bamadibiga Akan na diguki dineni dimamanyi adikivu te na namunyi. Mbana kabu Fumu jimasaguga. Te na namunyi benengili mbura eni yibususu yiAkor.

Currently Selected:

Josue 7: PUU1992

Highlight

Copy