Josue 4
4
Yigumi na mamanyi mabeji mayirangumunu
1Ava batu botsu bamamanina usabuga Jourdain, Fumu amaruma Josue rie: 2Sola yigumi na babaala babeji: dibaala dimosi mu kadi yifumba yiIsrael. 3Barumi diruma diedidi rie: Bolanu yigumi na mamanyi mabeji vana mbura aji bavagulitsi bapagu bamaretsimina va gari Jourdain, dukamabega o disimu dina nomasunsa va mbura aji dusilimina mukolu egugu.
4Josue amanengila yigumi na babaala babeji baIsrael aba amasola, dibaala dibaala mu kadi yifumba. 5Amabaruma rie: Vioganu va gusu yigara yipangini yiFumu Nsambi enu va gari Jourdain na mutu mutu akanangula dimanyi va disambaka, dedi mosi na dutalu dubifumba biIsrael. 6Mamanyi memama moba yilimba va gari enu. Yilumbu yimosi baana benu bowivula rie: Mamanyi memama dibandu yi? 7Dukawagula rie: Mamba maJourdain mamakamuga va gusu yigara yipangini yiFumu ava yimasabuyila Jourdain, avana mamba maJourdain mamakamuyila, mamanyi memama mavu yirangumunu yiyimaga ombu baIsrael te na mutubu.
8BaIsrael bamavaga adi Josue amabaruma. Bamabola yigumi na mamanyi mabeji va gari Jourdain nana Fumu amarumina Josue, dedi mosi na dutalu dubifumba bibaIsrael, bamamabega nogu na bamamasunsa va mbura aji bamasilimina mukolu eni. 9Josue amareliga yigumi na mamanyi mabeji wandi va gari Jourdain va mbura aji bavagulitsi bapagu bamasikimina, abamabeganga yigara yipangini; monyi mesiali vana te na namunyi.
10Bavagulitsi bapagu abamabeganga yigara yipangini bamasikama va gari Jourdain te na mambu ama Fumu amaruma Moise utsingula Josue mamadugusu. Batu bamalensa usabuga Jourdain. 11Batu botsu banomana usabuga, bavagulitsi bapagu bamavioga na yigara yipangini yiFumu. 12BaRuben na baGad na yiasi yiyifumba yiManasse bamaduara bitogulu na bamarela baIsrael nana Moise amabarumina. 13Bebeli na magumana matosini tsibabaala bamaduara bitogulu na bamaba bakunsama utoga divita, bamavioga va gusu Fumu o kumu tsiJericho. 14Muna yilumbu yieni Fumu amaroyisa diduma diJosue va misu mabaIsrael botsu; bamamuduma dedi mosi nana bamaduminanga Moise va temu andi jiotsu.
15Fumu amaruma Josue rie: 16Ruma bavagulitsi bapagu abebeyi yigara yipangini usabuga muna Jourdain.
17Josue amaruma bavagulitsi bapagu diruma diedidi rie: Sabuganu muna Jourdain. 18Ava bavagulitsi bapagu abamabeganga yigara yipangini yiFumu bamasabuyila Jourdain, yiotsu ayi bamatolila o disimu, mamba maJourdain mamamuesobana na mamabasa tindi ubasa nana na kala. 19Batu bamasabuga Jourdain mu yilumbu yimugumi yitsungi jitega na bamavaga milaku o Guilgal o yiari ayi wisi epalili o mandilu maJericho.
20Josue amareliga yigumi na mamanyi mabeji ama bamabongila o Jourdain o Guilgal. 21Amatsingula baIsrael rie: Ava baana benu bowivulila batu bogu yilumbu yimosi rie: Mamanyi memama, dibandu yi? 22Dukalonsa baana benu nobatsingula rie: baIsrael bamasabuga Jourdain tsiri ubola. 23Fumu Nsambi enu amadukamusila mamba maJourdain te na jenu dumasabuga dedi mosi nana Fumu Nsambi enu amakamusila Mubu uBenga te na jetu tumasabuga, 24yiri bisi butamba botsu bajabi yiri Fumu avu na mangolu na yiri jenu dudumanga Fumu Nsambi enu temu tsiotsu.
Currently Selected:
Josue 4: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
