Josue 3

Usabuga besabuyi mujamba uJourdain

1Josue amarelama kedi jineni, amarambuyila va Sittim na baIsrael botsu. Bamatola o mujamba uJourdain, bamasilimina vana nesi bakasabuga. 2Bilumbu birieru binovioga bivunda bibagora bamayenananga milaku 3na bamaruma batu diruma diedidi rie: Ava dulabila bisi Levi abavu bavagulitsi bapagu uvioga bevioyi na yigara yipangini yiFumu Nsambi enu dugusuga va milaku noyenabadukanga. 4Tumba voba dilala dikilumetera mosi va gari enu na yionyi: duyaviolila ubambana. Dukayenayidukanga mu mbari dusakavioyila nsila eni na kala.

5Josue amaruma batu rie: Keliomisanu mu mbari mugesa Fumu odulasa bimaga.

6Mbana Josue amaruma bavagulitsi bapagu rie: Beganu yigara yipangini na vioganu va gusu batu. Bamabega yigara yipangini na bamawendanga va gusu batu. 7Fumu amatsingula Josue rie: Namunyi nyubanda uroyisa diduma diagu va misu mabaIsrael botsu; bojaba yiri nyubanganga nagu nana nyimabilanga na Moise. 8Gukaruma bavagulitsi bapagu abonangula yigara yipangini diruma diedidi rie: Ava dutotila va disimu diJourdain, dukasikama vana gari Jourdain.

9Josue amaruma baIsrael rie: Bambananu na guluanu mambu maFumu Nsambi enu. 10Josue amavosa rie: Adidi diudujabisa yiri Nsambi aguvu monyu avu nenu, odubingila bisi Canaan na baHitt na baHivie na baPerizie na baGuirgachie na baAmor na baJebusie. 11Yigara yipangini yiFumu malongu motsu yiudurela usabuga Jourdain. 12Solanu yigumi na babaala babeji, dibaala dimosi mu kadi yifumba yiIsrael. 13Yika bavagulitsi bapagu abebeyingi yigara yipangini yiFumu malongu motsu, besunduyi mu mamba maJourdain, mamba magomueba muwigu, mogukama te na moba diguki.

14Batu bamapalila o milaku miogu uyenasabuga Jourdain. Bavagulitsi bapagu abamabeganga yigara yipangini bamawendanga va gusu batu. 15Ava bavagulitsi bapagu abamabeganga yigara yipangini bamatolila o Jourdain, (va temu dutsonsugu Jourdain umabasanga nyidu) banosunduga o mamba 16o yiari ayi musiengi uAdam agumaba bebeli na Sartan, mamba mamuwigu matandu mamagukama diguki dimosi. Mamba mabanda mamavindamanga o yiari yikumu te no Mubu uKali mbana mamakamuga. Batu bamasabuga va nsungisini na Jericho. 17Bavagulitsi bapagu abamabeganga yigara yipangini yiFumu bamasikama va mbura jikamuga va gari Jourdain ava baIsrael bamavioyilanga va mbura jikamuga te na botsu bamasabuga Jourdain.

Currently Selected:

Josue 3: PUU1992

Highlight

Copy