Josue 2

Josue utinda etindi baleyitsi babeji o Jericho

1Josue muana dibaala uNoun, amarambusa baleyitsi babeji o musuega va Chittim, amabaruma rie: Wendanu uyesieenga bulongu, sinsa viri Jericho. Bamasogama na bamatola o ndagu yimbembu, diina diandi Rahab na bamasilimina guna. 2Kaga jiJericho amagulu yiri babaala baIsrael bamatola vava na mukolu egugu uyisieenga bulongu. 3Kaga jiJericho amasindiga mutu uyetsingula Rahab rie: Palisa babaala abatsikota o ndagu agu mu mbari jogu batsiruga uyisieenga bulongu buotsu.

4Rahab amabonga babaala beni babeji amabasuega; mbana amavosa rie: Dingensa babaala beni batsitola ombu gami tumba ngaajaba agu batsirugasana; 5vana tsisiga bebeli na diweru adi bedibiyili dikotulu dimusiengi batsipalanga; ngaajaba agunyi batsiwendasana. Lensanu nobaduka, dubarasuna.

6Amabamatisa o julu muansa na amabasuega o tsi punga atsimawanyugu o julu muansa. 7Batu bakaga bamabaduka muna nsila te na disabu diJourdain, yiotsu ayi bamapalila bamabindiga diguyi dimusiengi. 8Nesi baleyitsi bakasilama, Rahab amamata ombu gogu o julu muansa, 9na amabatsingula rie: Nyijabi Fumu amaduvega bulongu buebubu, adina ditsiturombisa goma; bisi bulongu buotsu uregama bereyimi. 10Tumagulu nana Fumu amadukamusila Mubu uBenga ava dumapalila o Egypte na nana dumakambisila bakaga baAmor o disimu dina diJourdain: Sihon na Og aba dumaboka. 11Tumadigulu na tumaregama na mirima mietu mimabakama; mu mbari Fumu Nsambi enu avu Nsambi aguvu o julu na va butamba wandi. 12Kokolu tsienu, ndevilianu pesi mu diina diFumu enu yiri duvayila bisi ndagu taji ami diboti dedi mosi nana nyiduvayili. 13Nsundusianu murima yiri dugobokisa taji ami na nguji ami na baana bataji bami bababaala na babagetu na abogu botsu. Kokolu tsienu dukatuwaka kalala.

14Babaala beni bamamuwaka rie: Jetu tuvu tukunsama udupalisa na polu pa dugotubula adivu netu. Ava Fumu otuveyila bulongu buebubu tudulasa durondu na tugovinsa kingu.

15Amabasundusa va fenetera na mukudu mu mbari ndagu aji amatsaninanga jimaba muna yibaga yimusiengi. 16Amabaruma rie: Wendasananu o yiari yimukongu mu mbari dukebenguna na jogu abedubingisi, lesuemanu bilumbu birieru, te na jogu bogabuga mbana dukawenda.

17Babaala beni bamamutsingula rie: Pesi aji gutsituruma uleva tujidugusu. 18Gulu adi guvaga ne tukatola o bulongu buebubu; gukatunga mukudu egugu ubenga va fenetera aji guitusundusili, gukakotisa taji agu na nguji agu nesi baana bataji bagu nesi mukuta uotsu utaji agu o ndagu agu. 19Pa mutu opala o ndagu agu malungu mandi moba va julu muru andi na jetu tugoba na mbela; tumba pa tunemisa ne unemisa mutu va gari jogu aboba o ndagu agu malungu mandi moba va julu miuru mietu. 20Tumba pa ndeʼ gutubula adivu netu tugomuegaangu na pesi aji gutsituruma uleva. 21Rahab amawaka rie: Dibi nana duivosili.

Anana amabaganinina na bamayenawenda. Mbana amatunga mukudu ubenga va fenetera. 22Baleyitsi bamayenawenda na bamatola o mukongu agu bamatsanina bilumbu birieru te na jogu abamabadukanga bamagabuga. Abamabadukanga bamayenabarombanga mu nsila jiotsu tumba basamabalaba. 23Babaala beni babeji bamagusuga va yisuemunu, bamasunduga mukongu na bamasabuga Jourdain. Bamagabuga ombu Josue muana dibaala uNoun na bamamutsingula motsu ama bamalaba. 24Bamatsingula Josue rie: Dingensa Fumu amatuvega bulongu buotsu, nesi bisi bulongu botsu bamabakama mirima.

Currently Selected:

Josue 2: PUU1992

Highlight

Copy