Josue 1

Josue yivinga yiMoise

1Moisc, musalitsi uFumu, anofu, Fumu amatsingula Josue muana dibaala uNoun, agumaba musalitsi uMoise rie: 2Moise musalitsi ami amafu; relama na sabuga mujamba Jourdain, jenu na batu bebaba botsu yiri duwenda o bulongu abu nyuvega baIsrael. 3Mbura tsiotsu atsi dutsiarila nyuduvega tsionyi nana nyimatsingulila Moise. 4Bulongu buenu bubandila o kumu no Liban te no mubu uneni o yiari ayi wisi ewendisini. 5Ne mutu mosi agorungula ugubetsa te na dufu duagu. Nyubanganga nagu nana nyimabila na Moise; ngogulibana, via, na ngogusila pinsa. 6Guyaregama na guyakambulu mu mbari ndeju agutolisa batu bebaba o bulongu abu nyimavangana uvega bataji bogu. 7Dimosi buandi guyaregama na guyakambulu ne pesu; dugusu migaga miotsu na usigama nana musalitsi ami Moise amagurumina; guyasumuna nesi umosi nesi ususu yiri gugokambulu mu amagu motsu. 8Dibuku diedidi dimigaga diyakakana nagu; ditasingi nyangu na mukolu yiri gusigama mu motsu amamasonugu muna; mbana gugokambulu mu amagu motsu: motsu mobueji tindi ubueji. 9Nyisamaguvega diruma diedidi rie: Guyaregama na guyakambulu? Sunsa murima na guyalaba keri mu mbari Fumu Nsambi agu aji nagu mu mbura tsiotsu atsi guwendanga.

Josue ukunsa ekunsi nsabugulu jiJourdain

10Josue amaruma bivunda bibagora diruma diedidi rie: 11Nanganu milaku na rumanu batu rie: Kunsamanu, yika bilumbu birieru bisiali mbana dusabuga Jourdain uyedila bulongu abu Fumu Nsambi enu oduvega. 12Josue amatsingula baRuben na baGad na yiasi yiyifumba yiManasse rie: 13Rangiminanu adi Moise musalitsi Fumu amaduruma ava amavosila rie: Fumu Nsambi enu amadusingisa utsana o bulongu buebubu o yiari ayi wisi epalili jiJourdain. 14Yika bagatsi benu na baana benu na migamba mienu biusiala o bulongu abubu abu Moise amaduvega o disimu diedidi diJourdain. Tumba jenu babaala botsu abavu na mangolu dukavioga na mata va gusu baana bataji benu ubawamusa 15te na Fumu osingisa baana bataji benu udila bulongu abu Fumu Nsambi enu obavega nana jenu dumadilila. Mbana dukagabuga uyedila bulongu buenu abu Moise musalitsi uFumu amaduvega o disimu diedidi diJourdain o yiari ayi wisi epalili. 16Bamawaka Josue rie: Tuvaga motsu ama gutsituruma na tuwendanga mbura tsiotsu atsi gutusindiganga. 17Tugudedila mu mambu motsu dedi mosi nana tumadedila Moise. Dimosi buandi, Fumu Nsambi agu abi nagu dedi mosi nana amabila na Moise! 18Mutu uotsu aguba mumbini nesi agulensa maruma magu, aboku. Dimosi buandi guyaregama na guyakambulu.

Currently Selected:

Josue 1: PUU1992

Highlight

Copy