Dibandu 44

Joseph umanga emangi baana bataji bandi

1Joseph amaruma musalitsi andi rie: Basa saku tsibatu beni biguji nana borungulila ubega na podula mbongu tsimutu mutu mu saku andi. 2Mu saku ngebi ogu gukapodula tsiri yika mbongu tumba na kopa ami jilora jivema wandi.

Musalitsi amavaga nana Joseph amamurumina. 3Mima kedi wisi unotebuga batu baJoseph bamawensa batu beni na baburu bogu. 4Bamagusuga va musiengi na mbe basakawenda vala, Joseph amaruma musalitsi andi rie: Relama, duka batu bebana; ava gubarasunina gukabawivula rie: Dibandu yi dumavayila dibi ombu jandi agumaduvayila diboti? 5Dibandu yi dumadayila kopa aji fumu enuini na ajimuveyi mangolu ujaba mambu? Dumamuvayila tindi dibi.

6Musalitsi amabarasuna na amabatsingula mambu meni. 7Jogu bamamuwivula rie: Dibandu yi fumu evosili nana? Tsatsabi, tugorungula uvaga dibi dimunongu eni. 8Tsiri jetu atumagugabusila mbongu atsi tumalaba o gari saku tsietu? Dibandu yi tudayila mbongu vo lora o ndagu fumu agu? 9Pa gulaba kopa eni netu mutu eni aboku! Va julu vana jetu tuba baviga bagu. 10Amawaka rie: Kabogu dibi nana duivosili! Jandi agu kopa jiulabana nandi oba muviga ami; jenu basusu dugoba muna.

11Vana vana mutu amasundusa saku andi va tsi na mutu mutu amanyangula saku andi. 12Musalitsi amabafuyi, amabanda na yivunda na amasita na tindi ngebi; kopa jimalabinina mu saku jiBenjamin. 13Bamapasa biduaru biogu, bamamuelongila baburu bogu saku tsiogu mbana bamayenagabusila o musiengi.

Juda uwamusa ewamusi Benjamin

14Juda na baana bataji bandi bamamuetola o ndagu Joseph; mbe asakawenda mbura. Bamasundila ugudama va tsi va gusu andi. 15Joseph amabawivula rie: Dibi yi dumavaga? Dugejabi yiri mutu nana menu nyina mangolu ujaba mambu motsu? 16Juda amawaka rie: Diambu yi tuvosa nagu fumu? Turungula uwaka diambu? Turungula uba na ndunga? Nsambi amalaba dibi dietu tuji baviga bagu, jetu botsu na jandi agu kopa jitsilabana nandi. 17Joseph amabawaka rie: Nsambi ekandisi uvaga dionyi! Dibaala adi kopa jitsilabana nandi oba muviga ami; tumba jenu basusu wendanganu na buranga ombu taji enu.

18Mbana Juda anobambana na Joseph amavosa rie: Kokolu tsiagu nyijabi yiri guvu dedi na Pharaon. Ne nana nyirondi uvosa mua diambu, fumu guyanyoyila! 19Va dibandu gumatuwivula rie: Duna taji vo muana nguji ususu? 20Tumawagula rie: Nyiina, taji etu amanuna na tuna muana taji aguvu marina, agumaburulu va bununu buandi; muana eni amaba na muana nguji agumafu kala, jogu banandi tindi nguji jimosi, amasiala pinsa na taji emurondi tindi uronda. 21Gumaturuma rie: Mumbeyilianu yiri nyumulaba kiakiaki. 22Jetu tumaguwagula rie: Muana agorungula ukakana na taji andi; pa okakana nandi taji andi ofu. 23Gumatutsingula rie: Pa muana taji enu aguvu marina ageruyi nenu, dugomuendaba. 24Ava tumagabuyila ombu taji etu aguvu musalitsi agu, tumamutsingula misamu miagu. 25Taji etu amaturuma rie: Gabuganu uyesumba mua biguji. 26Jetu tumawagula rie: Tugorungula uwenda; tumba pa muana taji etu aguvu marina aji netu, tuwenda mu mbari tugorungula ulabana na dibaala dieni pa muana taji etu agaa netu. 27Taji etu amavosa netu rie: Duijabi yiri mugatsi ami Rachel amamburila baana babeji bababaala buandi. 28Umosi amapala o ndagu ami, nyitasi yiri tanguji amavopulu na bibulu bibukanyi mu mbari te na namunyi ngemuemulaba! 29Pa dumuembonga jandi egugu na pa olaba diambu nyufu na dufu duami duba na mambu.

30Kabogu pa nyugabuga namunyi ombu taji ami, na muana andi udurondu agaa netu, 31ava olabila yiri muana agatsi jetu tuba na mbela jidufu dutaji etu aguvu yinunu. 32Va julu vana nyimagana kaka mu diambu dimuana, diwendi rie: nyimavosa na taji ami rie: Pa ngomugabusa ombu gagu diambu diandi diuba va julu muru ami te na mutubu. 33Kokolu tsiagu nsingisi usiala muviga agu va yivinga yimuana; muana akayenagabuga na baana bataji bandi. 34Nyurungula ugabuga ombu taji ami pa muana agaa nami? Aa, kokolu tsiagu ngerondi ulasa taji ami maguga mamunongu egugu.

Currently Selected:

Dibandu 44: PUU1992

Highlight

Copy