Dibandu 43

Jacob usinga esingi yiri Benjamin awendi

1Nsala jimabanganga dungosu o bulongu buCanaan. 2Banomana uji ble atsi bamayesumba o Egypte, Jacob amaruma baana bandi bababaala rie: Gabuganu o Egypte uyesumba mua biguji.

3Juda amamuwaka rie: Dibaala dieni amatulubusa rie: Pa muana taji enu agoruga nenu jenu dugomuendaba. 4Kabogu pa guisingi usindiga muana taji etu netu, tuwenda na tuyegusumbila biguji. 5Tumba pa gugogani umusindiga jetu tugowenda mu mbari dibaala dieni amatulubusa rie: Pa muana taji enu agoruga nenu jenu dugomuendaba. 6Kabogu Jacob amabawivula rie: Dibandu yi dumatsingulila dibaala dieni yiri duna muana taji ususu? Dumapayila dibi. 7Jogu bamamugabusila rie: Dibaala dieni amatuwivula bivu bipuela nesi bimikuta mietu rie: Taji enu aki monyu? Duna muana taji ususu? Kabogu tumawagula bivu bieni. Je turungula ujaba yiri otuwivula ubega muana taji etu? 8Juda amavosa rie: Kokolu taia, sindiga muana nami, tuwenda yiri tugomuefu na nsala nesi jetu nesi ndeʼ nesi baana betu. 9Abi va julu muni ami. Ava turuyila pa ngaagubeyila muana agu, mbela jiuba nami te na mutubu. 10Mbe tusamayitsinga gunu mbe tumagabuga ne kumbu beji. 11Taji ogu Jacob amabatsingula rie: Mbukua, vaganu nana erondili! Longilanu biboti bibulongu buebubu mu saku tsienu uyebivega ombu dibaala dieni, diwendi rie: bima bimbunga jiboti jimunongu na munongu na buji na mipistase ria mimandi. 12Wendanu na mbongu na duyalibana atsi bamadugabusila mu saku tsienu, tanguji yiliba bamatsipodula. 13Sogamanu jenu na muana taji enu, gabuganu ombu dibaala dieni. 14Nsambi Mangolu adetsi murima udibaala dieni yiri osingisa Simeon na Benjamin ugabuga nenu! Vagaa diambu pa baana botsu bonsuka, nyuba pinsa!

Yibenguna yimubeji yiJoseph na baana bataji

15Bamabonga mulendu na bamabonga mbongu tsisusu na Benjamin wandi; bamasogama uwenda o Egypte na bamayekelasa ombu Joseph. 16Joseph anolaba Benjamin amaruga nogu amaruma musalitsi andi rie: Kotisa batu bebaba o ndagu, boka yibulu noyilambisa; jogu boji nami va muangulu.

17Musalitsi eni amavaga adi Joseph amamuruma na amabega batu beni o ndagu Joseph. 18Bamagaangu na goma jineni ava bamabegulu o ndagu Joseph, bamavosa rie: Betusikiyi mu diambu dimbongu atsi bamakotisa mu saku tsietu temu ajitega; berondi utugaanga notufuengilila notupatula baburu betu yiri botukelisa o buviga. 19Bamawenda na musalitsi uJoseph; bamavosa nandi ava mbe bakivu va gusu kana. 20Jogu rie: Kokolu fumu, tumaleruga temu mosi uyisumba biguji. 21Ava tumatolila va yilatsi tumadibula saku tsietu na tumalaba mbongu tsimutu mutu muna saku andi; mbongu tsieni aratsi. 22Tutsibega mbongu tsisusu umueyisumba biguji. Tugejabi anyi amakotisa mbongu tsieni mu saku tsietu. 23Musalitsi amawaka rie: Sunsanu mirima! Duyalaba keri! La Nsambi enu, Nsambi taji enu agumadugabila.

Mbana amabapalisila Simeon. 24Musalitsi eni amabakotisa o ndagu Joseph; anobavega mamba; bamasusa makulu mogu; na amalisila baburu bogu. 25Bamakunsa mulendu ogu ava bamavivila Joseph va muangulu, mu mbari bamatsingulu yiri boji nandi. 26Ava Joseph amatotila o ndagu bamamuwakisa mulendu agu bamamubeyila na bamagudama va tsi va gusu andi. 27Amabawivula rie: Duji buranga? Taji enu aji dumansingula aji buranga? Aki monyu? 28Jogu bamamugabusila rie: Musatitsi agu, taji etu, aji buranga na aki monyu.

Mbana hamamuegudama va tsi va gusu andi. 29Mbana Joseph amalaba muana nguji andi Benjamin. Amawivula rie: Agugu la muana taji enu agu dumansingula?

Amabuela rie: Muana ami Nsambi agugabili miula!

30Amagaangu na durondu ava amalabila muana nguji andi te na amagulu nsala ulila, kobogu amasundila upala nokota o yibuku yindagu andi uyelila. 31Anomana ususa yinsi amapala, amawarisa murima mbana amavosa rie: Kabulanu biguji. 32Bamakabulila Joseph biandi o mbura jisusu na baana bataji bandi va mbura mosi; bisi Egypte abamajanganga nandi bamakabululu mbura jisusu wandi mu mbari bisi Egypte basamarungula uji va mosi na bisi Hebreu: muyitsa ubisi Egypte umadigandisa. 33Baana bataji baJoseph bamaba va nsungisini na tavula andi, bamatsanusu nana bamadukasana na mbura, ubanda na tsomi te na marina; jogu bamagengasana na bamakambulu. 34Joseph amabatindila biguji abimaba va tavula andi na Benjamin amadila kumbu yiranu uviolila basusu. Bamanu malamu na bamalabanga nsangu va mosi nandi.

Currently Selected:

Dibandu 43: PUU1992

Highlight

Copy