Dibandu 45

Joseph ujabisa ejabisi anyi avu

1Mambu meni mamapupisa murima Joseph te na asamamuerungula uwarila va gusu batu botsu abamaba nandi. Amagamuga rie: Batu botsu palanu.

Yika baana bataji bandi bamasiala ava amakejabisila anyi avu ombu gogu. 2Joseph amalila tindi ulila te na bisi Egypte bamamugulu na bisi ndagu Pharaon wandi. 3Joseph amatubulila baana bataji bandi rie: Menu la Joseph! Taji ami aki monyu?

Tumba baana bataji bandi bamabakama mirima te na basamalerungula umuwagula. 4Joseph amaruma baana bataji bandi rie: Kwekanu ombu gami; jogu bamakweka. Amamuevosa rie: Menu la Joseph muana taji enu agu dumasumbisa ubegu o Egypte. 5Duyamuelaba keri na duyakenyoyila mu mbari dumansumbisa ombu batu bebaba; Nsambi amatetsa o gusu enu yiri dugofu. 6Dungosu dunsala dubandilanga mu bulongu tuka bilima bibeji; vakivu bilima biranu na vagoba ne ufutsa ne utsonsiga. 7Nsambi amatetsa o gusu yiri jenu na mikuta mienu dugotsiemuga, dubanganga tindi dilongu adimawaku kalala. 8Kabogu tsiri jenu adumansindiga gunu tumba Nsambi jaʼ beni; amapaga taji Pharaon na fumu ndagu andi jiotsu na yivunda yibulongu buotsu buEgypte. 9Lensanu nogabuga ombu taji ami na dukamutsingula rie: Nsambi amapaga fumu jibulongu buotsu buEgypte; rugʼ ombu gami guyamuetsinga! 10Ndeʼ gutsananga o bulongu buGochen: Ndeʼ na baana bagu bababaala, na baana bababaala babaana bagu na bindombu biagu na binsabi biagu na bangombi bagu na biagu biotsu; diwendi rie: gutsananga bebeli nami. 11Avana nyudubungulilanga yiri dudila monyu, ndeʼ na bisi ndagu agu na biagu biotsu mu mbari vakivu bilima biranu bidungosu dunsala.

12Joseph amabuela rie: Jenu beni duindabi na muana nguji ami Benjamin endabi wandi yiri tsiri mutu ususu tumba meʼ beni Joseph aguivosi nenu. 13Wendanu yetsingulanu taji ami nana nyivu na bundumba o Egypte na nana jenu beni dutsibulabila; dukalensa nombeyila taji ami gunu.

14Amakweka ombu muana nguji andi Benjamin; bamabumbasana nolila. 15Amavaga dedi mosi na baana bataji botsu; bamabumbasana nolilanga wandi. Mbana baana bataji bamatsingusana misamu.

Pharaon unengila enengili Jacob o bulongu buEgypte

16Nduku jimanyava te no ndagu Pharaon yiri baana bataji baJoseph bamaruga: adina dimalasa Pharaon na basalitsi bandi ubueji. 17Pharaon amatsingula Joseph rie: Tsingula baana bataji bagu rie: Vaganu adidi: longilanu bibulu bienu mifuna, gabuganu o bulongu buCanaan; 18yelandanu taji enu na mikuta mienu, ruganu ombu gami. Nyudutsanisa o yiari yiboti yiEgypte na dukusuyila mu digumba dibulongu buebubu. 19Gukabavega musuga ubonga makalu mabulongu buEgypte ubeyila baana bogu na bagatsi bogu; nesi taji ogu. 20Bayanyonga abi bosila mu mbari nyubatsanisa va mbura aji bodilila biboti biotsu bibulongu buEgypte.

21Baana bababaala baJacob bamavaga nana bamatsingululu. Na musuga uPharaon Joseph amabavega makalu; na amabavega biguji bimuendu wandi. 22Amavega jogu botsu biduaru bifeta tumba amavega Benjamin biduaru biranu na kama yirieru tsimbongu. 23Amatindila taji andi yigumi yibalumi bababuru abamaba balongulu biboti biEgypte, na yigumi yibibusi bibaburu abimalongulu ble na mapa na biguji bimuendu utaji andi. 24Mbana amaganina baana bataji bandi na amabalonsa rie: Duyatsunda mu nsila, mbana bamayenawenda.

25Kabogu bamagusuga o Egypte na bamatola o bulongu buCanaan ombu taji ogu Jacob. 26Bamamutsingula rie: Joseph aki monyu la jandi oyirumi bulongu buEgypte. Tumba Jacob amagaangu na yinoru; asamarungula ubavayila yitu. 27Jogu bamamutsingula mambu motsu ama Joseph amavosa na Jacob anolaba makalu ama Joseph amatinda umubeyila amasunsa murima andi! 28Amavosa rie: Ka muna nsangu ji! Muana ami Joseph aki monyu! Nyuwenda, nyulemulaba ne ngafu.

Currently Selected:

Dibandu 45: PUU1992

Highlight

Copy