Dibandu 46
46
Jacob uweʼ ewendi o Egypte
1Jacob amawenda na biandi biotsu. Anotola o Bercheba amavagulila Nsambi taji andi Isaac pagu. 2Ava mukolu Nsambi amalasa Jacob yiriariamu na amamunengila rie: Jacob! Jacob amawagula rie: Meʼ janduʼgu!
3Nsambi amavosa rie: Menu la Nsambi, Nsambi taji agu. Guyalaba keri uwenda o Egypte mu mbari aguna nyufunisa tindi ufunisa bategula bagu. 4Meʼ beni nyugugabusa; Joseph oba nagu ava gufuila.
5Jacob amarambuyila o Bercheba; baana bandi bababaala bamamunangiga va mosi na baana bogu na bagatsi bogu mu makalu maPharaon ama amatinda ubabeyila. 6Bamabonga na migamba miogu wandi na biotsu abi bamadilila o bulongu buCanaan na bamawenda o Egypte. 7Jacob amayenawenda na baana bandi bababaala o Egypte na baana bababaala babaana bandi bababaala na baana bandi babagetu babaana bandi bababaala, diwendi rie: mukuta andi uotsu.
Mukuta uJacob
8Amama la miina mabaana bababaala baJacob abamawenda o Egypte. Jacob na baana bandi bababaala. Tsomi Jacob: Ruben. 9Miina mabaana bababaala baRuben amama: Hanok na Pallou na Hesron na Karmi. 10Miina mabaana bababaala baSimeon amama: Yemouel na Yamin na Ohad na Yakin na Sohar; na Saul muana dibaala umuisi Canaan. 11Miina mabaana bababaala baLevi amama: Guerchon na Quehat na Merari. 12Miina mabaana bababaala baJuda amama: Er na Onan na Chela na Peres na Zera; tumba Er na Onan bamafuila o bulongu buCanaan. Miina mabaana bababaala baPeres amama: Hesron na Hamoul. 13Miina mabaana bababaala baIssakar amama: Tola na Pouva na Job na Chimron. 14Miina mabaana bababaala baZabulon amama: Sered na Elon na Yaleel.
15Abana la baana bababaala aba Lea amaburila Jacob o Mesopotamie, na muana andi umugetu diina diandi Dina. Baana bandi bababaala na babagetu dutalu duogu dumaba magumarieru na baana barieru. 16Miina mabaana bababaala baGad amama: Sifion na Hagui na Chouni na Esbon na Eri na Arodi na Areli. 17Miina mabaana bababaala baAsser amama: Imna na Icheva na Ichevi na Beria; na yibusi yiogu Sera. Miina mabaana bababaala baBeria amama: Heber na Malkiel.
18Amana miina mabaana bababaala baZilpa agu Laban amavega ombu muana andi umugetu Lea; aba amaburila Jacob. Botsu bamaba yigumi na batu basiamunu.
19Miina mabaana bababaala baRachel mugatsi Jacob amama: Joseph na Benjamin. 20Asnat muana mugetu uPotifera agumaba muvagulitsi pagu uOn amaburila Joseph Manasse na Efraim o bulongu buEgypte. 21Miina mabaana bababaala baBenjamin amama: Bela na Beker na Achebel na Guera na Naaman na Ehi na Roch na Houppim na Mouppim na Aide. 22Abana la baana bababaala baRachel aba amaburila Jacob. Dutalu duogu dumaba yigumi na batu bana. 23Diina dimuana dibaala uDan adidi: Houchim. 24Miina mabaana bababaala baNeftali amama: Yassiel na Gouni na Yesser na Chillem.
25Abana la baana bababaala baBila agu Laban amavega ombu muana andi umugetu Rachel, aba amaburila Jacob. Dutalu duogu duvu yisambuali yibatu.
26Batu abamawenda na Jacob o bulongu buEgypte aba jaʼ beni amabura, dutalu duogu duotsu dumaba magumasiamunu na batu basiamunu, tsiri utala bagatsi babaana bandi. 27Joseph amaba na baana babeji bababaala abamaburulu o bulongu buEgypte; dutalu duotsu dumukuta uJacob agumaba o bulongu buEgypte dumaba magumidusambuali.
28Jacob amaretsa Juda ombu Joseph uyemutsingula rie: Gukatasuna o Gochen. 29Joseph amakunsa dikalu diandi na amanangama uwenda o Gochen uyebengusana taji andi Jacob. Anomulaba amamubumba na amalila tindi ulila. 30Jacob amatsingula, Joseph rie: Ka muna nsangu ji! Nyimagulaba! Gukivu monyu!
31Joseph amatsingula baana bataji bandi na botsu abamaba nandi rie: Nyuyelubusa Pharaon rie: Baana bataji bami, na botsu ababetsi o bulongu buCanaan bamatasuna. 32Babaala beni bavu babungulitsi babindombu, bebunguli migamba; bamabega bindombu biogu na binsabi biogu na bangombi bogu na biogu biotsu. 33Pa Pharaon odimengila oduwivula rie: Yisalu yienu yi? 34Dukawagula rie: Tuji babungulitsi babindombu ubanda va bungebi buetu te na namunyi, jetu botsu na bataji betu. Adina diudurombisa utsana o yiari yiGochen mu mbari babungulitsi botsu babindombu bavu nsoruru ombu bisi Egypte.
Currently Selected:
Dibandu 46: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
