Ukumuga 9

Yivunga ayimuranu: Biruitsi uguda bigudi

1Fumu amaruma Moise rie: Wenda ombu Pharaon nomuruma rie: Fumu Nsambi baHebreu jandi rie: Dunda batu bami yiri bonsalila. 2Pa guibusi ubawensa nomuebasikiga, 3Fumu onamusu biruitsi bienu yivunga: bakabala na baburu na basamo na bangombi na bindombu na binsabi; bipuela biuguda. 4Fumu ovaga duviakusunu va gari migamba mibaIsrael na mibisi Egypte; ne yimosi yibiruitsi bibaIsrael yigofu.

5Fumu amatubula temu; amavosa rie: Mugesa dulaba yimaga ayi nyuvaga o Egypte.

6Kabogu ava kedi Fumu amayivaga. Migamba miotsu mibisi Egypte mimaguda, vasamafu ne yiruitsi yimosi yibaIsrael. 7Pharaon amagulu adimalabana; amagulu wandi yiri vasamafu ne yiruitsi yimosi yibaIsrael. Tumba Pharaon amamuegalisa murima andi na asamawensa baIsrael.

Yivunga ayimusiamunu: Bibambila

8Fumu amaruma Moise na Aaron rie: Bolanu mabufu, mbana Moise amatindi o julu va gusu Pharaon. 9Mokaluga difufundu adiubasa bulongu buotsu buEgypte; yiotsu ayi diunama batu vo bibulu diubarombisa ubela bibambila abiukaluga masieyi.

10Banobola mabufu mbana bamayelabana na Pharaon; Moise amamatinda o julu; manonama batu na bibulu, nyuru tsiogu tsimaba yika bibambila na bibambila abimakaluga masieyi na masieyi. 11Banganga baEgypte basamarungula ulabana na Moise mu diambu dibibambila; mu mbari banganga bamabela bibambila dedi mosi na bisi Egypte botsu. 12Fumu amagalisa murima uPharaon, asamagulu mambu maMoise na Aaron nana Fumu amalubusila Moise.

Yivunga ayimusambuali: Mfula jimamanyi

13Fumu amatsingula Moise rie: Rambuga kedi jineni, uyelabana na Pharaon. Gukamuruma rie: Fumu Nsambi baHebreu jandi rie: Dunda batu bami yiri bonsalila. 14Mu mbari temu ejiji nyulasa bivunga biami biotsu ombu gagu nʼombu basalitsi bagu nʼombu batu bagu, mbana gujaba yiri vagaa mutu ne umosi aguvu dedi nami mu bulongu buotsu. 15Mbe nyimalasa mangolu mami uduboka, jenu na batu bagu na yivunga, mbe dumatsiemuga kala. 16Tumba gukivu monyu te na namunyi yiri gulaba mangolu mami na diina diami diusamunu o malongu motsu. 17Pa gumuelasa batu bami maguga na pa gugobadunda, 18mugesa va diweru diedidi nyunoyisa mfula jineni jimamanyi, mfula ajisakanoga na kala o bulongu buEgypte ubandila ava dusundulu dubuonyi te na namunyi. 19Kabogu kotisanu migamba na biotsu abivu nenu o gusu kana o bivanga, mfula jimamanyi jiunogulu batu botsu na bibulu biotsu abavu o gusu kana; abagokotusu o mandagu bofu.

20Basalitsi baPharaon basusu bamaduma mbembu Fumu kabogu bamarumisa baviga ukotisa migamba miogu o bivanga. 21Tumba basusu abasamakipa mbembu Fumu bamasila baviga na migamba miogu o gusu kana.

22Fumu amaruma Moise rie: Samba gogu agu o julu yiri mfula jimamanyi jiunogulu batu na bibulu na bivaru o bulongu buotsu buEgypte.

23Moise amasamba nguangu andi o julu; Fumu amabasisa julu jiotsu na bidumi na mfula jimamanyi jimanoga, muji umayenavendumuganga. Mbana Fumu amanoyisa mfula jimamanyi o bulongu buEgypte. 24Mfula jimamanyi jimanoga na muji umasobana na jionyi; jimaba tindi mfula ajisakalabana na kala o bulongu buotsu buEgypte ubandila vana dibandu dibulongu bueni. 25O bulongu buEgypte mfula jimamanyi jimanogulu botsu abamaba o gusu kana: nesi batu nesi bibulu; mfula jimamanyi jimabivisa nesi bivaru nesi miri. 26Yika o yiari yiGochen buandi, agu baIsrael bamatsaninanga agusamanoga mfula eni. 27Pharaon amaruma batu uyenengila Moise na Aaron na amabatsingula rie: Temu ejiji nyisingi nyimavaga dibi; Fumu aguvu usungama, jetu na batu bami tuna mbela. 28Sambilanu Fumu yiri vayamueba bidumi na mfula jimamanyi; mbana nyuduwensa na batu benu, ngomuedusikiga.

29Moise amamutsingula rie: Yiotsu ayi nyugusuyila va musiengi nyusamba miogu miami ombu Fumu; bidumi biuvola na vagomuenoga mfula jimamanyi mbana gujaba yiri butamba buotsu buvu buFumu. 30Viaga! Jenu na basalitsi bagu dugoduma Fumu Nsambi nyidujabi.

31Bivaru bilina na orsa bimabungu mu mbari orsa tsimawela na bilina bimawansa. 32Bivaru bible bisamabungu mu mbari temu tsiogu mbe tsisakatola.

33Moise amapala o ndagu Pharaon uwenda o disogumunu; amasamba miogu miandi ombu Fumu na amasambila. Mbana bidumi na mfula jimamanyi bimavola, mfula jisamamuenoga.

34Pharaon anolaba yiri mfula na mfula jimamanyi na bidumi bimavola, amavaga dedi mosi nana na kala, amamuegalisa murima andi, jogu na basalitsi bandi. 35Pharaon amagalisa murima andi na amabusa uwensa baIsrael, nana Fumu amalubusila Moise.

Currently Selected:

Ukumuga 9: PUU1992

Highlight

Copy