Ukumuga 14
14
Pharaon uduka eduki baIsrael
1Fumu amatsingula Moise rie: 2Ruma baIsrael bagabuyi noyevaga milaku va gusu Pi-Hahirot va gari Migdol na mubu, va nsungisini na Baal-Sefon; duvaga milaku va mugula mubu. 3Pharaon otasa yiri jenu baIsrael dumatsiemuga, kumu jimadunyambasana. 4Kabogu nyugalisa murima Pharaon, oduduka. Nyulasa Pharaon na mabadi mandi mangolu mami ava nyubagudisila. Mbana bisi Egypte bojaba yiri nyivu Fumu.
BaIsrael bamavaga nana bamarumunu. 5Bamatsingula kaga Egypte yiri baIsrael bamarina. Mbana Pharaon na basalitsi bandi bamagabusa mirima nsima mu diambu dibaIsrael; bamavosa rie: Dibandu yi tumabawensila? Tugokambulu na bisalu? 6Pharaon amakunsa dikalu diandi, jogu na batu bandi bamayenasogama. 7Amabonga kama yisiamunu tsimakalu na bangogaga na makalu motsu masusu maEgypte amamabega batoyitsi. 8Fumu amagalisa murima Pharaon kaga jiEgypte agumadukilila baIsrael. BaIsrael bamapala o Egypte na mangolu maneni maFumu. 9Bisi Egypte bamabaduka; bakabala botsu na makalu maPharaon na babeyitsi bamakalu meni na dibadi diandi, bamabarasuna va milaku miogu va mugula mubu o yiari yiPi-Hahirot, va nsungisini na Baal-Sefon.
10Pharaon anobambana nogu, baIsrael bamabuaga misu na bamalaba bisi Egypte yika uduka bebaduki; kabogu bamagaangu na goma jineni te na bamagamuyila Fumu. 11Bamawivula Moise rie: O bulongu buEgypte ugaa bangila? Dibandu yi gutsitubeyila uyifuila o kumu? Dibandu yi gutsitupalisila o Egypte? 12Tsiri nana tumalegutsingulila o Egypte rie: Uviolila ubueji pa tusalila bisi Egypte tsiri ufuila o kumu, mbeʼya? 13Moise amabawagularie: Duyalaʼ keri! Warisanu mirima! Fumu oduwaka kalala namunyi! Bisi Egypte aba duilabi namunyi, dugomuebalaba o gusu te na mutubu. 14Fumu odutoyila, jenu dugotoga!
Nsambi upasa epasi mubu
15Fumu amawivula Moise rie: Migamu mieni dibandu yi? Vosa na baIsrael rie: Sogamanu! 16Ndeju bonga nguangu agu samba gogu agu o mubu, pasa mubu, mbana baIsrael bosunda mubu agumakamuga kala. 17Menu nyugalisa mirima mibisi Egypte yiri jogu wogu boduduka; mbana nyulasa bundumba buami ava nyugudisila Pharaon na dibadi diandi diotsu na makalu mandi na babeyitsi bandi babakabala. 18Bisi Egypte bojaba yiri menu la Fumu ava nyulasila bundumba buami nogudisa Pharaon na makalu mandi na babeyitsi bandi babakabala.
19Yiansa yiNsambi ayimawendanga va gusu baIsrael yimavinga va nsima ogu; na dimungi dimuji adimarelanga dimavinga va nsima ogu wandi. 20Dimavinga va gari bisi Egypte na baIsrael. Dimungi dieni dimuji dimaba pisama ombu bamosi tumba ombu basusu dimaba yika yijalala na yijalala ayimabamonitsa mukolu. Bisi Egypte na baIsrael basamabambana mukolu uotsu.
21Moise amasamba gogu andi o mubu mbana Fumu amasindila mubu na punga ajimaruyila o yiari ayi wisi epalili ajimagumbanga na mangolu maneni mukolu uotsu; amakamusa mubu. Mamba mamapasiga, 22baIsrael bamasunda mubu agumakamuga, mamba mamaba nderi bibaga yiari na yiari. 23Bisi Egypte bamabaduka; bakabala botsu baPharaon na makalu mandi na babeyitsi bandi bamakalu, jogu wogu bamabaduka o mubu. 24Ava mavuvungi Fumu jidimungi na dimungi dimuji amalabilila bisi Egypte na amabapupisa mirima. 25Amapakula makulu mamakalu mogu na amarangisa muendu ogu, mbana bisi Egypte bamavosa rie: Turinianu! Fumu uwamusa ewamusi baIsrael, agaa netu.
26Fumu amaruma Moise rie: Samba gogu agu o mubu; mamba modiamisa bisi Egypte na makalu mogu na babeyitsi bogu na bakabala.
27Moise amasamba gogu andi o mubu ava mavuvungi, mubu umamuebanda bukanyi buandi na bisi Egypte bamaweliga urina; tumba Fumu amadiamisa bisi Egypte o gari mubu. 28Mamba mamamuebasa na mamadiamisa makalu na babeyitsi babakabala na dibadi diotsu diPharaon adimaduka baIsrael o mubu; botsu bamaguda. 29Tumba baIsrael bamavioga va gari mubu ukamuga, mamba mamaba yiari na yiari nderi bibaga.
30Muna yilumbu yieni Fumu amawakila baIsrael kalala ombu bisi Egypte; va disimu baIsrael bamalabilila mfumbi tsibisi Egypte atsimaba layini o mubu. 31BaIsrael bamalaba mangolu maFumu ama amalasa ombu bisi Egypte. BaIsrael bamaduma Fumu na bamavayila Fumu na musalitsi andi Moise yitu.
Currently Selected:
Ukumuga 14: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
