Ukumuga 13

Maruma masusu maPaque

1Fumu amatsingula Moise rie: 2Kwakisi tsomi tsiotsu, tsomi tsiotsu tsibaIsrael; nesi tsibatu nesi tsibibulu: tsiotsu atsiami.

3Moise amatsingula batu rie: Rangiminanu yilumbu yieni ayi dumapalila o Egypte o buviga; Fumu amadupalisa o Egypte na mangolu mandi. Ava dumajanganga feta eni duyaji mapa amavu na dufunusu. 4Namunyi duipalili mu tsungi nsumbi. 5Ava Fumu odutolisila o malongu ama bisi Canaan na baHitt na baAmor na baHivie na baJebusie betsanini ama amalevila pesi na bataji benu uduvega, amavu na digumba dineni, aguna o yiari yieni duvaga yibenguna yiuyitsila Fumu muna tsungi eni yilima na yilima. 6Mu yisambuali yibilumbu dujanganga mapa amagaa na dufunusu, yilumbu yimusambuali yiuba yifeta jiuyitsila Fumu. 7Dujanganga mapa amagaa na dufunusu te na yisambuali yibilumbu. Duyakelisa mapa amavu na dufunusu o mandagu menu nesi dufunusu o bulongu buenu buotsu. 8Mbana mutu mutu akatsingula muana andi udibaala rie: Jivu yirangumunu yimambu ama Fumu amatuvayila ava tumapalila o bulongu buEgypte. 9Feta eni jiuba yirangumunu dedi mosi nana yilimba va dikaka vo va mbami yiurangimisa mutu diambu. Jiudurangimisa yiri vengu dusamuna migaga miFumu mu mbari amadupalisila o Egypte na mangolu mandi. 10Yilima na yilima dukelisanga yirangumunu yiPaque nana yimakunsulu.

11Moise amabuesa rie: Ava Fumu odutolisila o bulongu buCanaan, nana amalevila jenu na bataji benu pesi uduvega buonyi, 12duwakisa tsomi tsiotsu ombu Fumu; nesi tsomi tsibibulu abi dudila, diwendi rie: balumi botsu boba baFumu. 13Tsomi tsiotsu tsibaburu dutsikobula na yindombu vo yinsabi, pa dugetsikobuli dukatsitabula miuru. Tumba baana bababaala ababatsomi, tsiotsu tsiukobulu. 14O gusu ava baana benu bowivulila rie: Adina divindugulu yi? Dukabawagula rie: Fumu amatupalisa o bulongu buEgypte o buviga na mangolu mandi. 15Na kanda Pharaon amabusa utuwensa, kabogu Fumu amabokisa tsomi tsiotsu tsibulongu buEgypte, nesi tsibatu nesi tsibibulu. La dibandu tuivagulili Fumu pagu tsitsomi tsiotsu tsibalumi, na tuikobuli tsomi tsiotsu tsibaana betu bababaala. 16Pagu tsieni tsiuba yirangumunu dedi mosi nana yilimba va dikaka vo va mbami yiurangimisa mutu diambu. Kabogu durangimina yiri Fumu amatupalisila o Egypte na mangolu mandi.

Nsambi uwendisa ewendisi batu bandi

17Pharaon anowensa baIsrael, Nsambi asamabawendisa mu nsila jibulongu bubaPhilistin diuleba nsila eni jimaba bebeli; Nsambi amavosa rie: Batu borungula ukalula diela ava bolabila mavita na bogabuga o Egypte. 18Tumba Nsambi amarumisa batu uvioyila mu nsila jikumu o yiari yiMubu uBenga. BaIsrael bamapala o bulongu buEgypte muna mukuta mukuta. 19Moise amayenabega bivisi biJoseph mu mbari amavangana na baana bataji bandi ava amabiyila rie: Nsambi oduwamusa na odupalisa o Egypte na dubega bivisi biami.

20BaIsrael bamarambuga va Soukot na bamavaga milaku o Etam, o kodu kumu. 21Fumu amawendanga va gusu ogu, ava nyangu nderi dimungi adimabalonsa nsila ava mukolu nderi dimungi dimuji adimabamonitsa nsila, kabogu baIsrael bamarungula uwendanga nyangu na mukolu. 22Ava nyangu dimungi dieni disamakakana nogu, nesi ava mukolu dimungi dimuji disamakakana nogu.

Currently Selected:

Ukumuga 13: PUU1992

Highlight

Copy