Ukumuga 15
15
Duimbu duMoise na baIsrael
1Mbana Moise na baIsrael bamawimbilila Fumu duimbu duedudu rie:
Nyuwimbilila Fumu
mu mbari amalasa
bundumba buandi,
Amadiamisa bakabala na
babeyitsi bogu!
2Fumu avu mangolu mami na
dibandu diduyitsu duami;
Jandi amakobula.
Jandi avu Nsambi ami;
nyumuyitsanga;
Jandi avu Nsambi taji ami,
Nyumugobisanga.
3Fumu avu mutoyitsi umangolu.
Diina diandi divu Fumu.
4Amabuaga o gari mubu
makalu maPharaon na
dibadi diandi;
bangogaga baEgypte
bamadiamusu o Mubu uBenga.
5Mibiji mimabadiamisa:
bamadiama o tsi mamba
nderi mamanyi.
6Fumu, dikaka diagu dimabaala
dimalasa mangolu magu!
Fumu, dikaka diagu dimabaala
dimabelisa bavinitsi bagu.
7Na bundumba buagu buneni
gumabelisa bavinitsi,
gumalasa kabu agu,
ajimaba nderi muji
agumasielasana.
8Gumavotsa yika uvotsa,
mamba mamagukama
muwigu umarelama
nderi bibaga
na mibiji mimakita
o gari mubu.
9Muvinitsi amavosanga rie:
Nyubaduka na nyubadala,
nyubapatula abiogu,
pila ami jiudugusu,
nyusomuna dijenga
mbana nyubaboka.
10Tumba ndeʼ Fumu
gumavptsa punga agu
mubu umabadiamisa.
Jogu botsu bodiama
o tsi mamba nderi biumbu.
11Fumu, bansambi bapuela
bavu tumba nsambi yi
jivu dedi nagu?
Anyi avu dedi nagu
mu bunsambi?
Anyi avu uwelimina ukakusu?
Anyi avu uwelimina
uvaga bimaga?
12Gumasamba gogu agu umabaala:
butamba bumabamina!
13Na yingeba yiagu
gumawendisa batu bagu
gumabawaka kalala na
mangolu magu
gumababega o bulongu
bupangini.
14Batu bamadigulu na
bamaregama;
goma jimagaanga
baPhilistin wandi.
15Bivunda biEdom bimagaangu
na goma,
batoyitsi baMoab bamaregama
tindi uregama;
bisi Canaan botsu
bamabakama mirima.
16Keri na goma bimabagaanga.
Aa Fumu mangolu magu
mamabarombisa uba sui
nderi dimanyi te na
batu bagu bamasabuga!
Te na bosabuga ngensa,
batu aba ndeʼ beni
gumakesumbila.
17Ndeju gubabega na
gubatsanisa va julu
mukongu
aguvu disiala diagu,
va mbura aji ndeʼ Fumu
gumakunsila yitsanunu yiagu,
Mbura Nsambi aji ndeʼ beni
Fumu gumasunda.
18Fumu, guvu kaga te na mutubu!
19Bakabala baPharaon na makalu mandi na babeyitsi bandi babakabala bamasunda o gari mubu, na Fumu amabagulasana na mubu; tumba baIsrael bamavioga va mbura jikamuga o gari mubu.
20Miriam yibusi yiAaron agumaba mubiyitsi amabonga ndungu, bagetu botsu basusu baIsrael bamamudukanga na bandungu bogu noyenayinanga.
21Miriam amabawimbisa rie:
Wimbililanu Fumu,
Amalasa mangolu mandi;
Amadiamisa bakabala na
babeyitsi bogu o mubu.
BAISRAEL AVA BAMABILA OKUMU
Mamba maMara
22Moise amasoyiga baIsrael va Mubu uBenga. Bamawenda o yiari yikumu jiChour; bamamana bilumbu birieru o kumu, tumba basamadila mamba. 23Bamatola o Mara tumba basamarungula unu mamba maMara mu mbari mamaba nduli. (La dibandu mbura eni jimanengululungu Mara.) 24BaIsrael bamatatila Moise rie: Yi tunu? 25Moise amagamuyila Fumu; Fumu amamulonsa muiri agu amabuaga mu mamba na mamba mamabueji.
Avana Fumu amabaveyila migaga na maruma, avana wandi amabaweliyila. 26Fumu Nsambi amavosa rie: Pa guidedili diufi diami tindi udedila, na pa guivayi amavu mawelimina va gusu ami na pa guiliyi matuji ugulu maruma mami na pa guikelisi migaga miami miotsu, kabogu ngogunamusu maali ama nyimanamusu bisi Egypte; mu mbari menu la Fumu oyigubelusi.
27Bamatola o Elim agumaba yigumi na bileka bibeji na magumidusambuali mamambari. Bamavaga milaku va mugula mamba.
Currently Selected:
Ukumuga 15: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
