Ukumuga 12
12
Feta Paque
1Fumu amatsingula Moise na Aaron ava bamabila o Egypte rie: 2Tsungi ejiji jiuba tsungi enu jitega; jiuba tsungi enu jitega jiyilima. 3Tsingulanu dibuli diotsu dibaIsrael rie: Mu yilumbu yimugumi mu tsungi ejiji kadi mukuta ubonga muana yindombu vo yinsabi: ndagu ndagu yindombu yiandi. 4Pa mukuta ugaa uneni yiri dugorungula umana yibulu yiotsu, durungula uyiji va mosi na jogu abasinsa ubambana nenu. Diwendi rie: duletala batu nojaba nana mutu mutu ogabulu. 5Yiuba yibulu ayigaa na yifu, yimulumi ayikavu yilima yimosi; durungula ubonga muana yindombu vo muana yinsabi. 6Duyikelisa te oa yilumbu yiyigumi na muina yitsungi ejiji; mukuta mukuta uyiboka va tsisiga. 7Dubonga malungu mayibulu, dumasinga mu makutu motsu mabeji na mu migunda mimunu ndagu yika la ndagu aji duyiji; 8vana mukolu eni duji nyama tsigoku; dutsiji na mapa amagaa na dufunusu na magaji manduli. 9Duyatsiji mbisu, duyatsilamba, tumba tsiugoku na muru na bakondu na bigari. 10Duyasuega biguji te na kedi; pa vosiala biguji dukabinyensa. 11Ava duji mulambu duduara babeleeti na bapondu na dukagaanga manguangu, dukaji mbangu mbangu. Aguna la mulambu ufeta Paque jiFumu.
12Vana mukolu eni nyuvioga o Egypte na nyuboka tsomi tsiotsu tsibisi Egypte, ubanda na tsomi tsibatu te na tsibiruitsi na nyutabulila bansambi botsu babisi Egypte bunsonsi. Menu la Fumu. 13Maiungu meni moba yilimba o mandagu ama jenu duba; ava nyulabila malungu nyuvioga kuasa, yivunga yigodubunga ava nyukilisila bisi bulongu buEgypte.
14Durangiminanga yilumbu yieni na duyikelisanga feta jiukitsila menu Fumu; duyikelisanga jenu na bategula benu te na mutubu.
Feta jiniapa amagaa na dufunusu
15Mu yisambuali yibilumbu dujanganga mapa amagaa na dufunusu. Ubanda na yilumbu yitega duyamueba na dufunusu o mandagu menu. Ubanda na yilumbu yitega te na yimusambuali, mutu uotsu oyiji mapa amavu na dufunusu ogusulu mu dutalu dubaisraei. 16Yilumbu yitega duba na tindi yibenguna yiNsambi na mu yilumbu yimusambuali wandi. Duyasala ne yisalu yimosi mu bilumbu bieni; yika ulamba biguji bimutu mutu.
17Dukelisanga feta jimapa amagaa na du-funusu, la mu yilumbu yieni nyimapalisila batu benu o bulongu buEgypte. Dukelisanga mugaga egugu: jenu na bategula benu dukelisanga yilumbu yieni te na mutubu. 18Mu tsungi ajitega ava tsisiga jiyilumbu yimagumabe-ji na yimosi duyajanganga mapa amagaa na dufunusu. 19Duyakelisa dufunusu o mandagu menu te na yisambuali yibilumbu; mutu uotsu ne muenyi ne muIsrael aguji mapa amavu na dufunusu ogusulu mu dutalu dubaIsrael. 20Duyaji mapa amavu na dufunusu; o mandagu menu motsu, dujanganga yika mapa amagaa na dufunusu.
Kunsulu jiPaque
21Moise amanengila bivunda biotsu biIsrael, amabaruma rie: Yesolanu yibulu yiPaque noyiboka yiri mikuta mienu miujanganga mulambu uPaque. 22Mbana dukabonga bitsafinyi biyisopa. Dukabiputiga mu malungu mayibulu amavu mu nsienga, dukabonga malungu meni nomasinga mu migunda na mu makutu amavu o munu ndagu. Ne mutu mosi ayapala o ndagu te na kedi. 23Ava Fumu ovioyila uboka bisi Egypte, yiotsu ayi olabila malungu mu migunda na mu makutu motsu mabeji ovioga kuasa va miunu mimandagu, agosingisa mubungitsi ukota o mandagu menu uyenabokanga abenu. 24Jenu na baana benu dukelisanga motsu mana mugaga te na mutubu. 25Ava dutolila o bulongu abu Fumu amavangana pangini uduvega, dukelisanga yifu yieyiyi yingitsi. 26Ava baana benu boduwivulila rie: Ayina divindugulu yi? 27Dukabawagula rie: Ayina yivu pagu ajimavagululu Fumu va temu Paque. Ava baIsrael bamabila o Egypte, Fumu amaboka bisi Egypte tumba amavioga kuasa va gusu mandagu metu, diwendi rie: amawaka mikuta mietu kalala.
Kabogu baIsrael bamagudama uyenayitsa Fumu. 28BaIsrael bamayenawenda na bamavaga motsu ama Fumu amaruma Moise na Aaron.
Yivunga ayiusita: Tsomi tsibisi Egypte tsimaboku
29Ava gari wisi Fumu amaboka tsomi tsiotsu o bulongu buEgypte, ubanda na tsomi jiPharaon aji mbe jiubialila yitsiga yiandi te na tsomi jimuviga aguvu o tsugu te na tsomi tsiotsu tsibiruitsi wandi. 30Va gari mukolu Pharaon na basalitsi bandi na bisi Egypte botsu bamarambuga; vamaba migamu mineni o Egypte, mu mbari vasamaba ne ndagu jimosi ajisamabokisa mutu. 31Vana mukolu eni Pharaon amanengila Moise na Aaron na amabatsingula rie: Gusuganu o bulongu buami jenu na baIsrael. Wendanu yesalilanu Fumu nana dumavosila. 32Bonganu bindombu bienu na binsabi bienu na bangombi benu nana dumavosila; wendanganu, tumba kabilianu miula.
33Bisi Egypte bamagamuga rie: Lensanu, wendanganu! Yika tsie jetu botsu tufu? 34La dibandu baIsrael bamanangulila matuka mogu mbe masakavi nesi uvi. Bamapieta bidu biogu mu biduaru biogu, bamabinangula va masambaka mogu.
35BaIsrael bamavaga adi Moise amabaruma, bamavonda bisi Egypte bima bilora jivema na bima bilora na biduaru. 36Fumu amadetsa mirima mibisi Egypte te na bamagabila baIsrael maboti mogu, nana bamabawivulila. Anana baIsrael bamakindila bisi Egypte.
37BaIsrael bamarambuga o Ramses, bamawenda o Soukot: dutalu duogu dumaba bebeli na kama yisiamunu tsitosini tsibabaala tsiri utala bagetu na baana na binunu. 38Yinombu yineni yibatu baminongu na minongu bamawenda va mosi nogu; bamaba na imigamba mineni wandi mibindombu na mibinsabi na mibangombi. 39Bamavaga mapa mageyi amasamaba na dufunusu na matuka meni amamarambuyila nogu o Egypte, ama mbe masakavi nesi uvi; mu mbari bamabingu o Egypte, basamatsikadana na basamabega biguji bisusu. 40Bilima bibaIsrael o Egypte bimaba kama jina na magumarieru. 41Vana disukusulu dikama jina na magumarieru mabilima, muna yilumbu yieni batu baFumu bamagusuga o bulongu buEgypte muna mukuta mukuta. 42Mukolu egugu ukelusungu mu mbari muna mukolu eni Fumu amapalisila batu bandi o bulongu buEgypte, dedi mosi baIsrael na bategula bogu bokelisanga mukolu eni urangiminanga Fumu.
Maruma maPaque
43Fumu amatsingula Moise na Aaron rie: Guluanu maruma maPaque amama rie: Muenyi uotsu ayaji mulambu uPaque. 44Gureba muviga agumasumbu na mbongu mbana orungula uji mulambu uPaque. 45Tumba muenyi na musalitsi bayaji mulambu uPaque. 46Yibulu yiPaque yiuligu yika o ndagu; guyapalisa nyama o ndagu na guyabula ne yivisi yimosi. 47Dibuli diotsu dibaIsrael diuji mulambu uPaque. 48Pa muenyi aguitsani o ndagu agu erondi uji mulambu uPaque jiFumu nesi babaala botsu abetsani muna vengu bolerebu mbana borungula uji mulambu uPaque, mbana bogengulu nana nderi bavu baIsrael; tumba ne mutu mosi agusarebu ayaji mulambu uPaque.
49Voba diruma dimosi ombu baIsrael nesi ombu muenyi aguitsani nenu.
50BaIsrael botsu bamavaga motsu ama Fumu amaruma Moise na Aaron. 51Muna yilumbu yieni Fumu amapalisa baIsrael o bulongu buEgypte muna mukuta mukuta.
Currently Selected:
Ukumuga 12: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
