Migaga Mimatubula 30

BaIsrael bogabuga ombu Fumu

1Dulaba mambu meni motsu: Miula na milogu miami. Ava Fumu Nsambi enu odupansila malongu mangana dutasanga motsu; 2pa dumuegabuga ombu Fumu Nsambi enu na pa dumuededila diufi diandi na mirima mienu miotsu na matasa menu motsu, jenu na bategula benu nana nyidurumini namunyi, 3mbana Fumu Nsambi enu odugabusa na odulasa yingeba na omuedubengusana va mbura aji Fumu Nsambi enu amadupansila. 4Ne pa dubegu o masuka mabulongu Fumu Nsambi enu odubengusana oyedugukiga. 5Fumu Nsambi enu odugabusa o bulongu abumaleba bubataji benu, buonyi buba abuenu; odu vaga maboti na odufunisa ne uviolila bataji benu. 6Fumu Nsambi enu oliomisa mirima mienu na mibategula benu mbana durondanga Fumu Nsambi enu na mirima mienu miotsu na matasa menu motsu yiri dugofu. 7Fumu Nsambi enu onamusa bavinitsi benu milogu mieni miotsu, diwendi rie: jogu aboduvinanga nodukuananga. 8Jenu dugabuga ombu Fumu na dumuededilanga diufi diandi na dukipanga maruma mandi ama nyiduveyi namunyi. 9Fumu Nsambi enu odufunisila maboti mu bisalu bienu biotsu nodubuesanga baana nesi migamba nesi digumba: Fumu omuelaba ubueji udufunisa nana amafunisila bataji benu 10ava dudedilanga diufi diFumu Nsambi enu nokipanga migaga na maruma abimasonugu mu dibuku dimigaga ava dumuegabuyila ombu Fumu Nsambi enu na mirima mienu miotsu na matasa menu motsu.

Mambu maNsambi mavu nenu

11Diruma diedidi adi nyiduveyi namunyi digeduviolili mangolu na digaa diranga. 12Digaa o julu mu mbari dukewivula rie: Anyi otumatila o julu uyetubongila dionyi? Anyi otugulusu dionyi yiri tudikipanga? 13Digaa o disimu dina dimubu yiri duwivula rie: Anyi otusabuyila o disimu dina dimubu uyetubongila dionyi? Anyi otugulusu dionyi yiri tudikipanga? 14Adi nyiduveyi divu bebeli nenu, diwendi rie: Mu miunu mienu na mu mirima mienu yiri durungula udikipanga.

Solanu monyu

15BaIsrael labanu, namunyi nyimasunsa monyu na maboti va gusu enu na dufu na mabi wandi. 16Nyiduveyi migaga namunyi: Rondanganu Fumu Nsambi enu nodukanganu amandi na kelisanganu maruma mandi na migaga miandi na malongi mandi mbana dugofu na dufunanga na Fumu Nsambi enu odugabila miula o bulongu abu duwenda abuba abuenu. 17Tumba pa mirima mienu miubiva na pa dugaa na dululu na pa dukevega o uyitsa bansambi bangana nobasalila 18nyidutubulili namunyi yiri dubungana, dugotamba nofu o bulongu abu duwenda abuba abuenu o disimu dina diJourdain.

19Dingensa te na julu na butamba biuvioga jabanu yiri namunyi nyimadusambula monyu na dufu na miula na milogu. Solanu monyu yiri dugofu, jenu na bategula benu. 20Durondanga Fumu Nsambi enu nodedilanga diufi diandi nofubana mirima nandi: adina diudurombisa monyu na dutsinga va butamba na dutsananga o bulongu abu Fumu amavangana uvega bataji benu: Abraham na Isaac na Jacob.

Currently Selected:

Migaga Mimatubula 30: PUU1992

Highlight

Copy