Migaga Mimatubula 29

Ama Nsambi amavayila baIsrael

1Moise amanengila baIsrael botsu na amabatsingula rie: Dumalaba motsu ama Fumu amavaga va misu menu o bulongu buEgypte ombu Pharaon nombu basalitsi bandi botsu no bulongu buandi buotsu. 2Dumalaba purulu tsiogu na bimaga bieni na bilimba abi bamalaba; 3te na namunyi Fumu asamaduvega mirima utsiyisa na misu ulaba na matuji ugulu amamalabana. 4Nyimaduwendisa o kumu te na magumana mabilima; biduaru bienu bisamafu na bapondu benu wandi. 5Diuleba dusamaji mapa na dusamanu nesi malamu maminongu na minongu dumajaba rie: Menu la Fumu Nsambi agumadukelisanga. 6Dumatola va mbura eni; Sihon kaga jiHechebon na Og kaga jiBachan bamapala utubengusana uyitutoyisa tumba jetu tumababelisa. 7Tumabapatula bulongu buogu na tumabuvega ombu baRuben na baGad nombu dikabu dimosi dibaManasse 8Kabogu kelisanganu mambu mapangini ejiji na makipanganu yiri dugokambulu mu motsu ama duvaganga.

Usingisila pangini jiFumu Nsambi

9Jenu baIsrael, namunyi duvu va gusu Nsambi enu, jenu botsu na bivunda bienu bibifumba na bivunda bienu na bivunda bienu bibagora: babaala botsu baIsrael 10na baana benu na bagatsi benu na benyi abavu nenu ubanda na jandi oyiduriabili mikansu nesi te na muteyitsi mamba menu. 11Dumakelasa usingisila pangini jiFumu Nsambi enu muna pangini eni ajimavangunu na pesi ajina aji Fumu Nsambi enu emuevangana nenu namunyi, 12yiri omuejiwarisila batu bandi namunyi na jaʼ beni oba Nsambi enu nana amaledutsingulila na nana amavanginina na pesi na bataji benu: Abraham na Isaac na Jacob. 13Tsiri nenu buandi nyivangini pangini ejiji, pangini ajimavangunu na pesi, 14jivu na botsu abavu va gari etu namunyi va gusu Fumu Nsambi etu na bategula betu abasakaburu.

15Duijabi nana tumatsanina o bulongu buEgypte na nana tumavioyila va gari malongu ama jenu dumananga. 16Dumalaba nsoruru tsiogu na bakosi bogu nesi bamiri nesi bamamanyi nesi balora jivema nesi balora abavu o bulongu buogu. 17Va gari enu vayaba nesi dibaala nesi mugetu nesi mukuta nesi yifumba aboliyila Fumu Nsambi enu nsima aboyekota o muyitsa ubansambi bangana. Va gari enu vayaba mutu agubagunu na dugundu, diwendi rie: mutu agubivisa mirima mibatu na posulu tsiandi. 18Anomana ugulu mambu mapangini ajimavangunu na pesi ayakematisa novosa rie: Nyulaba duvotsu nesi pa nyugalisa murima ami nesi nyudibula mulugu ami. 19Fumu agomutanda; obasa na diwavi na olasa mutu eni kabu na milogu miotsu amimasonugu mu dibuku diedidi; miumugaanga na Fumu otsiemusa diina diandi va butamba. 20Mu diambu didibi diandi Fumu omukakasana na bifumba biotsu biIsrael dedi mosi nana milogu mimasonugulu mu dibuku dimigaga ava pangini jimavangununu.

Fumu udugusu edugusu kaka tsiandi

21Dukula aduruga, diwendi rie: baana benu na benyi aborambuyila o bulongu buvala ava bolabila bivunga na budunga biFumu: butamba buotsu yika fula na musayi 22na dukanga dugobendisa nesi tsangu nesi yivaru nesi yiriri yiotsu nana ava Sodome na Gomorrhe mimapansiyila na Adma na Seboim ami Fumu amabunga na kabu andi jineni. 23Bisi malongu motsu bowivula rie: Dibandu yi amaroyisila kabu andi? 24Mbana bowaka rie: Mu mbari batu bebaba bamabunsa pangini aji Fumu jibataji bogu amavangana nogu ava amabapalisila o bulongu buEgypte. 25Bamayesalila bansambi bangana na bamabakutimina; bansambi aba basamalejabanga aba Fumu amabagandisa uyitsa. 26La dibandu Fumu amanyoyila bisi dilongu dieni kabu na amabanamusu milogu miotsu amimasonugu mu dibuku diedidi. 27Fumu amanyoga na amabagusula na kabu jineni o bulongu buogu na amabaviosa o bulongu bususu nana tuilabili namunyi.

28Mambu amamasuegu yika Fumu Nsambi etu emajabi. Tumba jetu tuijabingi amamatulasu, jetu na bategula betu, monyi la migaga miNsambi ami vengu tukipanga.

Currently Selected:

Migaga Mimatubula 29: PUU1992

Highlight

Copy