Migaga Mimatubula 3
3
Udila bedili bufumu buOg
(Dut 21.31-35)
1Tumageluga na tumavioyila mu nsila jiBachan. Og, kaga jiBachan amatubengusana na bagora bandi botsu uyetutoyisa o Edrei. 2Fumu amansingula rie: Duyamulaba goma; nyimamuwakisa ombu genu, jandi na bagora bandi botsu, na bulongu buandi: dukamuvayila nana dumavayila Sihon, kaga jiAmor agumatsananga o Hechebon. 3Fumu Nsambi etu amatuwakisa Og, kaga jiBachan na bagora bandi botsu, tumababelisa na tusamapatusa ne mutu andi mosi. 4Kabogu tumabonga misiengi miandi miotsu; vasamaba ne umosi agusamabetsu: magumasiamunu mamisiengi miyiari yiArgob ayivu bufumu buOg o Bachan. 5Misiengi mieni miotsu mimaba mikandu bivaga bisakama abimaba na biabutsu abimagomunu mandilu. 6Va julu vana bamaba misiengi misusu mipuela amisamakandu. Tumamibunga tindi ubunga nana tumavayila miSihon, kaga jiHechebon; tumabungatindi ubunga misiengi miotsu nesi babaala nesi bagetu nesi baana. 7Tumakinda yika biruitsi na bisusu abi tumabola o misiengi.
Ugabana begabini bulongu buGalaad
8Anana dimabila va temu eni tumakinda bakaga botsu babeji baAmor bulongu abuvu o disimu dina diJourdain ubandila o mujamba ugeyi aguinengulungu Amon te no mukongu uHermon. 9(Bisi Sidon bamaluga mukongu eni Sirion na bisi Amor bamaguluga Senir.) 10Tumakinda misiengi miotsu mikumu na Galaad na Bachan te na Salka na Edrei misiengi mibufumu buOg o Bachan. 11(Og, kaga jiBachan amasiala pinsa mu mukuta uRefaim. Tangi andi, tangi jibudilu, jigaa o Rabba o musiengi ubaAmmon? Usakama ujionyi umaba metera jina na yibuku na uroga ujionyi umaba metera beji, jimawetsugu na yietsu yitemu eni.)
12Kabogu tumabonga bulongu bueni. Nyimavega baRuben na baGad bulongu ubandila o Aroer o mujamba ugeyi uAmon na yiasi yimukongu uGalaad na misiengi miandi. 13Nyimavega yiari yimosi yiyifumba yiManasse yiasi yisusu yiGalaad na Bachan, diwendi rie: bufumu bugulu buOg. (Diina disusu diyiari yiotsu yiArgob na Bachan jiotsu dimaba bulongu buRefaim. 14Yair muana dibaala uManasse amabonga yiari yiotsu yiArgob te no mandilu maGuechourie na Maakatie na amaluga misiengi miBachan diina diandi; te na namunyi minengulungu misiengi miYair.) 15Nyimavega Makir muana dibaala uManasse Galaad. 16Ombu baRuben na baGad nyimabavega ubandila va mugula uGalaad te no mujamba ugeyi aguinengulungu Amon agumaba mandilu te no mujamba ugeyi aguinengulungu Yabboc, amana la mandilu mabaAmmon. 17Nyimamuebavega kumu ajitoli te no mujamba uJourdain ubandila o yiliba yiGenesareth te no Mubu uKali o banda mukongu uPisga o yiari ayi wisi epalili.
18Vana temu eni nyimaduveyila diruma diedidi rie: Fumu Nsambi enu amaduvega bulongu buebubu yiri buba abuenu. Jenu bagora botsu durela na bitogulu usabuga mujamba uJourdain va gusu baIsrael basusu. 19Bagatsi benu buandi na baana benu na migamba mienu (nyijabi yiri duna migamba mineni) biusiala o misiengi ami nyimaduvega. 20Ava Fumu oveyila baana bataji benu yivumu nana amaduveyila na jogu wogu bodila bulongu abu Fumu Nsambi enu obavega o disimu dina diJourdain, mbana dugabuga mutu mutu o disiala adi nyimaduvega.
21Vana temu eni nyimaveyila maruma ombu Josue na nyimavosa nandi rie: Gumalaba motsu ama Fumu Nsambi enu amavayila bakaga babeji baAmmon. Anana Fumu ovayila bakaga babufumu buotsu abu ndeʼ gutoyisa. 22Duyabaduma mu mbari Fumu Nsambi, jaʼ beni odutoyila.
Moise amagandusu ukota o bulongu buCanaan
23Va temu eni nyimasambilila Fumu dusambu duedudu rie: 24Fumu Nsambi ami gundasa buneni buagu na mangolu magu. Vagaa Nsambi aguvu dedi nagu o julu nesi va butamba agurungula usala bisalu abivu dedi na abi guisalingi. 25Kokolu tsiagu, nsingisi uvioga o disimu dina diJourdain uyelaba bulongu bueni buboti noyelaba mikongu mieni miboti na miLiban. 26Mu diambu dienu Fumu amandioyila tindi kabu te na asamagaru tumba amandiangila rie: Vana dedi! Guyamuevosa diambu diedina nami. 27Mata o julu mukongu uPisga, buaga misu o yiari ayi wisi ewendisini, nobanda, notandu no yiari ayi wisi epalili, nolabilila na misu magu: jaba rie: Gugosabuga Jourdain! 28Lonsa Josue nomuwarisa tindi umuwarisa. Jandi osabuga mujamba uJourdain va gusu batu bebaba nobadilisa bulongu abu gulabilila.
29Kabogu tumatsana o yibususu va nsungisini na Bet-Peor.
Currently Selected:
Migaga Mimatubula 3: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
