Migaga Mimatubula 2

1Jetu tumayenagabuga na tumawenda o kumu mu nsila jiMubu uBenga nana Fumu amaturumina; yitsingu yineni tumatsiengila mikongu miSeir.

Uvioga tuivioyi malongu maEdom na Moab na Ammon

2Yilumbu yimosi Fumu amansingula rie: 3Dumatsinga utsiengila yiari yieyiyi. Gabuganu o yiari yibanda. 4Lonsa batu malongi memama rie: Duwenda o mandilu mabaana bataji benu, bategula baEsau abetsani o Seir. Jogu boduduma: tumba kebananu. 5Duyabatumuna: ngodusingisa uwenda ne taka jimosi o bulongu buogu mu mbari nyimavega mikongu miSeir ombu bategula baEsau. 6Biguji abi duji duyebisumbanga, nesi mamba monu. 7Fumu Nsambi enu amadugabila miula na bisalu bienu biotsu na amajaba muendu enu o kumu jineni. Labanu magumana mabilima Fumu Nsambi enu avu nenu: dusamagambu na yima.

8Tumagonga baana bataji betu, bategula baEsau abetsanini o Seir, tumabusa nsila jikumu na jiElath na jiEssion-Gueber: mbana tumayenagabusila uvioyila o yiari yikumu tsiMoab. 9Fumu amakandisa rie: Guyatumuna bisi Moab na guyatoga divita nogu: ngoguvega ne yima yimosi o bulongu buogu mu mbari nyimavega bulongu buAr ombu bategula baLot

10(BaEmim bamaletsaninanga o bulongu buAr: bamabanganga na mangolu na bamaba bapuela bapuela; batu basasakama nderi bategula baAnac. 11BaEmim na baAnac bamanengulungu baRefaim tumba bisi Moab bamabanengilanga baEmim. 12Va dibandu baHori bamatsaninanga o Seir: bategula baEsau bamababinga te na bamababunga na bamayetsana va mbura ogu. BaIsrael bamavaga munongu mosi o bulongu abu Fumu amabavega.)

13Fumu amaruma rie: Tsie relimianu na sabuganu mujamba ugevi aguinengulungu Zered. Kabogu adina tumavaga. 14Yitsingu vimuendu etu ubandila o Cades-Bamea te na tumasabuga mujamba ugevi aguinengulungu Zered yimaba magumarieru na yinana yibilima te na dukula duotsu dubatoyitsi bamavita bamafu nana Fumu amaganina kaka. 15Fumu amababunga te na botsu bamafu.

16Botsu bana banofu 17Fumu amansingula rie: 18Namunyi duvioga mandilu maMoab te no bulongu buAr na dutola o yiari ayi baAmmon betsanini. 19Duyabatumuna na duyatoga nogu: mu mbari ngoduvega ne yima yimosi o bulongu buAmmon. Nyimavega bulongu bueni ombu bategula baLot.

20(Bulongu bueni bumakaluga bubaRefaim wandi: baRefaim bamalebutsaninanga na baAmmon bamabanengilanga Zamzummim. 21Bamabanganga na mangolu na bamaba bapuela bapuela; batu basasakama nana bategula baAnac. Fumu amababunga va misu mabaAmmon abamababinga na jogu bamayetsana va mbura ogu. 22Anana Fumu amavayila bategula baEsau abamatsananga o Seir ava amabungila baHori va misu mabaEdom abamababinga na jogu bamayetsana va mbura ogu avana bavu te na namunyi. 23BaAvie abamatsaninanga o mimbu te na Gaza bamabungu na batu abamaiambuyila o Kaftor abamayetsana va mbura ogu.)

24Mbana Fumu amamueruma rie: Relamanu yenawendanu na sabuganu mujamba ugeyi aguinengulungu Amon. Labanu nyimaduwakisa Sihon, kaga jiAmor agumatsananga o Hechebon na bulongu buandi. Bandanu ukinda na toganu divita nogu. 25Ubanda namunyi nyubanda unyavisa matamba menu ombu batu botsu te na bogaangu na keri na goma; ava bogululu diduma dienu boregama na bonyonganga.

Udila bedili bufumu buSihon

(Dut 21.21-30)

26Ava nyimabila o kumu ajinengulungu Quedemot nyimatinda bilumbi ombu Sihon kaga jiHechebon na bulumbi buduvotsu. Nyimaruma mutu umutsingula rie: 27Nsingisi uvioga o bulongu buagu; nyusungama mu nsila ajineni, ngopembuga nesi o mabaala nesi o magetu. 28Gukansumbisa biguji abi tuji na gukansumbisa mamba ama tunu; yika uvioga tuvioga. 29Adina bategula baEsau abamatsana o Seir bamansingisa na bisi Moab abamatsani-nanga o bulongu buAr wandi. Singisa dionyi dedi mosi yiri tusabuga Jourdain uwenda o bulongu abu Fumu Nsambi etu otuvega. 30Tumba Sihon, kaga jiHechebon asamaronda yiri tuvioyila va mbura andi; mu mbari Fumu Nsambi enu amagalisa tindi ugalisa murima andi yiri dudila bulongu buandi abuvu nenu te na namunyi. 31Fumu amansingula rie: Labanu namunyi nyiduwakisi Sihon na bulongu buandi. Kabogu avana tumabanda utoga. 32Sihon amayetubengusana na bagora bandi botsu uyetutoyisa o Yahas. 33Fumu Nsambi etu amatukagula, tumamubelisa; jandi na baana bandi bababaala na bagora bandi botsu. 34Kabogu tumabonga misiengi miandi miotsu na tumamibunga tindi ubunga nesi babaala nesi bagetu nesi baana bageyi, tsiri upatusa nesi umosi. 35Jetu tumakinda yika biruitsi na bisusu abi tumabola o misiengi. 36Ubandila o Aroer mu migula mimujamba ugeyi aguinengulungu Amon no musiengi aguvu o yibususu te no bulongu buGalaad vasamaba musiengi agusamabetsu. Fumu Nsambi etu amatuwakisa misiengi miotsu. 37Tumba tusamatola o yiari yibaAmmon nesi va migula miotsu mimujamba ugeyi aguinengulungu Yabboc nesi misiengi amivu o yiari yimikongu na mbura tsiotsu atsi Fumu Nsambi etu amatugandisa utumuna.

Currently Selected:

Migaga Mimatubula 2: PUU1992

Highlight

Copy