Migaga Mimatubula 4

Dululu dumigaga na maruma

1Moise amavosa rie: BaIsrael, tsie guluanu migaga na maruma abi nyidulonsi. Bikipianu mbana dugofu na dudila buiongu abuba abuenu abu Fumu Nsambi bataji benu oduvega. 2Duyabuesa mambu va julu manima ama nyimaduvega na duyagusula ne diambu dimosi wandi tumba dukipanga maruma maFumu Nsambi enu nana nyimadurumina. 3Jenu beni dumalaba adi Fumu amavaga mu diambu diBaal-Peor: Fumu Nsambi enu amabunga botsu abamakota o muyitsa uBaal-Peor. 4Tumba jenu adumakevega ombu Fumu Nsambi enu, jenu botsu duji monyu namunyi.

5Duijabi, nyimadulonsa migaga na maruma nana Fumu Nsambi ami amatumina yiri jenu dubikipanga o bulongu abuba abuenu. 6Dibikipanga tindi ubikipanga mu mbari abina biuduvega diela na dujabu va gusu batu abogulu migaga mieni miotsu na bovosa rie: Ka muna bulongu bu buvu na batu abavu na tindi diela na dujabu! 7Bulongu yi buvu na bansambi abavu nderi Fumu Nsambi etu oyitugulungu ava tuimunengilili? 8Bulongu yi buvu na maruma na migaga bisungama uviolila abi nyiduveyi namunyi?

Dulasu adumalasu o mukongu uHoreb

9Dimosi buandi, kebananu! Kelisanu mirima mienu na buranga yiri mambu ama dulabanga magolibunu na magotsiemuga, ne dimosi; malonsianu ombu baana benu nombu bategula benu.

10Rangiminanu yilumbu ayi dumarelama va gusu Fumu Nsambi enu o mukongu uHoreb! Fumu amansingula rie: Bambasana batu botsu ombu gami! Nyirondi ubagulusu maruma mami yiri bowiji unduma temu tsiotsu atsi botsananga va butamba; na yiri bomalonsanga baana bogu. 11Jenu dumakueka na dumarelama o banda mukongu, mukongu umalulanga na milutsu mimuji mimamatanga te no julu. Vamaba pisama na mamungi na yimbombi. 12Mbana Fumu amavosa nenu o gari muji: dumagulu yika ugulu diufi. 13Amatubula pangini andi aji amaduruma ukelisanga, diwendi rie: Yigumi yimigaga; amamisona mu mamanyi mabeji. 14Vana temu eni Fumu amatumina udulonsa migaga na maruma yiri dubikipanga o bulongu abu dudila.

Malubu mabakosi

15Diuleba dusamamulaba muna yilumbu ayi Fumu amavosila nenu mu muji o mukongu uHoreb, ne nana kelisanu mirima mienu na buranga. 16Duyavaga masumu uvala yibagunu yiyima yiotsu, nesi yikosi nesi yidibaala nesi yimugetu, 17nesi yiyibulu yiotsu va butamba nesi yitsoli tsiotsu 18nesi yiyibulu ayidutumuyi va tulu nesi yinyama tsimamba. 19Kelisanu mirima mienu yiri ava duibuayili misu o julu nolaba wisi na tsungi na bambuelili, diwendi rie: bijalala biotsu bijulu dugobikutimina nobiyitsa: bivu bima abi Fumu Nsambi enu amasingilila batu basusu va butamba. 20Tumba Fumu amadubonga na amadupalisa o Egypte amadufula o gari kangi yiri duba tindi batu bandi nana dukavu namunyi.

21Fumu amandioyila mu diambu dienu: amagana kaka yiri ngosabuga Jourdain na yiri ngotola o bulongu buboti abu Fumu Nsambi enu oduvega disiala. 22Kabogu nyufuila o bulongu buebubu, ngosabuga Jourdain: tumba jenu dusabuga na dudila bulongu bueni buboti. 23Kebananu yiri dugolibana pangini aji Fumu Nsambi enu amavangana nenu. Duyavala bibagunu bibima biotsu abi Fumu Nsambi enu amadugandisa, 24mu mbari Fumu Nsambi enu avu muji aguisielisini na avu Nsambi diwavi.

25Ava duburila baana aboduburila bategula, dunotsinga yitsingu yineni mu bulongu duyavaga disumu uvala bibagunu bibima biotsu na duyavaga amagaa mawelimina na Fumu Nsambi enu umunyoyisa. 26Pa duivayi masumu memama, nyigani kaka va misu mabisi julu na mabisi tsi rie: Dufu dusundila udutsiemusa o bulongu abu dudila o disimu dina diJourdain; dugotsinga mu mbari jenu botsu duguda tindi uguda. 27Fumu odupansa o malongu masusu na dusiala yika mua dikabu digeyi o mbura atsi Fumu odubega. 28Aguna duyitsa bansambi abamasalunu na batu, abavu bamuiri nesi bamamanyi abagorungula ulaba vo ugulu vo uji vo ufimbana. 29Avana wandi durombila Fumu Nsambi enu na dumulaba yika pa duimurombi na mirima mienu miotsu na mangolu menu motsu. 30Ava dulabila maguga mamunongu na munongu avana dugabuyila ombu Fumu Nsambi enu na dugulungu diufi diandi 31mu mbari Fumu Nsambi enu avu Nsambi aguvu na yingeba; agoduliyila nsima na agodubunga! Agolibana pangini aji amavangana na bataji benu aji amawarisa na pesi.

Maboti ama baIsrael bamadila

32Rangiminanu temu tsikala nesi yilumbu ayi Nsambi amasundila dibaala va butamba. Je ubandila o kodu mosi jijulu te na kodu jisusu vamalelabana diambu nana didi? 33Va batu abamagulu diufi diNsambi adimapalila o gari muji nana jenu dumadigululu na baki monyu? 34Je vamalabana nsambi ajimaweliga usola bulongu va gari bulongu bususu? Je va nsambi ajimasingisa mbangulu nesi bilimba nesi bimaga nesi divita? Je va nsambi ajimalasa mangolu mandi ava amadugusulu bisalu bineni na biranga nana Fumu Nsambi enu amaduvayila o Egypte? 35Jenu dumavagu bambeji bamambu meni yiri dujaba rie: Fumu avu Nsambi na vagaa nsambi jisusu. 36Amadugulusu diufi diandi o julu udulonsa umudedila: va butamba amadulasa muji andi uneni na dumagulu mambu mandi amamapalila muna. 37Amaronda bataji benu na amadusola, jenu aduvu baana bogu; na mangolu maneni jaʼ beni amadupalisa o bulongu buEgypte. 38Amadubingila malongu maneni amamaduviolila mangolu udukotisa o bulongu buogu yiri dubudila nana duilabili namunyi. 39Jabanu na tsiyisanu yiri Fumu avu Nsambi o julu na va butamba na vagaa nsambi jisusu yika jandi. 40Kipanganu migaga miandi na maruma mandi abi nyiduveyi namunyi yiri jenu na bategula benu dulabanga nsangu na dutsinga o bulongu abu Fumu Nsambi enu amaduvega.

Misiengi mirieru miusuemina o disimu dina diJourdain

41Mbana Moise amasola misiengi mirieru o disimu dina diJourdain o yiari ayi wisi epalili 42yiri miuba yisuemunu yibatu aboboka batu nogu yivelu tsiri uleditasa, abasamaleba bavinitsi bogu yiri borungula ukegobula ava boyesuemina o misiengi mieni. 43Miina mamisiengi mieni amama: Besser agumaba o kumu ombu baRuben; Ramot o Galaad ombu baGad; Golan o Bachan ombu baManasse.

Malongi mamubeji maMoise

(Uku 20.1-20)

44Moise amawakisa baIsrael migaga miNsambi. 45Diwendi rie: Malongi namigagana maruma abimavegu ombu baIsrael ava bamapalila o Egypte. 46Dimalabana o disimu dina diJourdain o yibususu va nsungisini na Bet-Peor o bulongu buSihon kaga jibaAmor agumatsananga o Hechebon agu Moise na baIsrael bamaboka ava bamapalila o Egypte. 47Bamadila bulongu buandi na abu Og kaga jiBachan wandi, (bakaga beni babeji baAmor bamakelisanga bulongu o disimu dina diJourdain,) 48o yiari ayi wisi epalili ubandila o Aroer va mugula umujamba ugeyi aguinengulungu Amon te no mukongu uSion, diwendi rie: Hermon, 49te na kumu jiotsu jidisimu dina diJourdain o yiari ayi wisi epalili te no Mubu uKali o banda mukongu uPisga.

Currently Selected:

Migaga Mimatubula 4: PUU1992

Highlight

Copy