Migaga Mimatubula 24

Mugetu agumabusu na dibaala

1Diurungula uba dibaala owela mugetu mbana yilumbu yimosi mugetu olabana na diambu diyisonyi na agomuelaba ubueji nandi; omusonina muganda uboka diwela na anomuwakisa uonyi omupalisa o ndagu andi. 2Mugetu opala o ndagu dibaala na oyenawenda, orungula uwelu na dibaala disusu. 3Pa dibaala dieni dimubeji diumubusa wandi omusonina muganda uboka diwela na anomuwakisa uonyi omupalisa o ndagu andi: vo pa dibaala dieni adimubeji ofu, 4mulumi andi utega agumamubinga agomuerungula umuwela mu mbari mugetu aka muinsi na dionyi divu nsoruru va gusu Fumu. Duyabasa bulongu mabi, abu Fumu Nsambi enu oduvega disiala.

Dibaala adibanowela

5Dibaala abanokota diwela ayawenda o utoga divita na bayamuvega yisalu yiotsu yisusu. Te na yilima yimfuimbila ojegusu utsana ulasanga ubueji ombu mugetu agu abanowela.

Tuga

6Bayavega mikuati tuga; mu mbari mionyi mivu tsongu mutu.

Mutu agumadaga mutu nandi

7Pa borasuna muisi Israel agumadaga mutu nandi na amamuvaga muviga andi vo amamusumbisa, mudayitsi eni aboku. Adina diutsiemusa dibi va gari enu.

Nyambi

8Kebananu na mapura manyambi tsiminongu na minongu novaganga motsu ama bisi Levi abavu bavagulitsi bapagu bodulonsanga; 9rangiminanu adi Fumu Nsambi enu amavayila Miriam mu nsila dunopala o Egypte.

Batuga basusu

10Pa dusombisa batu nenu yima yika la yima, jaʼ beni oduwakisa tuga, duyakota o ndagu andi uyegaanga koli; 11dukaba o gusu kana, jogu aba duisombisi boyiduvega tuga va gusu kana. 12Pa dibaala dieni avu yijaga na oduvega yijungi yiandi tuga, duyayilatsa ne yilumbu yimosi; 13dukamugabusila yionyi ava tsisiga yiri obundama na yionyi. Jandi odugabusila diboti; na Fumu Nsambi enu olaba dusungugu duenu.

Bijaga

14Duyakambisa basalitsi abavu bijaga ne pa bavu bamosi va gari batu nenu nesi benyi abetsani o bulongu buenu. 15Dukabavega futa tsiyilumbu yiogu nesi wisi ukatsima; bavu bijaga na bavu liyiyi utsiviva. Pa tsiri nana bodugamuyila Nsambi na duba na mbela.

Mutu mutu na dibi diandi

16Bagobokisa bataji mu diambu dimabi mabaana, na bagobokisa baana mu diambu dimabi mabataji; bobokisa mutu mutu mu dibi dijaʼ beni.

Adivu diwelimina na benyi na bisiana na bakuili

17Duyalasa benyi na bisiana maguga na duyabonga biduaru bibakuili tuga, 18dukarangimina yiri jenu wenu dumaleba baviga o Egypte na Fumu Nsambi enu amadupalisa; la dibandu nyiduveyili migaga miemimi yiri dumikipanga.

19Ava dutsonsiyila manungi menu pa dulibana mikundu mimosi o manungi duyagabuga uyemibonga: mionyi miuba mibenyi nesi mibisiana nesi mibakuili yiri Fumu Nsambi enu odugabilanga miula mu bienu biotsu. 20Ava dubinsila mioliva mienu duyamuedukilila mioliva amiusiala mu bitayi: mionyi miuba mibenyi nesi mibisiana nesi mibakuili. 21Ava duidokulili milunda mimfuga tsienu duyamuedukilila bisaga abiusialulu muna: bionyi biuba bibenyi nesi bibisianu nesi bibakuili. 22Dukarangimina yiri jenu wenu dumaleba baviga o Egypte; la dibandu nyiduveyili migaga miemimi, dukamikipanga.

Currently Selected:

Migaga Mimatubula 24: PUU1992

Highlight

Copy