Migaga Mimatubula 25

Mitsundu

1Diurungula uba baIsrael babeji bowenda ombu nsonsi uyetabululu bunsonsi: nsonsi owarisa ndunga jimungo ndunga, aguvu na diambu omuvega mbela. 2Pa mbela andi jilasi yiri adimbu, nsonsi omugudiga va tsi nomudimbusu va misu mandi, odimbu dutalu dutsilu aduba dedi na dibi diandi. 3Bayamudimba uviolila magumana matsilu mu mbari pa boviosulila umudimba duilasi yiri amalensu nenu.

Ngombi

4Duyagandisa ngombi uji ava erokili tsangu.

Mukuili agugaa na baana

5Ava baana bataji botsaninanga va mosi na umosi va gari ogu ofu tsiri usila baana, mugatsi umfumbi ayawelana na basusu nesi muenyi tumba nsaji andi omuwela, oba mugatsi andi mu mbari avu nsaji andi. 6Tsomi ogu olugu diina dimfumbi taji andi yiri diina diandi digotsiemuga va gari baIsrael.

7Pa dibaala dieni agerondi uwela nsaji andi mugetu owenda o dikotulu dimusiengi ombu bivunda uyevosa rie: Nsaji andi, agerondi ubialila diina dimuana nguji andi o Israel, agerondi ukwela na musuga ubunsaji. 8Bivunda bimusiengi bomunengila na bovosa nandi. Pa ewarisi kingu andi na evosi rie: Ngerondi umuwela, 9mbana nsaji andi okueka bebeli nandi va misu mabivunda omuvula duvondu duandi na omufuta mateji o yinsi. Mbana ovosa rie: Anana dibaala adiubusa ukelisa ndagu muana nguji andi olabila. 10O Israel ndagu andi jiunengulungu agumavula duvondu.

Bidimbu abimagandusu

11Diurungula uba yiri babaala bodimbasana na mugatsi udibaala dimosi owamusa mulumi andi nomupatula oyimudimbi. Pa ogaanga dibaala dieni mu bilema biyisonyi, 12dukatabula mugetu dikaka, duyamuiasa yingeba ne pesu.

Businganyi

13Duyaba na minongu mibeji mibipitsulu o komi tsienu, diwendi rie: ayivu yitsira na ayivu yilenga. 14Duyaba na minongu mibeji mibietsu o mandagu menu, diwendi rie: Ayivu yineni na ayivu yigeyi. 15Duba na bipitsulu na bietsu abivu bisungama. Mbana dubuesu bilumbu o bulongu abu Fumu Nsambi enu oduvega. 16Mutu uotsu oyikelisi bietsu biminongu na minongu evayi dibi na mutu eni avu nsoruru va gusu Fumu Nsambi enu.

Dubungu dubaAmalec

17Rangiminanu adi Amalec amaduvayila ava dumabila mu nsila ava dumapalila o Egypte. 18Asamaduma Nsambi, amayedutumuna mu nsila jiotsu, amadusutusu o nsima ava amagaangila botsu abesiti o nsima. 19Kabogu ava Fumu Nsambi enu odu wakila kalala ombu bavinitsi benu na oduvega duvotsu o bulongu abu oduvega disiala abuba abuenu, dukatsiemusa diina diAmalec. Duyadilibana!

Currently Selected:

Migaga Mimatubula 25: PUU1992

Highlight

Copy