Migaga Mimatubula 23

1Ne mutu mosi ayafubana yitsiga na mugatsi utaji andi mu mbari ulensa elensi taji andi.

Batu abogusulu o yibenguna yiFumu

2Dibaala adimakaluga muvangu vo adimanemusu ayasingu o yibenguna yiFumu. 3Muana agumaburu mu butsuari, jaʼ wandi ayasingu o yibenguna yiFumu: nesi te na dukula dumugumi, bayasingu guna.

4Bisi Ammon na bisi Moab bayasingu o yibenguna yiFumu, nesi te na dukula dumugumi bayasingu guna, 5mu mbari basamayedubengusana na biguji na mamba ava dumabila muna nsila temu aji dumapalila o Egypte. Va julu vana bamafuta Balaam muana uBeor, muisi Petor o Mesopotamie uduloga. 6Tumba Fumu Nsambi enu amabusa diufi diBalaam. Amadukalusila mulogu eni miula mu mbari Fumu Nsambi enu edurondi. 7Te na dufu duenu duyabawamusa na mambu maminongu na minongu.

8Duyagengila bisi Edom nderi bavu nsoruru; jogu bavu baana babataji benu; duyagengila bisi Egypte nderi bavu nsoruru mu mbari jenu wenu dumaleba benyi o bulongu buogu: 9baana bogu badukula dumurieru bosingu o yibenguna yiFumu.

Bugemfi o milaku

10Ava dutoyila divita na bavinitsi benu dunovaga milaku kekelisanu yiri dugonamu muinsi umambu mabi. 11Pa va gari enu vavu gora ajivu na muinsi mu mbari amapalisa tsangu tsiandi, jaʼ beni ogusuga va gari enu na ayagabuga nyangu o mulaku. 12Ava tsisiga obuila mbana wisi unotsima orungula ugabuga o mulaku.

13Jenu duba va jenu mbura ajiuba jikakana na mulaku, avana duwenda tsomu. 14Duba na bapelu mu mifuna aba dutimina yiduna nomuebidibiga pa dumamana tsomu. 15Fumu Nsambi enu elingi va mulaku enu udukelisa nowakisa bavinitsi benu ombu genu; kabogu diwelimina yiri mulaku enu uba ulioma yiri Fumu agolaba nsoruru jiotsu va mulaku enu na yiri agoduliyila nsima.

16Duyagabusa muviga ombu fumu andi agumayesuema ombu genu. 17Otsananga nenu va mbura aji jaʼ beni osola o misiengi mienu, mbura yika la mbura ajiumulasa ubueji; duyamukambisa.

18Vayaba yimbembu va gari baana babagetu baIsrael. 19Duyabega futa jiyimbembu nesi futa jibabaala abevayi dijamba na babaala nogu o ndagu Fumu Nsambi enu ayidugusu pangini yika la pangini; mu mbari botsu babeji bavu nsoruru va gusu Fumu Nsambi enu.

Mbika

20Duyaromba udila mbika ombu mutu nenu: nesi mbongu nesi biguji nesi yima yiotsu ayiwelimina ufuta na mbika. 21Durungula udila mbika ombu muenyi tumba dugojidilila ombu batu nenu yiri Fumu Nsambi enu odugabila miula mu bienu biotsu.

Bapangini

22Pa duivangini pangini na Fumu Nsambi enu duyatsikadana ujidugusu mu mbari Fumu Nsambi enu oduwivula jionyi, adina diuba dibi dienu. 23Pa dubusa uvangana pangini dugevayi dibi. 24Tumba dukakipanga nodugusungu pangini tsitondini atsi dumavangana na Fumu Nsambi enu.

25Pa dukota o gari manungi mabatu nenu durungula uji mirayisan te na dugukuru; tumba duyalongila maponsi menu. 26Pa dukota o gari manungi mable durungula utsidokula na makaka tumba duyasalisa mikuati utabula ble tsibatu nenu.

Currently Selected:

Migaga Mimatubula 23: PUU1992

Highlight

Copy