Migaga Mimatubula 19

Misiengi miusuemina

(Dut 35.9-28; Jos 20.1-9)

1Fumu Nsambi enu oboka bisi malongu mamosi uduvega mbura tsiogu; dunobabinga dutsananga o misiengi miogu no mandagu mogu, 2dukasola misiengi mirieru amivu o gari o bulongu abu Fumu Nsambi enu oduvega. 3Dukagaba bulongu abu Fumu Nsambi enu oduvega disiala makabu marieru na dukasala mansila wandi mbana mutu uotsu aguiboki mutu nandi odila nsila uvioga o misiengi miusuemina.

4Diruma dieni diugaanga mutu agusuema muna yiri agoboku mu mbari amabokisa mutu nandi yivelu tsiri uleditasa, asamaleba muvinitsi andi. 5Diurungula uba yiri dibaala amawenda o musiru uyeriaba mikansu, jogu na babaala nandi, obonga diumbi na obanda uwanga muiri: diumbi diusonsuga na diuyenamu mutu nandi nomuboka. Mbana orina o musiengi mosi va gari misiengi mieni yiri agoboku, 6mu mbari mugabusilitsi upila jimalungu anonyoga tindi unyoga oduka mutu eni na pa muendu uvu usakama mbe omudala mu nsila nomudimba te na agugaa uwelimina udila mbela dufu oboku, diuleba asamaleba muvinitsi andi. 7La dibandu nyidurumini diruma diedidi rie: Dukasola misiengi mieni mirieru. 8Ava Fumu Nsambi enu ojeyisila mandilu menu nana amavanginina na bataji benu noduvega bulongu buotsu abu amavangana uvega bataji benu, 9diwelimina yiri dukelisanga nokipanga migaga mieni miotsu ami nyiduveyi namunyi yiri durondanga Fumu Nsambi enu nodedilanga duganu duandi. Dukamuebuesa misiengi mirieru va julu mirieru amitega, 10yiri malungu mamutu agugaa na diambu magowitulu o bulongu abu Fumu Nsambi enu oduvega disiala na dufu dueni dugoba va julu miuru mienu.

11Tumba pa dibaala ovina mutu nandi nomurambila mirambu orelama umutoyisa te na omuboka mbana orina o musiengi umosi va gari misiengi mieni, 12bivunda bimusiengi andi biuyemugaangisa va musiengi eni na boyemuwakisa ombu mugabusilitsi upila jimalungu yiri aboku. 13Duyamulasa yingeba; tumba dukagusula mbela jimalungu ma-agugaa na diambu va gari baIsrael, mbana dulaba ubueji.

Bilimba bimandilu

14Duyakuekisa bilimba bimandilu bibatu nenu abi bataji benu bamasunsa o disiala adi dudila o bulongu abu Fumu Nsambi enu oduvega abuba abuenu.

Bambeji

15Bumbeji bumutu mosi bugaa buwelimina usingisila mutu agumavaga dineni vo disumu ne aji nana nyi; diambu digorungula utabulu te na bambeji babeji nesi barieru bolemana miunu.

16Ava mbeji jimfurulu ofuengilila mutu agu evini mu diambu dineni, 17babaala babeji abotumuna paga bolabana o Mbura Nsambi na va gusu bavagulitsi bapagu na bansonsi abosalanga va temu eni. 18Bansonsi boletsiyisa tindi utsiyisa diambu. Pa diulabana yiri mbeji eni avu mbeji jimfurulu na pa amafuengilila muana taji andi, 19dukamukilisa nana ditasa diandi dibetsili ukilisa muana taji andi. Adina diugusula dibi va gari enu. 20Basusu banodigulu bolaba goma na bagomuevaga diambu dimunongu eni. 21Duyalasa mungo mbela yingeba; vengu okilusu: disu na disu mosoga miuru, dinu na dinu mosoga miuru, dikaka na dikaka mosoga miuru, dikulu na dikulu mosoga miuru.

Currently Selected:

Migaga Mimatubula 19: PUU1992

Highlight

Copy