Migaga Mimatubula 20

Migaga mibugora

1Ava duwendila o utoga divita na bavinitsi benu na dulaba bakabala na makalu na batu bapuela uviolila jenu, duyabaduma; mu mbari Fumu Nsambi enu agumadupalisa o Egypte aji nenu.

2Ava dubambinina o utoga, muvagulitsi upagu olekueka novosa na bagora. 3Obatsingula rie: Bagora baIsrael guluanu! Namunyi dutoga na bavinitsi benu. Duyalaba goma, sunsanu mirima, duyaregama na duyakambulu va gusu ogu. 4Fumu Nsambi enu owendanga nenu ava dutoyila na bavinitsi benu, jandi oduwaka kalala.

5Bivunda bibagora bowivula bagora rie: Anyi amarunga ndagu jigona na asakajitsanina? Jandi aguna agabuyi o ndagu andi, pa oyefu o divita mutu ususu mbe obialila ndagu andi. 6Pa mutu va gari enu amavara nungi jimirayisan na asakagumbiyila digumba dinungi eni, agabuyi o ndagu andi, pa oyefu o divita mutu ususu mbe odokula mirayisan miandi, 7Pa dibaala amakuma mugetu tumba asakamuwela, agabuyi o ndagu andi, pa oyefu o divita dibaala disusu mbe owela mugetu eni. 8Bivunda bibagora bomuevosanga na batu rie: Pa vavu dibaala adilabi goma na elabi yiri agaa na bukidi, agabuyi o ndagu andi mu mbari baana bataji bandi bodetsu nandi. 9Yika bivunda bibagora bemani uvosa na bagora, boviosa bivunda bimabuli va gusu ogu.

10Ava dubambinina na musiengi agu duvu na ditasa upatula, dukalevosa diambu na bisi musiengi eni. 11Pa beduveyi kabusulu ji welimina na bedusingisi ukota, kabogu botsu abavu muna boba baviga benu. 12Pa bagesingi ukunsa diambu nenu na berondi utoga divita nenu kabogu dukakanda musiengi ogu. 13Fumu Nsambi enu anobawakisa ombu genu dukaboka babaala botsu; 14tumba dukabonga bagetu na baana na biruitsi na biotsu abiuba o musiengi eni, diwendi rie: biotsu abimakindu, durungula ujanganga abimakindu bibavinitsi beni abi Fumu Nsambi enu oduwakisa. 15Anana duvayila mu diambu dimisiengi miotsu amivu tindi vala nenu amigaa mibisi malongu ama dudila. 16Tumba mu misiengi mibatu beni aba Fumu Nsambi enu oduvega disiala dukaboka batu botsu. 17Dukaboka baHitt na baAmor na bisi Canaan na baPerizie na baHivie na baJebusie nana Fumu Nsambi enu amadurumina, 18yiri jogu bagodulonsa nsoruru tsiotsu atsi bevayingi na bansambi bogu na yiri dugovayila Fumu Nsambi enu dibi.

19Pa dutoyisa bisi musiengi yiri dubapatula uonyi nadivita diutsinga, duyawanga miri amiligu: durungula ujanganga milunda tumba duyamiwanga. 20Je muiri uvu mutu yiri dugutumuna? Dukawanga miri amigeligu: na mionyi durungisila bikadi ukotila o musiengi agu duitoyisi nodila bisi musiengi.

Currently Selected:

Migaga Mimatubula 20: PUU1992

Highlight

Copy