Migaga Mimatubula 18

Musuga ubategula Levi

1Bisi Levi abavu bavagulitsi bapagu na yifumba yiotsu yiLevi bagodila nesi dikabu nesi disiala va mosi na baIsrael basusu: bokusuyila mu pagu tsiunyensa tsiuyitsila Fumu na mu disiala diFumu. 2Bagodila disiala va mosi na baana bataji bogu: Fumu oba disiala diogu nana jaʼ beni amabatsingulila.

3Guluanu musuga ubavagulitsi bapagu, jogu abovagula pagu tsiunyensa, nesi ngombi nesi yindombu nesi yinsabi: bovega muvagulitsi upagu keri na ndaga na yifundu. 4Dukamuvega biumanga bitsangu tsible na bimalamu na bimatsi na bitega bimionyi mibindombu. 5Fumu Nsambi enu amasola bisi Levi va gari bifumba biotsu yiri bosala bisalu biandi, jogu na baana bandi bababaala te na mutubu.

6Pa muisi Levi ogusuga va musiengi umosi mu misiengi mienu, diwendi rie: mbura yika la mbura aji amatsanina o Israel nowenda o mbura aji erondi aji Fumu amamusolila, 7na osala yisalu yiFumu Nsambi andi dedi mosi na bisi Levi abavu baana bataji bandi, abesali o Mbura Nsambi 8odila dikabu diandi dibiguji adiuba dedi na adiogu na olaba nsangu: va julu vana oba na musuga usumbisa bibataji bandi.

Babiyitsi bamfurulu na babiyitsi bangensa

9Ava dutolila o bulongu abu Fumu Nsambi enu oduvega, duyagukiyila bisi malongu meni nowiji nsoruru tsiogu. 10Vayaba ne mutu mosi o mandagu menu agunyensa muana andi udibaala nesi umugetu na vayaba ne mutu mosi agukotisa banganga bamunongu na munongu o mandagu menu, 11vayaba ne mutu mosi oyifuami abeyitsi bayisi nesi aberesi nesi abevandi nesi abekelisi matengu. 12Mu mbari botsu abevayi mambu meni bevayi nsoruru va gusu Fumu na mu diambu dinsoruru tsieni Fumu Nsambi enu obingila bisi malongu yiri dumadila. 13Duba aba Fumu Nsambi enu.

14Mu mbari batu beni aba dubinganga bepingi baresitsi na bavanditsi; tumba Fumu Nsambi enu edugandisi motsu mana. 15Fumu Nsambi enu odupalisila mubiyitsi va gari baana bataji benu aguba nana menu: dukamugululu. 16Adi dumawivula Fumu o mukongu uHoreb yilumbu yiyibenguna ava dumavosila rie: Tuyamuegulu diufi diFumu Nsambi etu na tuyamuelaba muji eni uneni yiri tukefu. 17Fumu amansingula rie: Adi batsivosa diwelimina. 18Nyubapalisila mubiyitsi va gari baana bataji bogu aguba nana ndeju, jandi oposilanga na obatsingulanga motsu ama nyumurumanga. 19Pa mutu agogulu mambu mami ama oposilanga, meʼ beni nyumukilisa. 20Tumba mubiyitsi aguba na bukidi uposila adi nyisamamuruma uvosa vo aguvosila bansambi bangana, jandi oboku.

21Tanguji gukewivula rie: Tsie tujabila diambu diFumu? 22Ava mubiyitsi obiyila diambu adigolabana adina diuba diambu adi Fumu asamaruma. Mubiyitsi amadivosa na bukidi bujaʼ beni: duyamuduma.

Currently Selected:

Migaga Mimatubula 18: PUU1992

Highlight

Copy