Migaga Mimatubula 17

1Duyavagulila Fumu Nsambi enu nesi ngombi nesi yindombu nesi yinsabi ayivu na bifu bimunongu na munongu; mu mbari yivu nsoruru va gusu Fumu Nsambi enu.

2Diurungula uba yilumbu yimosi voba mutu o musiengi umosi va gari misiengi ami Fumu Nsambi enu oduvega, nesi dibaala nesi mugetu aguvaga adigaa diwelimina na Fumu Nsambi enu nokubula pangini andi; 3pa mutu eni oyitsa bansambi bangana uyebasalila nobakutimina, nesi wisi nesi tsungi nesi bambuelili; abi Fumu amagandisa 4yika duidijabi vo yika duidigulu dukamuketanga na buranga. Pa divu ngensa yiri dimavagu, diwendi rie: Nsoruru tsieni tsimalabana o Israel, 5mbana dukabega yeri dibaala yeri mugetu agumavaga dibi dieni te no dikotulu dimusiengi, dukamutindisa mamanyi te na dibaala dieni vo mugetu eni ofu.

6Bambeji babeji nesi barieru banomana miunu, agumavegu mbela aboku, ayaboku na bumbeji bumutu mosi. 7Bambeji boreyila umutindili mamanyi ava obokulu mbana batu basusu bomutindila mamanyi. Adina diutsiemusa dibi va gari enu.

Diambu diranga diutabululu o Mbura Nsambi

8Pa volabana diambu diranga adi dugorungula utabulu bunsonsi, pa divu diambu dibukongu nesi paga jimatumunu, nesi pura jimanemusu, dukawenda o mbura aji Fumu Nsambi enu amasola. 9Dukawenda ombu bisi Levi abavu bavagulitsi bapagu, nombu jandi agusala yisalu yibunsonsi; dukayelabana nogu na bodulonsa. 10Dukakelula adi bodulonsa o Mbura Nsambi; mbana dukabikipanga. 11Duyabusa ne mugaga umosi ne dilongi dimosi abi bodulonsa. 12Mungo dunangu oyibusi ugululu muvagulitsi upagu aguvu na yisalu yiFumu Nsambi enu vo nsonsi aguna aboku. Adina diutsiemusa dibi va gari baIsrael, 13mbana batu bogulu na bolaba goma na dunangu dutsiemuga.

Migaga mibukaga

14Ava dutolila o bulongu abu Fumu Nsambi enu oduvega na ava dubudilila, dunomana urunga mandagu menu duvosa rie: Tuirondi usola kaga nana divu o malongu amavu yiari na yiari. 15Kaga eni abi yika mutu agu Fumu Nsambi enu odusolila. Oba umosi va gari baana bataji benu; duyasola muenyi uba kaga enu. 16Ayakelisa bakabala bapuela na ayagabusa batu o Egypte uyesumba bakabala bapuela; mu mbari Fumu amadutsingula rie: Duyagabuyila muna nsila eni. 17Ayawela bagetu bapuela abomupembusa nsila: ayagukiga lora jivema na lora tsipuela tsipuela.

18Ava kaga odilila yitsiga yibufumu asoni migaga miemimi mu dibuku, omiwiji ombu bisi Levi abavu bavagulitsi bapagu. 19Diubanganga nandi na odiranganga te na dufu duandi mbana owiji uduma Fumu Nsambi andi nokelisanga nokipanga mambu motsu amamasonu mu dionyi. 20Adina diumugandisa ukematisa nolensa baana bataji bandi. Ayabusa udedila migaga mieni miotsu, mbana jogu na bategula bandi bababaala bobanganga bakaga baIsrael te na mutubu.

Currently Selected:

Migaga Mimatubula 17: PUU1992

Highlight

Copy