Migaga Mimatubula 16

Feta Paque

(Uku 23.14-17; 34.18-24)

1Rangiminanu tsungi nsumbi na janganga feta Paque uyitsila Fumu Nsambi enu; mu tsungi nsumbi Fumu Nsambi enu amadupalisila mukolu o Egypte. 2Dukavagulila Fumu Nsambi enu pagu jiPaque; diwendi rie: bindombu na binsabi na bangombi; dukabivagula va mbura aji Fumu osola ukelasa ombu genu. 3Va temu feta duyaji mapa amavu na dufunusu tumba te na yisambuali yibilumbu dujanganga mapa amagaa na dufunusu, diwendi rie: mapa mamaguga, mu mbari dumabingusu ava dumapalila o Egypte: anana diubila yiri durangimina mitsanu mienu miotsu te na dufu duenu yilumbu ayi dumapalila o Egypte. 4Bayarasuna dufunusu o mandagu menu nesi o bulongu buenu buotsu te na yisambuali yibilumbu; nesi nyama jiyibulu yipagu ayiuboku tsisiga jiyilumbu yitega, jiyasuegu te na kedi. 5Dugorungula uvagula pagu jiPaque va mbura yika la mbura aji Fumu Nsambi enu oduvega jiutsanina; 6tumba dujivagulila va mbura aji Fumu Nsambi enu osola ukelasa ombu genu, avana duvagulila pagu jiPaque ava tsisiga dedi na temu aji dumapalila o Egypte. 7Dukalambisa yibulu, dukayiji va mbura aji Fumu Nsambi enu osola. Ava kedi durungula uyenagabuga o mandagu menu mamatsanda. 8Mu bilumbu bisiamunu dujanganga mapa amagaa na dufunusu; yilumbu yimusambuali yiuba yiyibenguna yineni yiuyitsila Fumu Nsambi enu; duyasala ne yisalu yimosi.

Feta jibatsona

9Dukatala yisambuali yitsona; yika bebandi dutsonsugu duble dukabanda utala yisambuali yibatsona. 10Mbana dukavaga feta jibatsona na dukavagula pagu tsitondini nana Fumu Nsambi enu amadugabila miula. 11Duwenda na nsangu o mbura aji Fumu Nsambi enu osola ukelasa ombu genu, jenu na baana benu bababaala na babagetu na basalitsi benu bababaala nesi babagetu nesi muisi Levi nesi muenyi nesi bisiana nesi bakuili: botsu abotsananga nenu: 12Dukarangiminanga yiri dumaleba baviga o Egypte, dukakelisanga nokipanga migaga miemimi. 13Dukavaga feta jimasamba te na yisambuali yibilumbu dunotsonsiga ble tsienu na dunogama mirayisan. 14Dulaba nsangu va feta eni, jenu na baana benu bababaala nesi babagetu nesi basalitsi benu bababaala nesi babagetu nesi bisi Levi nesi benyi nesi bisiana nesi bakuili: botsu abotsananga nenu. 15Dukavaga feta jiuyitsila Fumu Nsambi enu te na yisambuali yibilumbu va mbura aji Fumu enu odugabila miula mu magumba menu motsu na mu bisalu bienu biotsu na dulabanga tindi nsangu.

16Kumbu yirieru yilima na yilima babaala botsu bokelasa va gusu Fumu Nsambi enu va mbura aji osola: diwendi rie: va feta jimapa amagaa na dufunusu na va feta jibatsona na va feta jimasamba. Bayalabana miogu na miogu va gusu Fumu. 17Mutu mutu obega pagu nana Fumu Nsambi enu omugabila miuia.

Migaga mibunsonsi

18Mu misiengi miotsu ami Fumu Nsambi enu oduvega dukasola bansonsi na bivovi muna bifumba bienu; jogu botabulilanga batu bunsonsi na dusungugu. 19Bujaga bumutu buyaduruma utsiemusa dusungugu duandi, duyagengila binsi bibatu na duyasinga milendu mu mbari milendu miveyi buduka ombu jogu abavu na malubu na mibivisi mambu mabatu basungama. 20Kipanga yika dusungugu buandi yiri dutsana sui nodila bulongu abu Fumu Nsambi enu oduvega.

Miyitsa amimagandusu

21Duyavaga ne kosi mosi va mugula uyinyensulu yipagu ayi durungila Fumu Nsambi enu. 22Duyavala bakosi: abana bavu nsoruru va gusu Fumu Nsambi enu.

Currently Selected:

Migaga Mimatubula 16: PUU1992

Highlight

Copy