Migaga Mimatubula 15

Miganu miusingululu mu yilima ayimusambuali

(Bilev 25.1-7)

1Kadi yilima yimusambuali dusingilila miganu. 2Guluanu nana gusingililanu miganu. Ava botubulila yilima yidujegusu na duyitsu musombitsi uotsu agumasomba mutu nandi osingululu miganu, agobakiga mutu nandi na muana taji andi umufutila muganu andi. 3Durungula ubakiga muenyi: tumba pa muana taji enu ana muganu nenu dukamusingilila uonyi.

4Dingensa va gari enu vagoba bijaga mu mbari Fumu odugabila miula o bulongu abu Fumu Nsambi enu oduvega disiala, 5dimosi buandi vengu dudedila diufi diFumu Nsambi enu nokipanga migaga miotsu na buranga ami nyiduveyi namunyi. 6Fumu Nsambi enu odugabila miula nana amadutsingulila yiri dusombisa bisi malongu mapuela tumba dugosomba: durumanga malongu mapuela tumba bisi malongu meni bagoduruma. 7Pa duna muana taji aguvu yijaga aguitsani va musiengi mosi o bulongu abu Fumu Nsambi enu oduvega, duyagalisa mirima mienu na duyawimina muana taji enu mu mbari avu yijaga. 8Tumba dukamugabilanga na dukamusombisa abi oba na nsala. 9Kebananu, duyaba na matasa mabi novosa rie: Yilima yidujegusu yika bebeli kebananu, duyabusa ulasa muana taji enu aguvu yijaga yingeba na duyamuwimina. Ogamuyila Fumu mu diambu dienu, adina diudurombisa dibi. 10Musombisi, duyadivaga na mifiotu; mbana Fumu Nsambi enu odugabila miula mu bisalu bienu biotsu biminongu na minongu. 11O bulongu buenu dubanganga bijaga, la dibandu nyiduveyili diruma diedidi rie: Duyawimina muana taji enu agumakambulu nesi aguvu yijaga.

Dujegusu dubaviga

12Pa muana taji enu aguvu Hebreu, nesi dibaala nesi mugetu okesumbisa ombu genu, odusalila bilima bisiamunu; tumba yilima yimusambuali dukamujeyisa. 13Ava dumujeyisila duyamuganina miogu na miogu; 14dukamugabila nesi yindombu nesi yinsabi nesi tsangu tsible nesi malamu; biotsu abi dudilila na miula miFumu Nsambi enu. 15Dukarangimina yiri jenu wenu dumaleba baviga o Egypte na Fumu Nsambi enu amadujeyisa: la dibandu nyiduveyili mugaga egugu.

16Pa baviga benu bodutsinguia rie: Tugerondi ugusuga mu mbari tuidurondi, jenu na bisi ndagu enu; tuji buranga nenu. 17Kabogu dukabonga mutobu, dukabatoba matuji va diguyi dindagu, boba baviga benu mutubu. Dukavaga munongu mosi na baviga benu babagetu.

18Duyalaba uvura ubajeyisa mu mbari bamadusalila bilima bisiamunu, mbe ka musalitsi mbe dumakefutila kumbu beji; Fumu Nsambi enu odugabila miula mu bienu biotsu.

Tsomi tsibibulu

19Dukawakisa Fumu Nsambi enu tsomi tsiotsu tsibalumi atsiuburungu mu migamba mibangombi nesi mibindombu nesi mibinsabi. Duyasalisa tsomi tsibangombi benu na duyafuga tsomi tsibindombu bienu. 20Yilima na yilima dukatsijanganga va gusu Fumu Nsambi enu, jenu na bisi mandagu menu va mbura aji Fumu osola. 21Pa yivu na yifu vo pa yipitsuyi vo pa yivu yidunga vo pa yivu na yifu yika la yifu duyayivagulila Fumu Nsambi pagu jiunyensa. 22Dukayijanganga o mandagu menu; jandi aguba muinsi na jandi aguba ulioma boji, botsu babeji nana bejangingi tsiesi vo kabi. 23Dimosi buandi duyaji nyama atsisakadekisa malungu; dukamapuga va tsi nana bepuyili mamba.

Currently Selected:

Migaga Mimatubula 15: PUU1992

Highlight

Copy