Migaga Mimatubula 14

Bifu bibukuili bimagandusu

(Bilev 11.1-47)

1Duvu baana baFumu Nsambi enu. Duyakenemisa na duyakefuga mavenda mu mbari dumabokisa abenu. 2Duvu aba Fumu Nsambi enu; na Fumu Nsambi enu amadusola yiri duba bulongu abuba tindi abuandi va gari malongu motsu.

Migaga mibibulu bilioma na bimuinsi

3Guyaji ne yima yiotsu ayivu nsoruru. 4Bibulu abi dujanganga abibi: ngombi na yindombu na yinsabi; 5na kabi na tsiesi na mbudi; na buketa na severayi na tsagama na sirafa. 6Dujanganga bibulu biotsu abivu na birodi na abivu na mungunga-taba. 7Tumba duyaji abivu na mungunga-taba buandi vo abivu na birodi buandi. Kabogu duyaji samo na dimbi na dama bavu na mingunga-taba tumba bagaa na birodi: dukabikipa muinsi. 8Duyaji ngulu, avu na birodi tumba agaa na mungunga-taba: dujikipa muinsi. Duyaji nyama tsiogu na duyabemba bibindi biogu.

9Guluanu banyama bamamba aba durungula uji: dujanganga botsu abavu na binyansa na magagala. 10Duyaji ne jimosi ajigaa na binyansa: dubakipa muinsi.

11Dujanganga batsoli botsu balioma. 12Aba duji ababa: mbira na orfera na mbira jimubu 13na miletsi mitsuyi na minongu miogu miotsu 14na kavanga na minongu miogu miotsu 15na mubamba na yibidu na yibura-kama na muletsi na batsoli botsu bamunongu eni 16na kukutu na sueta na sinya 17na yivuyisa-vengama na ngongu na yigula 18na sigonya na nsongi-dianga na batsoli botsu bamunongu eni na upa na yipungangembu.

19Bilandila biotsu nesi abipurumuyi nesi abiwendi na makulu, duyabiji. 20Dujanganga batsoli botsu balioma.

21Duyaji ne yibulu yimosi ayimafu yipingu: dukayivega ombu benyi abetsani nenu yiri boyiji vo dukayisumbisa benyi; mu mbari duvu aba Fumu Nsambi enu. Duyalamba muana yinsabi mu dile dunguji andi.

Migaga mi yimosi mu digumi

22Dukagusula yimosi mu digumi yibiotsu abi dugumbuyili o manungi menu yilima na yilima. 23Dukabiji va gusu Fumu Nsambi enu va mbura aji osola ukelasa ombu genu: yimosi mu digumi yitsangu tsible na malamu menu na matsi menu na tsomi tsibangombi benu na tsibindombu bienu na tsibinsabi bienu yiri duwiji uduma Fumu Nsambi enu temu tsiotsu. 24Diurungula uba yiri Fumu Nsambi enu odugabila miula na mbura aji Fumu Nsambi enu amasola ukelasa ombu genu jiuba vala, kabogu dulaba uvura usuvanga yimosi mu digumi 25la dibandu durungula usumbisa yimosi yienu mu digumi nokelisa mbongu te na dutola va mbura aji Fumu Nsambi enu amasola. 26Avana durungula usumba biotsu abi duronda, nesi bangombi nesi binsabi nesi malamu maminongu na minongu, diwendi rie: biotsu abiudulasa ubueji, dubijanganga va gusu Fumu Nsambi enu: jenu na mikuta mienu dulabanga ubueji. 27Duyalibana bisi Levi abetsani nenu mu mbari bagaa na dikabu nesi disiala nenu.

28Yilima ayimurieru dukasuega va mbura ajimasolu yimosi mu digumi yidigumba dienu. 29Bisi Levi abagaa na dikabu vo disiala va mosi nenu nesi benyi nesi bisiana nesi bakuili abotsananga nenu boyibijanganga te na bogukuru mbana Fumu Nsambi enu odugabila miula mu bisalu bienu biotsu.

Currently Selected:

Migaga Mimatubula 14: PUU1992

Highlight

Copy