Loma 9

O Kawas ato Nipili'an Ningra a Finawlan

1So'linay ko sowal ako. O ni Kristo kako. Saka, caay pisamangah kako. Mapafaloco' no Fangcalay 'Adingo ko nga'ayay a faloco' ako. Saka, so'linay caay ko misamangahay kako. 2-3Tadamararom kako a pa'ayaw to finacadan ako o pton ako. Saka, mararid a maksem ko faloco' ako. Ano ma'ka'kak no Kawas konini a tireng ako a mapaliyas ci Kristoan to nano pipa'ayaw ako cangraan o finacadan ako i, nga'ayto. 4O finawlan no Kawas cangra o Israil, o wawa Ako kamo han no Kawas cangra. Pahapinangen no Kawas cangra to 'dil Ningra. Matatlek ko Kawas ato cangra. Paflien no Kawas cangra to Rikec ato lkakawa to sakafana' nangra a mita'ong to Kawas. Malayapto nangra ko niktonan no Kawas a sowal. 5O tloc no iti:yaayho a tadamaanay a tato'asan a Israil cangra. Ano pakaynien i notamdawan ko sa'osi i, o finacadan nangra ci Kristo. Nanay mapahmek a tahada'oc konini a mikowanay to tahaf no kakarayan a Kawas#9.5 Nanay ... konini a mikowanay to tahaf no kakarayan a Kawas -- ano ^ca i, Nanay ci Kristo, oya mikowanay to tahaf no kakarayan a Kawas.. Amin.

6Awaay ko ^poc no niktonan no Kawas a sowal, caay ko nika saan ako. Caay ka ^min a o finawlan no Kawas ko Israil. 7Caay ka ^min a o wawa no Kawas ko tloc ni Apraham. Mato sowal no Kawas ci Aprahaman toya, <<Deng pakayni ci Isakan ko sakacitloc iso to nisowalan Ako i tisowanan,>> sanay. 8Caay ko no tamdawan ko pihofoc to malowawa no Kawas. O nano niktonan no Kawas to sowal a nihofocan ko so'linay a mamalowawa no Kawas to malotloc ni Apraham o sanay ako. 9Nawhani o niktonan no Kawas a sowal i, <<Ano maraodto ko romi'ad i,#9.9 Ano maraodto ko romi'ad i, -- ano ^ca i, onini a romi'ad to roma a mihcaan i. o mamiliyaw Kako a tayni. Itiya i, o mamahofoc ci Sara to ccay a fa'inayan a wawa,>> saan.

10Caay ka onini a ccay ko dmak no Kawas. O ccayay ko mama no tatosaay a fa'inayan a wawa ni Ripika, o wawa ni Isak o tato'asan ita. 11-12Nikawrira, o sapahapinangaw no Kawas to nafaloco'an Ningra a mipili' to ccay noya tatosaay a wawa saka, pasowal sa ko Kawas ci Ripikaan, <<O mamalokoli no safa ko kaka,>> saan. Yo caho ka hofocen cangra a tatosa, yo caayho pidmak to nga'ayay ato tatiihay cangra i, itiya a somowal ko Kawas tonini a sowal. Saka, o nafaloco'an no Kawas ko nido^doan Ningra a mipili'. Caay ko dmak noya wawa. 13Mato sowal a matilid i Fangcalay Cudad, <<Kaolahan Ako ci Yakop. Ka'osian Ako ci Isau,>> saan.

14Ano hatira i, o misakakinihay ko Kawas saan kita haw? Caay! 15Nawhani, o masowalayto Ningra ci Mosi, <<Ano cima ko kasini'adaen Ako a tamdaw i, kasini'adaen Ako. Ano cima ko kaadayayen Ako a tamdaw i, kaadayayen Ako,>> saan. 16Orasaka, caay ko nisafaloco'an ato nisa'icelan no tamdaw ko pi'arawan no Kawas a mipili'. Deng o nano sini'ada no Kawas ko sakapipili' Ningra. 17Mahaen ko sowal no Kawas i hongti no Icip a matilid i Fangcalay Cudad. <<O sakapipatireng Ako i tisowanan a palahongti i, o sapipahapinangaw Ako to 'icel Ako pakayni i tisowanan ta matnak ko nika tadamaan no ngangan Ako i polong no hkal,>> saan. 18Orasaka, ano cima ko kangalayan no Kawas a sini'ada i, kasini'adaen Ningra cingra. Ano cima ko kangalayan Ningra a misa'atkak i, sa'atkaken Ningra ko faloco' noya tamdaw.

O Kter ato Sini'ada no Kawas

19Ano hatira i, nawiro patorcek han no Kawas ko tamdaw hakiya? Cima ko pakapacoliay to nafaloco'an no Kawas saw? a saan kamo i takowanan. 20Idangaw, o masamaanay a tamdaw kiso iro pakapacoli kiso to Kawas saw? Manga'ay saw a somowal ko masanga'ay to, <<Nawiro haenen iso ko nipisanga' i takowanan?>> a saan a somowal i misanga'ay? 21Caay ka citodong ko misakorengay a misanga' nai ccay a dadita'an to tadamaanay a koreng ato kalokoreng saw?

22Malcad tonini ko dmak no Kawas. Sapipatalahkalan ko Kawas to kter Ningra a pahapinang to 'icel Ningra. Nikawrira, kodait ko Kawas. Hadidien Ningra ko kter Ningra toya nipatalaan Ningra a mamatkop a kakteran Ningra a lalosidan. 23O romasato, sapipatalahkalan Cingra to tadamaanay a 'dil Ningra i titaanan o nipalmedan Ningra a lalosidan, oya nipatalaan Ningra to mamikapot i Cingraan a malatadamaanay. 24Kita koya nipili'an no Kawas a tamdaw nai Yutaya a tamdaw, nai roma a finacadan to malofinawlan Ningra. 25Mato sowal no Kawas i cudad ni Hosiya,

<<Nao caay ko finawlan Ako i,

o finawlan Ako, wa han Ako.

Nao caayay ko kaolahan Ako a kitakit i,

o kaolahanto Ako a kitakit, wa han Ako.

26Itira i pipasowalan Ako cangraan toya caayto ko finawlan Ako kamo sanay i,

o papasowal Kako i cangraan itira to o wawato no ma'oripay a Kawas kamo wa han Ako cangra,>> saan.

27O pilkal ni Isaya a pasowal to pakayniay i Israil i, <<Ano hatiratira o tafok no riyar ko nika 'aloman no tloc no Israil i, caayto ka hakowa ko mama'orip. 28Nawhani o raranikay ko Tapang a milahci to nisahalakaan Ningra i tini i hkal a misawkit,>> saan. 29Mato sowal ni Isaya a pali'ayaw.

<<Ano caay ka 'osawen no Ci'icelay a Tapang ko tloc ita i, kona itiya aca kita a mapalcad to Sotom ato Komora,>> saan.

O Israil ato Nga'ayay Ratoh

30Ano hatira i, maanen ita ko sowal saw? Nao caay pilongoc ko roma a finacadan to sakanga'ay nangra a malayap no Kawas. Nikawrira, pakayni i piti'er nangra ci Kristoan a masanga' no Kawas ko sakanga'ay nangra a malayap no Kawas. 31'Arawhani o no finawlan no Kawas a Israil i, pakaynien nangra i pisa'icel a mido^do to Rikec ko pikilim nangra to sakanganga'ay nangra ato Kawas. Nikawrira, caay pakalahci cangra. 32Nawiro caay pakalahci hakiya? Nawhani caay pakaynien nangra i piti'er ci Kristoan ko pilongoc nangra. Pakaynien nangra i lalok to dmak saka, tahastol cangra i <<katahastolan a fokloh.>> 33Mato sowal a matilid i Fangcalay Cudad,

<<Tlien Ako i Cion ko micongeday a 'ongcoy to katahastolan no tamdaw.

Nikawrira, o mitadi'ecay i Cingraan i, caayto ko mamasefad ko faloco',>> saan.

Currently Selected:

Loma 9: AMIS2019

Highlight

Copy