Loma 10

1Salikakaaw, o longoc no faloco' ako a mitolon i Kawas to saki Israil a finawlan ako i, o sapa'oripaw no Kawas cangraan, caay pitolas kako a milongoc i Kawas tonini. 2Mipawacay kako to lalok nangra to saki Kawas. Nikawrira, caay ko nano fana' nangra konini a lalok. 3Nawhani caay ka fana' cangra to samaanen no Kawas ko pisanga' to sakanga'ay nangra a malayap no Kawas. Orasaka, toor han nangra ko nangra a harateng. Caay pica'dong cangra to no Kawas a dmak to sakanga'ay nangra a malayap no Kawas. 4Ci Kristo ko pahrekan no Rikec. Saka, manga'ay a malayap no Kawas ko polong no paso'linay a miti'er i ci Kristoan.

O Saki Polong no Tamdamdaw ko Pipa'orip no Kawas

5O sowal ni Mosi to pakayniay i nika nga'ay no tamdaw a malayap no Kawas ato nipido^do to Rikec i, <<O mido^doay to limo'ot no Rikec a tamdaw i, o caci'orip,>> saan. 6Nikawrira, o sowal a matilid i Fangcalay Cudad to pakayniay i nika nga'ay no tamdaw a malayap no Kawas ato pakayniay i piti'er ci Kristoan i, <<Cima ko tatangasa i kakarayan? aka ka saan a milicay.>> (Ano haenen namo i, malcad to mi^poday ci Kristoan.) 7O romasato, <<Cima ko mama^pod i kaitiraan no mapatayay? aka ka saan a milicay.>> (Ano haenen namo i, malcad to mipasadakay ci Kristoan nai kaitiraan no mapatayay.) 8O tatodong nonini a sowal i, ira i ngata iso ko sowal no Kawas. Ira i ngoyos iso, ira i faloco' iso sanay. Ano sahcien a somowal i, onini koya nipatnakan niyam a sowal to pakayniay i piti'er ci Kristoan. 9Ano patalahkalen iso i ngoyos ko nika o Tapang ci Yis ato o nipalowadan no Kawas a pa'orip nai patay Cingra, ano saan ko faloco' iso a paso'lin a miti'er i, o mamapa'orip kiso. 10Nawhani o nano piti'er no faloco' ita ci Kristoan ko sakanga'ay ita a malayap no Kawas. O nano nipipatalahkal ita i ngoyos ko saka mapa'orip no Kawas kita. 11O sowal no Fangcalay Cudad i, <<O miti'eray i Cingraan a tamdaw i, caayto ko mamasefad ko faloco',>> saan. 12O saki polong no tamdaw konini a sowal. Awaay ko kasasiroma to Yutaya a tamdaw ato roma a finacadan. Oyanan a Kawas ko Tapang no tamdamdaw. Tadamaanay ko pipalmed Ningra to polong no mitahidangay a milongoc i Cingraan. 13O sowal a matilid i Fangcalay Cudad i, <<Ano cimacimato ko milongocay to ngangan no Tapang i, caay ka ^ca o mamapa'orip,>> saan.

14Nikawrira, ano caayho paso'lin cangra to Tapang i, samaanen nangra ko pitahidang a milongoc i Cingraan hakiya? Ano caayho ka tngil nangra ko sowal no Kawas i, samaanen nangra ko pipaso'lin ci Kristoan hakiya? Ano caay patnaken i, o maan ko tatngilen nangra hakiya? 15Ano awaay ko miocoray i, cima ko papatnak hakiya? Mahaen ko nika tilid i Fangcalay Cudad, <<Wata: ko nika kapah a nengnengen ko romakatay a patnak to Nga'ayay Ratoh!>> saan. 16Nikawrira, caay ka ^min ko tamdaw a milayap to Nga'ayay Ratoh. Mato sowal ni Isaya i Fangcalay Cudad, <<Tapangaw, cima ko paso'linay to nipatnakan niyam saw?>> saan. 17Orasaka, o nano nitngilan no tamdaw to sowal no patnakay ko sakapiti'er ci Kristoan. O nano nipatnakan to pakayniay ci Kristoan a sowal ko sakaira no tatngilen.

18Nikawrira, cilicay kako, so'linay caho pakatngil cangra to Nga'ayay Ratoh hakiya? Caay, namatngilto nangra. Mato nika tilid i Fangcalay Cudad,

<<Maldef i polong no hkal ko sifana' nangra.

Tahira i tolas no hkal ko sowal nangra,>> saan.

19Cilicay haca kako. So'linay caay ka fana' ko Israil hakiya? O sa'ayaway a sasowalen ako i, o nano sowal ni Mosi toya,

<<O dmak no caayho ko 'osi a kitakit a finacadan ko sapalowad Ako to sakaci'inap no finawlan Ako.

O maapaay a finacadan ko sapalowad Ako to kter no finawlan Ako,>> sanay.

20Mangalef ko ni Isaya a sowal to nano sowal no Kawas toya,

<<Oya caay pikilim i Takowanan a tamdaw ko pakatamaay i Takowanan.

O caayay pilongoc i Takowanan a tamdaw o pa'arawen Ako to tireng Ako,>> sanay.

21Nikawrira, pasowal cingra to nano sowal no Kawas to pakayniay i Israil, <<Misaromi'ad Kako a milaya' to kamay a pasayra i caay pitoor a pacoliay a finawlan a mihamham to pinokay nangra,>> saan.

Currently Selected:

Loma 10: AMIS2019

Highlight

Copy