Loma 8

O 'Orip no Makowanay no Fangcalay 'Adingo

1Anini sato, o malaccayay aci Kristo Yis a tamdaw i, caayto ka pastek i raraw. 2Nawhani o pafliay to 'orip a Fangcalay 'Adingo pakayni i nika laccay ita aci Kristo Yis ko mitdalay titaanan#8.2 titaanan -- ira i roma a katlangay a cudad a matilid, tisowanan. nai sapalit no raraw ato patay. 3Tadanca ko tireng ita. Saka, caay pakalahci ko Rikec ni Mosi a miliyaw to pinangan ita. Nikawrira, o Kawas ko milahciay tonini a dmak. Ma'osi ko Kawas to pinangan no tamdaw. Saka, i tinien Ningra i niocoran Ningra a Wawa ko pipahapinang a mipastek i raraw to pinangan no tamdaw. Orasaka, matiya sa o ciraraway#8.3 matiya sa o ciraraway -- ano ^ca i, milcad to ciraraway a no hcian a tireng ita. ko pinangan no Wawa Ningra. Onini i, o sapipalasawadaw Ningra to raraw. 4Haenen no Kawas ko pilahci to lalahcien no Rikec a dmak. Ta maliyaw ko pinangan ita. Caayto pido^do kita to pinangan ita. Nawhani dengto o Fangcalay 'Adingo ko nido^doan ita. 5O mitooray to pinangan no tireng i, makowan no 'anof no tireng ko faloco' ningra. O mitooray to faloco' no Fangcalay 'Adingo i, makowan no Fangcalay 'Adingo ko faloco' ningra. 6O makowanay no pinangan no tireng i, o patay ko pahrekan. O caci'orip, o rarihaday ko makowanay no Fangcalay 'Adingo. 7Mala'ada no Kawas ko mipaci^ciay a mitoor to pinangan no tireng. Nawhani caay pido^do cingra to Rikec no Kawas. So'linay caay pakado^do cingra. 8O romasato, caay pakapalipahak to Kawas ko mipaci^ciay a mitoor to pinangan no tireng.

9Nikawrira, ano so'linay ira ko 'Adingo no Kawas a maro' i faloco' namo i, caayto pitoor kamo to pinangan no tireng namo. O mitoorayto kamo to faloco' no Fangcalay 'Adingo. O awaay ko 'Adingo ni Kristo i, caay ko ni Kristo cingra. 10Ano ira ci Kristo a maro' i tamowanan i, talacowa o mamapatay ko tireng namo tona ciraraw kamo, nikawrira, mapa'orip no 'Adingo no Kawas kamo#8.10 mapa'orip no 'Adingo no Kawas kamo -- ano ^ca i, o mama'orip ko 'adingo namo.. Nawhani o mipalamo^celanto no Kawas a tamdaw kamo.

11O palowaday ci Yis Kristoan a pa'orip nai patay ko 'Adingo no Kawas. Ano ira i faloco' namo a maro' ko todong no tireng nonini a 'Adingo i, pakayni tonini a Fangcalay 'Adingo ko pipalowad no Kawas a pa'orip to mamapatay a tireng namo.

12Orasaka, salikakaaw, o citadahay kita. Nikawrira, caay ko pinangan no tireng a tadah, ano hatira i, o mamapa^kel no pinangan no tireng ko 'orip ita. 13Ano mitoor kamo to pinangan no tireng i, o mamapatay. Ano pakaynien namo i Fangcalay 'Adingo ko pipatay to mararaway a dmak i, o mama'orip kamo. 14O makriday no 'Adingo no Kawas a tamdaw i o wawato no Kawas. 15Nawhani caay ko patalaway tamowanan a palakoli ko 'Adingo no Kawas, o saka malawawato no Kawas kamo. Pakayni tonini a Fangcalay 'Adingo, a milongoc kita to Kawas, <<Ama: Wamaaw!>> sanay. 16O 'Adingo no Kawas ko mikapotay to 'adingo ita a pahapinang to nika o wawato no Kawas kita. 17Tona o wawato no Kawas kita saka, o mamilayap kita to nipatalaan no Kawas a sapalmed to finawlan Ningra. O romasato, o mamikapot kita ci Kristoan a milayap to rarocoken Ningra. Ano mikapot kita i ci Kristoan a mapades i, o mamikapot kita i Cingraan a malatadamaanay.

O Aira a Sakatadamaan

18O harateng ako i, ona pades ita anini, caay ko papasasotiri'en atoya mama'araw ita a 'dil no Kawas to nika tadamaan Ningra. 19Hinatala ko masanga'ay a maamaan to sapipatalahkalaw no Kawas to wawawawa Ningra a pahapinang. 20O sakalahorac no masanga'ay a maamaan i, caay ko naira a faloco', o nano nafaloco'an no Kawas. Nikawrira, iraho ko pafaloco'an naira o masanga'ay. 21Ano hakowaay i, caayto ka pa^kel no mamaponi' canira o masanga'ay. O mamikapotto canira to tadamaanay a 'orip no wawa no Kawas a mapakonira. 22Mafana' kita, tahanini a tomangic a ma^min ko masanga'ay a maamaan a matiya o ma'at'atay a misemsem. 23Caay ko masanga'ay a maamaan a ccay ko mapadesay. Halo ita o milayapay to sa'ayaway a sapafli no Kawas a Fangcalay 'Adingo a tomangic ko faloco' a mitala to sakalawawaaw no Kawas to sakatdalaw no tireng. 24Pakayni i pipaso'lin ita tonini a caay ka 'araw ita a dmak ko sakapipa'orip no Kawas titaanan. Nikawrira, caay ko ma'araway ko pafaloco'an ita. Nawhani awaay ko halamhamay a mitala to ma'araway. 25Ano mitala kita to caay ka 'araw a dmak i, sakodait han ita ko faloco' a mitala tonini.

26Mahaen ko Fangcalay 'Adingo a mipadama to nika tadanca no mita. Caay ka fana' kita to samaanen ko nga'ayay a pitolon. Nikawrira, patado saan ko Fangcalay 'Adingo i titaanan a mitolon i Kawas. Pakaynien Ningra i caay ka talahkal i ngoyos a tangic ko pipatado Ningra a mitolon. 27O mita'selay a minengneng to faloco' no tamdaw a Kawas i, mafana' to harateng no Fangcalay 'Adingo. Nawhani matatodong i nafaloco'an Ningra ko pipatado no Fangcalay 'Adingo a mitolon to saki finawlan Ningra.

28Mafana' kita, patatodongen no Kawas ko kalodmak, to sakanga'ay no maolahay to Kawas a matahidangay Ningra a tamdamdaw a malaci^pocay ko dmak a ma^min.#8.28 patatodongen no Kawas ... malaci^pocay ko dmak a ma^min -- ano ^ca i, o Kawas ato maolahay i Cingraan a tamdamdaw, oya nido^doan Ningra to nafaloco'an a mitahidang, a malaccay a matayal, to saka ci^poc no dmak a ma^min -- ano ^ca i, o roma a lolod i, malasakanga'ay no kalodmak, i maolahay to Kawas a tamdaw, oya nido^doan Ningra to nafaloco'an a mitahidang a tamdaw, o ci^pocay ko dmak a ma^min. 29Nawhani oya nili'ayawan no Kawas a mipili' a tamdaw i, li'ayawen Ningra a micidek to mamiringi to Wawa Ningra. Ta o sakakaay a Wawa ci Yis i 'alomanay a salikaka. 30Oya nipalacidekan Ningra a tamdaw i, tahidangen Ningra. Oya nitahidangan Ningra a tamdaw i, sanga'en Ningra ko sakanga'ay noya tamdaw a malayap no Kawas. Oya nilayapan Ningra a tamdaw i, papikapoten Ningra i nika tadamaan Ningra.

O Pipatalahkal ci Yisan to Olah no Kawas

31Ano hatira i, samaanen ita ko kasomowal saw? Ano i tini i titaanan ko Kawas a midama i, cimaho ko mamisa'ada i titaanan saw? 32Caay ka 'idi ko Kawas a pafli i titaanan to Wawa Ningra. Kinafalah Cingra tonini to saki titaanan. Saka, o mamahaen a caay ka 'idi Cingra a pafli i titaanan to polong no maamaan. 33Cima ko mamipakokot to nipili'an no Kawas a tamdaw saw? Nawhani, o awaayto ko raraw namo han no Kawas cangra. 34Ano hatira, cimaho ko mamipastek to raraw nangra saw? Caayay ka ci Kristo Yis! O nano mapatayayto Cingra, nikawrira ano so'linen ko sowal i, o lomowadayto Cingra a ma'orip nai patay, ira i matini i kawanan no Kawas Cingra, oya mipatadoay i titaanan a mitolon i Kawas! 35Mahaenay saka, ano o padesto, ano o pisemsemto, ano o pikari'angto, ano o cahiwto, ano o nika lapakoyocto, ano o katalawanto, ano o patayto i, caay pakapalacinowas titaanan nai olah ni Kristo. 36Mato nika tilid i Fangcalay Cudad,

<<O nano miso ko saka saromi'ad sa kami a misi'ayaw to patay, samatiya sa o papacoken a siri kami,>> saan.

37Ano i tinitini kita i laloma' no matiniay a pades i, pakayni toya maolahay titaanan a Tapang ko sakapakalowid ita tonini. 38Ci'icel ko faloco' ako a paso'lin. Ano o patayto, ano o nika 'oripto, ano o coyohto, ano o aniniayto, ano o a irato a mikowanay i kakarayan a kawakawas, 39ano o i fafaedayto no hkal, ano o i lalinikayto no hkal a masanga'ay a maamaan i, awaay ko pakapaliyasay titaanan nanitini tonini a nipatalahkalan no Kawas i Tapang ita ci Yis Kristoan a olah Ningra.

Currently Selected:

Loma 8: AMIS2019

Highlight

Copy