'Olic 49
49
O Apa no Miti'eray to Dafong
O nitilidan no tloc no ngasaw ni Korah a 'olic. Mapatorod i kakridan no paradiway.
1Kamo o kasafinawlan a ma^min pitngil.
Kamo o i hkalay a tamdaw pina'on.
2Kamo o cidafongay ato pakosiya a tamdaw pitngil.
3O sasomowal kako to sakacitaneng a sowal,
o miharatengay to sakafana' to dmak ko faloco' ako.
4O mitngilay kako to tinako a sowal,
pahaklongen ako to soni no datok ako ko pitadtad to tatodong nira.
5-6Yo mapades kako a malikot no tatiihay a miti'eray to payso ato malita'angay to dafong a misamsamay i takowanan a 'ada i, caay ka talaw kako.
7Awaay ko papakafilo a tamdaw a micakay to tireng a patatikol,
caay ko mama^deng cingra a micakay to 'orip no tireng i Kawas.
8Nawhani tadamatkes ko 'aca no 'orip no tamdaw,
caay ko papakafilo a pa'aca ko tamdaw.
9Ano mana'ana'ay ko tamdaw a micomod i tadem i,
ma^deng a caay ka patay a tahada'oc?.
10Nengnengen, ano maapaayto ano mafokilayto i, mapatayto,
halocitanengay a tamdaw a malcadto a mapatay,
siday han nangra a ma^min ko dafong i tloc nangra.
11Talacowa ira ko sra nangra nikawrira,
o tadem ko mida'ocay a loma' nangra,
o a itira cangra a maro' a tahada'oc.
12Caay ko nika cidafong ato nika tadamaan no tamdaw ko saka^ca ka patay ningra,
o mamalcad cingra to 'a'adopen a mapatay.
13Nengnengen, samaanay ko miti'eray to tireng ningra a tamdaw,
nengnengen ko pahrekan no marihakeday to dafong no tireng a tamdaw.
14Malcad to siri a mapastekto a o tatayra i kaitiraan no mapatayay cangra,
o patay ko mamidipot i cangraan.
O mamapohed ko tireng nangra i kaitiraan no mapatayay,
yo ta^ngad sato i, malowid no mo^celay a tamdaw cangra.
15Nikawrira, o papa'oripen no Kawas kako,
o papa'oripen Ningra kako a paliyas nai sakowan no patay.
16Aka ka rawraw ko faloco' iso a minengneng to nika cidafong no tao a macakat ko 'orip.
17Ano mapatay cingra i, caay pihawikid to maan aca,
caay pihaklong i cingraan a talatadem ko dafong ningra.
18Ano rahkehker cingra to nika lmed no 'orip ningra,
ano makahmehmek no tao ko nika cakat no tayal ningra i,
19o mamilcad cingra to tato'asan ningra a mapatay,
caayto ko mamiliyaw cingra a paka'araw to ta^ngad a tahada'oc.
20Caay ko nika cidafong ato nika tadamaan no tamdaw ko saka^ca ka patay ningra,
o mamalcad cingra to 'a'adopen a mapatay.
Currently Selected:
'Olic 49: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
