'Olic 48
48
O Cion a Niyaro' no Kawas
O nitilidan no tloc no ngasaw ni Korah a 'olic, o ccay no radiw.
1O satadamaanay ko Tapang,
i fangcalay a lotok i niyaro' Ningra, saka, o papahmeken ita Cingra o Kawas ita.
2Makapah a takaraw ko kasataporo no Cion a lotok no Kawas,
o kalipahakan no kasafinacadan,
ko niyaro' no tadamaanay a hongti.
3I tini i pisitaraan no niyaro' a pahapinang ko Kawas to nika o piki'adingan Cingra.
4Masakapot ko hongtingti a tayni a milood to Cion a lotok.
5Ma'araw nangra konini a niyaro' i, mackok cangra a matoled,
saka, alapkapkaw sato cangra a milaliw.
6Tona matalaw cangra saka, marpetto cangra,
samatiya sato o ma'at'atay a fafahiyan ko nipisemsem nangra,
7matiyato o nistolan no naniwaliay a fali a matastasay a cifar cangra.
8Oya nao matngilay ita to hatiniay a dmak no Kawas i,
ma'arawto ita i matini i niyaro' no mikomoday a Tapang a Kawas ita,
o dadipoten Ningra a tahada'oc konini a niyaro'.
9Kawasaw, i tini i Fangcalay Pita'ongan Iso a miharateng kami to mida'ocay a olah Iso.
10Pahmek i Tisowanan ko polong no hkal a tamdaw,
mapatnak i tahaf no kakarayan ko ngangan Iso.
O mo^celay ko pikowan Iso,
11nanay lipahak ko tamdamdaw no Cion a lotok.
Nanay lipahak ko niyaroaro' no Yuta,
nawhani o mo^celay ko pisawkit Iso.
12Rakaten a mitaliyok ko Cion,
sa'osien ko pikacawan no niyaro' nira,
13hapinangen a minengneng ko 'adipel no niyaro' ato pisitaraan nira,
ta ira ko sasowalen namo i tloc namo,
14<<Onini a Kawas i, o Kawas ita a tahada'oda'oc,
o mamikrid Cingra to kasarayray no tlotloc ita,>> saan.
Currently Selected:
'Olic 48: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
