'Olic 37
37
O 'Orip no Tatiihay ato Nga'ayay a Tamdaw
O 'olic ni Tafiti.
1Aka ka roray a miharateng to tatiihay a tamdaw,
aka ka 'inal to caay ka mo^cel ko dmak a tamdaw.
2O mamatiya o rngos a kalamkam a ma'icang cangra,
o mamatiya o hana a marasras a malasawad cangra.
3Orasaka, ti'eren ko Tapang, ka o nga'ayay ko dmak,
ta marihaday kamo a maro' tonini a sra.
4Pipasayra i Tapang a milongoc to sakalipahak,
ta paflien Ningra kiso to kangalayan iso.
5Patoroden i Tapang ko tireng iso,
ti'eren Cingra, ta padamaen Ningra kiso.
6O sasamatiyaen Ningra o matdiay a likat ko nika lalen no dmak iso,
o sasamatiyaen Ningra o cidal to kalahokan ko nika mo^cel no dmak iso.
7Kasinanot ko faloco' a miti'er to Tapang, kakoda'it ko faloco' a mitala i Cingraan,
aka ka roray a miharateng to nika cakat no 'orip no tao,
aka ka ngaliwngiw to nika lahci no tatiihay a dmak nangra.
8Aka ka kter, aka ka firang,
aka ka roray ko faloco' iso a miharateng,
nawhani caay ko sakaci^poc iso o sakatatiih iso konini.
9O miti'eray to Tapang i, o rarihaday ko aro' nangra tonini a sra,
nikawrira, o mamalaplap ko tatiihay a tamdaw.
10Ccay a mlet, o mamalasawadto ko tatiihay a tamdaw,
ano tayra kiso a mikilim i, awaayto a matama iso cangra.
11Nikawrira, o po^neray ko faloco' a tamdaw i,
marihaday ko aro' nangra tonini a sra,
o rarihaday cangra a malmed ko 'orip.
12Misahalaka ko tatiihay a tamdaw to sapikari'angaw to mo^celay a tamdaw,
kelkel sato wadis a matlii cingra.
13Nikawrira, matawa ko Tapang to tatiihay a tamdaw,
nawhani mafana' Cingra to nika mangatato ko sakatkopaw nangra.
14Mihodoc to fonos, minayat to focol no pana' ko tatiihay a tamdaw to sapikari'angaw to pakosiya
ato tadancaay a tamdaw ato sapipatayaw nangra to mo^celay a tamdaw.
15Nikawrira, o fonos nangra ko mamicocok to faloco' nangra,
o mamapitek ko pana' nangra.
16Ano caacaay ka hakowa ko nitatoyan no mo^celay a tamdaw,
nikawrira, ikaka no nika adihay no nitatoyan no tatiihay a tamdaw ko nika adihay no dafong ningra.
17Nawhani o papiteken no Tapang ko patlaw no tatiihay a tamdaw,
o dadipoten Ningra ko mo^celay a tamdaw.
18Dipoten no Tapang ko mangodoay Cingraan a tamdaw to romi'ami'ad,
o mamalonangrato a tahada'oc konini a sra.
19Ano kapadesanto nangra i, caay ka maan cangra,
ano kakdalanto i, o mamafcol cangra.
20Nikawrira, o misa'adaay to Tapang i,
o mamatiya o hana no pala a marasras,
o mamatiya o 'acfel cangra a malahdaw.
Saka, o mamatkop ko tatiihay a tamdaw.
21O tatiihay a tamdaw i, caay patikol to nicaliwan nangra,
nikawrira, o mo^celay a tamdaw i, maolah a padahof.
22O mapalmeday no Tapang a tamdaw i,
o rarihaday a maro' tonini a sra,
nikawrira, o ni'kakan no Tapang a tamdaw i,
o mamalaplap cangra a mapasadak.
23O Tapang ko mikriday to tamdaw a pasifana' to dado^doen ningra
a lalan,
dipoten Ningra ko rakat no mitooray Cingraan.
24Ano matolotolo' cingra i, ma^dengho cingra a lomowad,
nawhani padamaen no Tapang cingra a palowad.
25Nano ka^mangan ako a tahanini i nika to'as ako i,
awaho a ma'araw ako ko mafalahay no Tapang a mo^celay a tamdaw,
awaayho a ma'araw ako ko miki'a'amay a wawa nangra.
26O halipadahofay ko mo^celay a tamdaw,
caay ka 'idi cingra a pacaliw i taowanan,
saka, o mamalmed ko wawawawa nangra a ma^min.
27O laliyasen namo ko tatiihay a midmak to nga'ayay,
ta mida'oc ko wawawawa namo a maro' tonini a sra.
28Nawhani maolah ko Tapang to mo^celay a dmak,
caay pifalah Cingra to so'linay a mitoor a finawlan Ningra.
Dipoten Ningra cangra a tahada'oc,
nikawrira, laplapen Ningra ko wawawawa no tatiihay a tamdaw.
29O cacisra ko mo^celay a tamdaw,
o rarihaday ko kasarayray nangra maro' tonini a sra.
30O sakacitaneng ko sowal no mo^celay a tamdaw,
sahto o mo^celay ko sowal ningra.
31Ira i faloco' ningra ko rikec no Kawas,
saka, caay ka tahoriyac ko wa'ay ningra.
32Misa'imer ko tatiihay a tamdaw to sapipatayaw to mo^celay a tamdaw.
33Nikawrira, caay pifalah ko Tapang i cingraan a patorod i 'ada,
ano pisawkitan i, caay pasteken Ningra cingra i raraw.
34Kahalamham a hinatala to Tapang, ka'imer a mido^do to limo'ot Ningra,
ta paflien Ningra kamo to 'icel to mamirocek tora sra,
o mama'araw haca iso ko tatiihay a tamdaw a malaplap.
35Ma'araw ako ko ccay a mari'angay a tatiihay a tamdaw,
matiya o lahad no fidngal no Lipanon ko nika lahad no tatiihay a tamdaw.
36Nikawrira, yo miliyaw kako a pakayra i, malahdawto cingra,
kilimen ako cingra i, awaay a matama ako cingra.
37Hapinangen ko nga'ayay a tamdaw,
nengnengen ko mo^celay a tamdaw.
O maolahay to rihaday a tamdaw i,
malnak ko tloc ningra.
38Nikawrira, matkop ko ciraraway a tamdaw,
malasawad ko tloc nangra.
39Pa'oripen no Tapang ko mo^celay a tamdaw,
ano mapades cangra i, dipoten Ningra cangra.
40Padamaen no Tapang cangra a pa'orip,
pa'oripen Ningra cangra a paliyas nai tatiihay a tamdaw,
nawhani pasayra cangra a milongoc to pipa'ading Ningra.
Currently Selected:
'Olic 37: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
