Taneng 26
26
1Ano mapahmek ko maapaay a tamdaw i, matiya o matfaday ko so^da i kacidalan, matiya o ma'oraday i kapanayan a caay ka tatodong.
2Ano padteng sa a mi'kak to tamdaw i, matiya o sa^fe^fer sanay a 'ayam, caay ko mamikari'ang to tamdaw.
3O sasti' ko sapapihaklong to ^fa, o kadang i ngoyos ko sapapihaklong to lofa, o 'oway ko sapapihaklong to maapaay a tamdaw.
4O paca'ofay to licay no maapaay a tamdaw i, malcad toya maapaay a tamdaw kiso.
5Ka o sowal no maapaay a tamdaw ko sapaca'of to maapaay a tamdaw, ta mafana' cingra to nika caay ko citangalay cingra.
6O patoroday i maapaay a tamdaw to saparatoh i, matiya o miktonay to wa'ay no tireng a pakaroray to tireng.
7Ano pasowal ko maapaay a tamdaw to taneng i, matiya o kala sakaromakat sanay to mapi'iway a wa'ay ningra.
8O palatadamaanay to maapaay a tamdaw i, matiya o mifaloday to tata'angay a fokloh i sapitkol.
9Ano pasowasowal ko maapaay to taneng a sowal i, matiya o pihodoc no malasangay to cka no kamay.
10Ano pacfa sa a pakatayal ko tawki to maapaay a tamdaw i, o mamakari'ang ko kahaccayccay no masakapotay a tamdaw.
11Saliyaliyaw sa a maapa ko dmak no maapaay a tamdaw, matiya o waco a patatikol a komaen to niota'an nira.
12Ma'arawayto iso ko citangalay kako sanay a tamdaw haw? Oyaho a maapaay a tamdaw ko adahi i cingraan.
13I loma' sa ko matokaay a tamdaw, o maan ko katalawan ningra saw? Matalaway to i papotalay a layon haw?
14Safliflin saan i kafoti'an ko matokaay a tamdaw, matiya o pisatawataway no sa'def no fawahan.
15O matokaay a tamdaw i, mitatoyto ko kamay ningra to kakaenen nai sala, malifotenho cingra a pacoma i ngoyos ningra.
16O harateng no matokaay a tamdaw i, ikaka noya mafana'ay a paca'of a papitoay a tamdaw ko nika citaneng ako saan.
17Caay ko kakiharen iso a dmak, ano mikihar kiso a macacoli i, malcad to miktilay to tangila no i lalanay a waco.
18-19O lawla ako sanay a tamdaw a misafana' to fiyafiyaw ningra i, matiya o mitatoyay to tapa, macidemay a pana' ato sapipatay to tamdaw a lalosidan.
20Ano awa ko kasoy i, mapadeng ko namal, malcad tonini, ano awa ko ngaliwngiway i, tomrep ko kacacolicoli.
21O maolahay a macacoli a tamdaw i, paoror to sakacacolicoli no tamdaw, matiya o mitongalay to 'afel ato kasoy i namal.
22O sowal no karasmaay a tamdaw i, matiya o nga'ayay a kakaenen, tangsol sa a ma'noc.
23O caay ko so'linay a nai faloco'ay a sowal, matiya o nirnafan to kohcalay a ^kim a makarotoday a kapowa ko sowal ningra.
24O misamangahay a tamdaw i, makapah ko sowal ningra a mitahpo to mi'intelay misa'adaay a faloco' ningra.
25Talacowa damsay ko sowal ningra, aka paso'lin cingraan, nawhani matomes no 'intel ko faloco' ningra.
26Latek ma^deng cingra a mitahpo to 'intelay a faloco' ningra, nikawrira, mahapinang no finawlan ko tatiihay a dmak ningra.
27O mikarkaray to rfong a mitalakal i, cingra ko matfaday a tahalakal, o miwalinay to fokloh i, cingra ko mastolay no niwalinan ningra a fokloh.
28O misamangahay a sma i, miri'ang to ni'intelan a tamdaw, o malaymayay a filfil i, misanga' to sakatkop.
Currently Selected:
Taneng 26: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
