Taneng 25
25
O Saka Tosa a Lolod no Taneng ni Solomon
1Onini a sasa a matiliday i, o ni Solomon haca a taneng a sowal. O nitilidan no tamdaw no i laloma'ay no loma' ni Hicikiya o Yuta a hongti konini.
2O 'dil no Kawas i, o pisimed Ningra to pakakmoday a dmak, o katadamaan no hongti i, o pakahapinang ningra to so'linay ato tatiihay.
3O faloco' no hongti i, caay ko kafana'an, matiya o takaraw no kakarayan ato talolong no riyar, caay ko mamalalat.
4I 'ayawenho a mifalah ko ta'i no ^kim ta, manga'ay ko pisanga' no sayho to makapahay a lalosidan. 5Malcad tonini, i 'ayawenho a mifalah ko tatiihay a tapatapang i tatihitihi no hongti ta, tomireng i mo^celay a paranaan ko pikowan no hongti.
6Aka pisatadamaamaan kiso i ka'ayaw no hongti a pa'araw, aka tomireng kiso i kaitiraan no tadamaanay a tamdaw. 7O nipitala to pitahidang no tamdaw a miati i tisowanan a patala'ayaw a pakamaro' ko nga'ay to nika laplap no tamdaw kiso a mapatararikor a pakamaro' ko ikakaay iso a tamdaw.
8Aka pacfa a malawacay i pisawkitan, ano ira ko cima a pawacay to nika patlac iso i, samaan sato ko nika ngodo iso saw?
9Ano ira ko maan a kacacolian iso ato fiyaw iso i, lonok han a malarihaday. Aka palsa' to nisimedan a dmak no tao, 10ano ^ca i, o caay ka 'imer to nisimedan a dmak saan ko pilikaf no tao a mitongangan i tisowanan.
11Ano manga'ay ko pipatalahkal to ccay a sowal i, matiya o nitlian i ^kim a sala a tada^kim a lingko#25.11 lingko -- o no Ripon a sowal..
12Ano mitngil ko tamdaw to misalofay a sowal no matanengay a tamdaw, ikaka no pilayap ningra to so'linay a tada^kim a fiting ato odo' ko nika ci^poc.
13O so'linay ko faloco' a tarokos i, o pasa'melay to faloco' no miocoray i cingraan, matiya o ki^tecay a nanom i kacidalan a mipanay cingra.
14O caay pilahci to nisowalan ningra a pafli to sapakaolah i, matiya o caay ko mamala'orad a to'em.
15Ano kodait ko faloco' a mipa'icel a somowal i, ma^deng a misako^ped to faloco' no ki^melay a pacoli a tamdaw, halomikowanay a mihaklong to damsayay a sma.
16Aka pakinali ko kakomaen iso to waneng no 'odal, ano adihay ko nikaenan iso i, maota' kiso. 17Aka kararid a miliso' to fiyaw iso, latek ma'fangto#25.17 ma'fangto -- o roma i, ma'sam, malanang. cingra a malasakateliito ningra i tisowanan.
18O misamangahay a pawacay a miri'ang to fiyaw i, malcad to ta'angay a satoktok, matalemay a fonos ato macidemay a pana' a mipatay to tamdaw.
19Yo mapades ano miti'er kiso to caay ko tati'eren a tamdaw i, malcad to mangawa'ay a wadis ko sapipa'pa' iso ato malcad to mapi'iway a wa'ay ko sakaromakat iso.
20Ano romadiw i ka'ayaw no mararomay a tamdaw i, malcad to mislongay to riko' ningra i kasi^nawan, matiya o misipasipay to cilah i doka' ningra.
21Ano macahiw ko 'ada iso i, pakaenen cingra, ano maso'aw cingra i, pananomen. 22Ano haenen iso i, o mamangodo cingra i tisowanan, o papakaolahen haca no Tapang kiso.
23O pisepen i, o palowaday to sakakter no tamdaw, matiya o nani 'amisay a lifes a mihawikid to 'orad.
24O nika itira i ciko no fadahong no loma' a maro' ko nga'ay, to nika laccay a maro' to karapo'iyay a fafahi.
25Ano matngil ko nga'ayay a ratoh nai maraayay i, matiya o pananomay i maso'away a tamdaw to ccay a takid no ki^tecay a nanom.
26Ano misorar ko mo^celay a tamdaw to tatiihay a tamdaw i, matiya o nicowaco'an a nemnem ano ^ca, matiya o mingotaan a nanom no tfon.
27Ano pakinali ko kakomaen to waneng no 'odal i, caay ka nga'ay, malcad tonini ano pakinali ko piharateng to sakahmekaw no tao i, ma'osi ko tao.
28O karafirangay a tamdaw i, matiya o caay ka ci'adipel a niyaro', narikay a malowid no tao a mipleng.
Currently Selected:
Taneng 25: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
