Taneng 24
24
(19)
1Aka ka 'inal to tatiihay ko dmak a tamdaw, aka pikapot i cangraan.
2Nawhani, misarocod a misahalaka cangra to sapiri'ang a dmak,
pasowal saho cangra i, midoka' to tamdaw.
(20)
3O taneng ko sakatomireng no loma',
pakayni i fana' ko saka tanektek nira,
4pakayni haca i fana' ko saka taring no rawang to masamaamaanay a kalimlaan a dafong.
(21)
5Ikaka no ci'icelay ko nika tadamaan no citanengay,
ikaka no ki^melay ko nika tadamaan no mafana'ay.
6I 'ayaw no nika lomowad iso a milood i, pisahalaka,
pitngil to sowal no citanengay, ano 'aloman ko pitngilan iso i, pakalowid kiso.
(22)
7O citanengay a sowal i, caay ko mamilayap ko maapaay a tamdaw,
itira i pikaykian i, apa sa cangra to nika awa no sasowalen nangra.
(23)
8O misahalakaay to tatiihay a dmak i, o cacilihaf to tadamari'angay wa han cingra.
9O nisafacoan no maapaay a tamdaw i, o raraw,
o misamsamay to tao i, o ka'intelan no tamdamdaw.
(24)
10Ano makoki' kiso i kapadesan a romi'ad i,
o tadancaayto a tamdaw kiso.
(25)
11Pa'adingen ko awaay ko raraw a nitarohan a patayra i pipatayan a tamdaw,
aka ka tayo ko dmak iso.
12Latek o harateng iso i, caay ka cikihar kako tonini a dmak saan kiso,
nikawrira, pakaynien no Kawas i niharatengan iso ko pisawkit i tisowanan.
Mahapinang Ningra a mita'sel ko faloco' iso.
Pakaynien Ningra i dmak iso ko pipatatodong a pakaolah ato pitfoc.
(26)
13Wawaaw, kakomaen to waneng no 'odal, o nga'ayay korira.
Kakomaen to nialaan nai loma' no 'odal a waneng, ko^san korira.
14Kafana' kiso, ano maala iso ko taneng ato fana' to saki faloco' i,
o tatadengal ko rakat no 'orip, caay kalasawad ko pafaloco'an iso.
(27)
15Aka pisahalaka to sapi'afasaw to loma' no mo^celay a tamdaw,
aka pipleng to loma' ningra, nawhani, o tatiihay a dmak korira.
16Ano mapolipolin ko mo^celay a tamdaw i, o lalomowadho cingra a tomireng,
nikawrira, o tatangsol a matkop no pades ko tatiihay a tamdaw.
(28)
17Aka ka lipahak a mimelaw#24.17 mimelaw -- (Cikasoan), o roma i, nengneng, 'araw. to nika polin no 'ada iso.
Ano lipahak kiso to nika tfad noya tamdaw i,
18mafana' ko Tapang, caay to ka olah Cingra to matiniay a faloco' iso,
latek caayto pilahci Cingra a mitfoc to 'ada iso.
(29)
19Aka ka rawraw ko faloco' iso a minengneng to tatiihay a tamdaw,
aka ka 'inal i cangraan.
20Awaay ko nga'ayay a harakat no tatiihay a tamdaw,
awaay ko pafaloco'an ningra.
(30)
21Wawaaw, ta'ongen ko Tapang, kangodoen ko hongti.
Aka pikapot to pacoliay a tamdaw,
22o mamatkop to ccay a mlet ko matiraay a tamdaw.
Caay ka fana' kiso to nika o mamitfoc, o mamipades ko Kawas ato hongti saw?
O Romaroma a Sowal no Taneng
23Ira i sasa#24.23 i sasa -- (Cikasoan), o roma i, kala^no, la^no. ko roma a sowal no citanengay a tamdaw.
Aka pisakakinih ko misawkitay a tamdaw. 24Ano ciraraway a tamdaw i, awaay ko raraw iso ano han ningra a misawkit i, o mama'kak a maka'intel no tahaf no kakarayan a tamdamdaw cingra. 25Nikawrira, o mitfocay to ciraraway a misawkitay i, o mamakahmek cingra a mapalmed.
26O so'linay ko pipaca'of i, o pahapinangay to nika o so'linay a widang cingra.
27I 'ayawenho a misongila' ko tayal, songila'enho a mipatala ko omah, ta patireng to loma' a misatapang a misaparod.
28Aka paci^ci a mipawacay a miri'ang to fiyaw iso, aka pisafana' to tamdaw. 29Aka pasowal toya, <<Mihaenay cingra i takowanan, saka haenen ako cingra a mico'ay,>> sanay.
30Nao mirakatayto kako to omah no matokaay a tamdaw ato safadisoso'an no maapaay a tamdaw, 31'arawhani ma^def no talod ato fadal ato smot ko omah nangra, o i taliyokay a 'atol a 'adipel i, maprarto a ma^min. 32Yo minengneng kako tonini i, maharateng ako ko nga'ayay a sifana', 33O sowal iso i, <<Pacmetho kako a mafoti', pacna'ho kako a misa'amamokot a pahanhan,>> saan. 34Nikawrira, yo marda' ko foti' iso i, matiya o mi'afasay ko pakosiya a miri'ang i tisowanan, matiya o mitatoyay to sapilood a kokong ko cango'ot a mitkop i tisowanan.
Currently Selected:
Taneng 24: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
