Taneng 23
23
(6)
1Ano mikapot kiso to tapang a mitahka a komaen i,
haratengen ano cima cingra.
2Ano halikaenay kiso i, 'meten ko tireng.
3Aka ka 'anof a komaen to sapatahka ningra a nga'ayay a kakaenen,
latek o sapitalakal ningra konini.
(7)
4Aka pakaroray to faloco' a miharateng to sakacidafongaw,
ka o citanengay kiso a ma'imer.
5O mamalahdaw to ccay a mlet ko dafong,
matiya o sapikpik no 'alilis a ma^fer.
(8)
6Aka ka komaen to sapakaen no maloptay#23.6 maloptay -- o roma i, 'idpet (ka'amis). a tamdaw,
aka ka 'anof to nga'ayay a kakaenen ningra.
7Talacowa somowal cingra, <<Ati kaenen, ta'owaken,>> saan cingra,
nikawrira, caay ko so'linay a nai faloco'ay ningra a sowal korira.
8O mangah ko dmak ningra, o mamaota' kiso to nikaenan iso.
Oya nisowalan iso a nga'ayay a sowal i cingraan i, awaayto ko ^poc a ma^min.
(9)
9Aka pasowal to so'linay i maapaay a tamdaw,
nawhani, caay ka limla cingra to citanengay a sowal iso.
(10)
10Aka pilinah to nano to'asho a kalangangan a 'otoc no sra.
Ano ^ca aka pi'afas to omah no pakoyoc a wawa.
11O Tapang ko ci'icelay a pa'ading i cangraan,
o papacolien Ningra kiso a pa'ading i cangraan.
(11)
12Pakifaloco'en ko nipasifana'an no singsi iso,
tngilen a mihaklong ko citanengay a sowal ningra.
(12)
13So'linen a pasifana' ko wawa, ano stisti'en i, caay ka patay.
14O pipa'orip iso i cingraan korira.
(13)
15Wawaaw, ano ira ko taneng iso i, tadalipahak kako.
16Ano matngil ako ko so'linay citanengay a sowal iso i, lipahak kako.
(14)
17Aka ka 'inal to ciraraway a tamdaw, kararid ko faloco' iso a mita'ong to Tapang.
18Ano haenen iso i, tadengal a manga'ay ko harakat iso.
(15)
19Wawaaw, pitngil to sowal ako, kafana' kiso,
kasarocod a miharateng to dmak iso a ma'orip.
20Aka pinaol to hali^pahay ato macoosay.
21O mamalapakoyoc ko hali^pahay ato macoosay a tamdaw.
Ano sahto o foti' ko dmak no tamdaw i,
o caciriko' cingra to makamiday#23.21 makamiday -- o roma i, mapnayay, mapicapicay (Fata'an). a riko'.
(16)
22Pitngil to sowal no mama iso, ano awaay cingra i, awa kiso,
kangodoen ko mato'asay a ina iso.
23Kalimlaen ko so'linay a sowal ato sakacitaneng ato nitanengan ato sakafana' a miharateng,
aka pifalah tonini.
24Lipahak ko mama no mo^celay a tamdaw,
ano ciwawa kiso to citanengay i, o sakacihrang iso.
25Palipahaken ko mama ato ina iso,
palipahaken cingra o mihofocay i tisowanan.
(17)
26Wawaaw, pisarocod ko faloco' iso, ka o dmak ako ko malopi'arawan iso.
27O tasalamaan ato ma'otitay a fafahiyan i, matiya o sakapatay a rfong.
28Matiya o kokong cangra a misa'imer to tamdaw,
saka, malamisamangahay to 'alomanay a fa'inayan.
(18)
29-30Ano cima ko hali^pahay, haliacangay a tamdaw a mitanam to kasasiroma no ^pah i, ora a tamdaw ko cipadesay,
mararomay, karatomayay, ngaliwngiway, kahngangay ko mata ato madoka'ay tona malasang.
31Ano kahngahngang ko ^pah, ano sapanga'anga'ayan a nengnengen,
ato 'nocen i, aka ka solot ko faloco', aka ka 'inal.
32Nawhani i ikoray i, matiya o nikalatan no cisawarakay a 'oner kiso.
33O mamaorat ko pinengneng iso, wa awato ko pinang no harateng ato caciyaw iso.
34Matiya o midakaway to tamina i sifo' no riyar a masinawar kiso,
matiya o mikafitay kiso i tloc no satoko no tamina.
35<<Nisti'an no tao kako hakini?
Caay hakini? Caay ka fanafana' kako,
nawiro, caay ka palal kako hakini?
Mi'owakho kako to ^pah,>> o sasaan kiso.
Currently Selected:
Taneng 23: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
