Taneng 22
22
1O nika nga'ay no lihaf iso ko nga'ay to nika cidafong ato nika cipayso iso.
2Malcaday a o nisanga'an no Tapang ko cidafongay ato pakoyocay a tamdaw.
3Malitmoh no mafana'ay a miharateng a tamdaw ko nika aira no pades haw i, tangsol sa cingra a miliyas.
Nikawrira, o mafokilay a miharateng a tamdaw haw i, tayra a miraod toya pades.
4O mita'ongay to Tapang ato misapo^neray to faloco' a tamdaw i,
o cacidafong, o tatadamaan, o kakakaya' ko 'orip ningra.
5O limlaay to 'orip a tamdaw i, mafana' a miliyas toya sapirpet to tatiihay a tamdaw a satilo.
6Pasifana'en ko wawa to mo^celay a lalan,
ta caay ka piliyas cingra tonini a tahatolas.
7O pakosiya a tamdaw i, o makowanay no cipaysoay a tamdaw,
o mikiyamay a tamdaw i, o mamalakoli no pikiyaman ningra a tamdaw.
8O mifolsakay to caay ka mo^cel a sapaloma i, o mamilitod cingra to pades,
o mamapereng ko pikari'ang ningra to tamdaw.
9O sini'adaay a pafli i pakosiya a tamdaw to kakaenen i,
o mamalmed cingra.
10Laplapen ko malata'angay a tamdaw, ta mapatrep ko kacacolicoli ato kala'odo'odot ato malalikalikafay a dmak a ma^min.
11O maolahay to makoracay a faloco' ato damsayay ko sowal a tamdaw i,
o kalipahakan no hongti a widang cingra.
12Minengneng a midipot ko Tapang to so'linay a dmak.
Palasawaden Ningra ko sowal no misamangahay a tamdaw.
13I loma' sa ko matokaay a tamdaw, sowal sa cingra,
iraay i papotal ko layon a mitala i takowanan to sapita'modan saan.
14O ngoyos no ma'odangay a fafahiyan i, matiya o talakal,
matfad itira ko ka'osian no Tapang a tamdaw.
15Mingata i apa ko pinangan no ka^mangay,
o sasti' ko sapisalof a palatamdaw i cangraan.
16O mi'afasay to pakoyocay ko saka cipayso no tireng i,
ato o patafoay to cipaysoay a tamdaw i,
o mamalacango'otay.
O Toloay a Polo' a Sowal no Taneng
17Pitngil, pasifana'en ako kiso to sowal no citanengay a tamdaw, pina'on kiso a minanam to fana'. 18Ano pakifaloco'en iso konini i, alaen a pakatayal, o sanga'ayay korira. 19O sapapiti'eraw ako i tisowanan to Tapang saka, pasifana'en ako kiso tonini a taneng. 20Tolo a polo' ko nitilidan ako to saki tisowanan, i laloma' nonini i, ira ko sakafana' ato sapisalof a pa'icel a sowal. 21O sapasifana' i tisowanan to nika o maan ko so'linay a dmak, ta matama iso ko so'linay a sapaca'of toya niocoray tisowanan a tamdaw.
(1)
22Aka ka pi'afas to maamaan no pakosiya a tamdaw,
aka pisamsam a mipa^kel to awaay ko palawinaan a tamdaw.
23O Tapang ko pa'adingay cangraan, ano cima ko miri'angay to 'orip nangra i,
haenen no Tapang a miala ko 'orip noya tamdaw.
(2)
24Aka ka pisawidang kiso to karakteray a tamdaw,
25latek minanam kiso to tatiihay a pinangan ningra,
caayto ko mamasalof kiso.
(3)
26Aka ka pihai a mihosiw to kiyam no tao,
27ano caay pakapatikol kiso i, halokafoti'an iso a maala no tao.
(4)
28O nipatirengan no tato'asan nai tiyaho a kalangangan no sra a 'otoc i,
aka pilinah kiso.
(5)
29Ma'araway iso ko malalokay a matayal a tamdaw haw?
Caay pikapot cingra to misalamalamaay a tamdaw,
o tatomireng cingra i ka'ayaw no hongti.
Currently Selected:
Taneng 22: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
