Taneng 21
21
1O Tapang ko mikriday to faloco' no hongti,
matiya o pilinah Ningra to rakat no nanom no 'alo.
2O harateng no tamdaw i, matamaay a ma^min ko no mako a dmak saan,
nikawrira, mihapinang ko Tapang to rarangian no dmak ningra.
3O pidmak to marayasay ato mo^celay a dmak i,
ikaka no nika olah no Tapang a milayap to sapato'aya ko nika olah Ningra.
4O pisalata'ata'ang a misatakaraw ato pisaseneseneng no tatiihay a tamdaw i, o raraw konini.
5O masongila'ay ko pisahalaka a misafaco a tamdaw i, o sakacidafong ningra.
O forifor sanay a macaloh ko dmak a tamdaw i, o sakalapakosiya ningra.
6O caay ka mo^cel a mialaan a dafong i, matiya o mita'lifay a to'em,
o sakapatay no tamdaw a matkop.
7O miforiforay a dmak no tatiihay a tamdaw ko sakatkop nangra,
nawhani mana'ay cangra a romakat to mo^celay a lalan.
8O ma'akongay a lalan ko nirakatan no ciraraway a tamdaw,
o mo^celay ko dmak no makoracay a tamdaw.
9O nika itira i ciko no fadahong no loma' a maro' ko nga'ay, to nika laccay a maro' to karapo'iyay a fafahi.
10O tatiihay a tamdaw i, saromi'ad salafii saan a miharateng to sapidmakaw to tatiihay a dmak,
awaay ko sini'ada ningra to fiyafiyaw ningra.
11O malata'angay a tamdaw i, o mamatfoc cingra, halomafokilay a tamdaw a mapasifana'.
O citanengay a tamdaw i, pakayni i nilayapan ningra a sifana' ko sakatongal no fana' ningra.
12Mita'sel to faloco' no tatiihay a tamdaw ko mo^celay a Kawas,
Cingra ko sakatkop nangra.
13O mipo^tay to tangila a caay pitngil to pingitangit no pakosiya a tamdaw i, ano mingitangitto cingra to pipadama no tao i,
caayto pikihar ko tao i cingraan.
14Ano padokdok han a pafli to sapakaolah i, ma^deng a mapatrep ko kter,
ano pa'alofoen to payso i, ma^deng a mapatrep ko marafrafay a kter.
15O pilahci to marayasay mo^celay a dmak i, o kalipahakan no mo^celay a tamdaw.
Nikawrira, o sakapades no tatiihay a tamdaw a matalaw konini.
16Ano miliyas ko tamdaw to no taneng a lalan i,
mamalakapot to kaitiraan no mapatayay a maro'.
17O haliacangay a tamdaw i, o mamalapakosiya,
o awaayto ko patolasan a komaen, mita'owak a tamdaw i, caay ko cacidafong.
18Sapiri'angan ko tatiihay a tamdaw to mo^celay a tamdaw,
nikawrira, o tireng ningra ko tahapadesay.
19O nika itira i kohkohan a maro' ko nga'ay to nika laccay a maro' atoya karapo'iyay a karangaliwngiway a fafahi.
20O 'orip no citanengay a tamdaw i, kadofah to dafong a rihaday ko 'orip,
o 'orip no maapaay a tamdaw i, tona patahtah sa cingra a mila'om saka, malasawad ko dafong no loma' ningra.
21O milongocay to mo^cel ato adayay ko faloco' a tamdaw i,
o kako'daw ko 'orip ningra, o kakangodoan no tamdamdaw cingra.
22Ano pakatayalen ko taneng i, ma^deng a mi'afas to niyaro' no cicdiay a sofitay,
ma^deng a mipleng toya nitadi'ecan nangra a pisitaraan.
23O mina'onay to ngoyos ato sma a tamdaw i,
o saka^ca ka pades ningra.
24O misalata'ata'angay a tamdaw i, o misatakarakaraway,
o malata'angay ko faloco' ningra.
25O matokaay a tamdaw i, o ccay no kinapatay ningra korira,
nawhani, caay ka ngalay cingra a matayal.
26Saromi'ami'ad sa cingra a mihaklong to 'anof ningra.
Nikawrira, maolah a mipalada' ko mo^celay a tamdaw, caay ka 'idi.
27Ma'osi ko Tapang to nipato'ayaan no tatiihay a tamdaw,
mangalef ko nika 'osi Ningra to nisafana'ay a pipacakat.
28O misamangahay a pawacay a tamdaw i, caay ko papaso'linen,
oya so'linay a nitngilan ato dmak ko nisowalan i, o kakangodoen cingra.
29Misaharaterateng ko mo^celay a tamdaw to dadmaken ningra,
nikawrira, misamangah a misatanektektek a nengnengen ko tatiihay a tamdaw.
30Oya taneng ato tangal ato nisahalakaan iso a ma^min i,
caay ko papakatena' to Tapang.
31Ma^deng ko tamdaw a misa'opo to sofitay, mi'aca to ^fa, mipatala to sapilood, nikawrira,
o sapakalowid no tamdaw i, o Tapang ko pi'arawan.
Currently Selected:
Taneng 21: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
