Taneng 18
18
1O caay pikapot to 'alomanay a tamdaw i, satked sa a mido^do to kangalayan no tireng,
o matamaay a haratengen no tamdaw a dmak i, caay ka tama saan cingra.
2O maapaay a tamdaw i, ano caacaay ka fana' cingra,
sano mafanafana'ay sa cingra a maolah a patalahkal i ka'ayaw no tamdaw.
3Mala'afang a romakat ko tatiihay ato malata'angay,
caay ka laliyas ko misamsamay ato caay ka fana' to ngodo.
4O sowal no tamdaw i, ma^deng malotatapangan no taneng,
matiya o nika talolong no riyar ato tingalaway a nemnem.
5Ano pakonira han ko tatiihay a tamdaw i, caay ka mo^cel,
ano palafoen ko awaay ko raraw a tamdaw i, caay ka rayas.
6Ano caciyawho ko maapaay a tamdaw i, mipalowad to sakacacolicoli,
pasowal saho cingra i, irato ko mamisti'.
7O ngoyos no maapaay a tamdaw ko sakatfad ningra,
o filfil ningra ko sakatahalakal ningra.
8O sowal no karasmaay a tamdaw i, matiya o nga'ayay a kakaenen, tangsol sa a ma'noc.
9O matokaay ato mangirosay i, matiya o malikakaay canira.
10O Tapang i, matiya o tanektekay a pisitaraan,
ano comikay a tayra ko mo^celay a tamdaw a micomod i, rihaday cingra.
11O cipaysoay a tamdaw i, kala'adipel han ningra ko dafong ningra,
o harateng ningra i, takaraw tanektek konini a dafong, ma^deng a midipot takowanan saan.
12O misapo^neray a tamdaw i, o mamalatadamaanay,
o misatakaraway a tamdaw i, o mamatkop cingra.
13Caho ka hrek a mitngil halopaca'ofay a tamdaw i,
o apa ningra ato sakangodo ningra konini.
14O saka'oripananay a faloco' i, o sapakahadidi to adada,
ano matoled ko faloco' i, awaay to ko pafaloco'an.
15O faloco' no citanengay a tamdaw i, mangalay a mafana',
o tangila no citangalay a tamdaw i, mangalay a mitngil to taneng a sowal.
16O sapakaolah no tamdaw a maamaan i, o sakakakahad no lalan ningra,
makrid cingra a mapatayra i ka'ayaw no tadamaamaanay a tamdaw.
17O sa'ayaw a pakokot a pasowal to dmak i, o so'linay a matatodong hakiya, awaho ko pinang.
Ano irato ko tatihi a tamdaw a maliclic ta mahapinangto.
18Ma^deng a patrep to macacoliay a tamdaw ko nipiritos, ma^deng haca palali'ay to tatosaay a marari'angay.
19Ano mipadama kiso to salikaka iso i, matiya o tanektekay a 'adipel no niyaro' ko pidipot ningra i tisowanan,
ano macacoli kiso ato cingra i, o mama'edef ningra ko fawahan iso.
20O hci no kahaccay a sowal no tamdaw ko sakafcol no tiyad ningra,
o nano sowal ningra ko sakarihaked.
21O sowal iso ko sakadipot no 'orip iso, ano ^ca sakapatay iso.
Ano masamaan ko nisadakan iso a sowal i, o hci nira ko lalayapen iso.
22O cifafahiyay to citanengay a fafahi i, awaay ko tolas a malmed,
mahapinang ko sini'ada no Tapang a palmed i cangraan.
23Ano milongoc ko pakosiya a tamdaw i cipaysoay i, samiming sa to ngiha' a somowal,
nikawrira, cli' sa a paca'of ko cipaysoay a tamdaw a patalaw.
24O patelas sanay a ciwidang i, o sakasipon ningra,
O talolongay ko kalawidang i, ikaka no pton ko nika nga'ay.
Currently Selected:
Taneng 18: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
