Taneng 17
17
1O nika komaen to 'atkakayto a ccay a 'aplad no ^pang a rihaday ko nga'ay,
to nika komaen a mitahka i cokoi to ^pah ato titi a macacolicoli a mala'odo'odot.
2O citangalay a koli i, o mamikowan to caay ka fana' to ngodo a wawa no tawki ningra,
o romasato o mamikapot cingra toya malikakaay a mililam to omah no tawki.
3O namal i parod ko sapi'olac to tada^kim ato ^kim.
O Tapang ko milifetay to faloco' no tamdaw.
4O tatiihay a tamdaw i, paso'lin a mitngil to tatiihay a sowal.
O misamangahay a tamdaw i, maolah a mitngil to misa'fitay a sowal.
5O matawaay to pakosiya a tamdaw i, o milokesay to misanga'ay cingraan a Kawas.
O lipahakay to nika pades no tao i, caay ko mamaliyas ningra ko satfoc.
6O sakacihrang no mato'asay ko fofo ningra,
o sakatadamaan no wawa ko wama ato ina nangra.
7O maapaay a tamdaw i, caay ka tatodong a somowal to damsayay, makapahay a sowal.
Mangalef ko tadamaanay a tamdaw caay ka tatodong a misamangah a somowal.
8O pinengneng no pa'alofoay a tamdaw i,
o tadamaanay konini a dmak ako, malahci a ma^min ko nisahalakaan ako a dmak saan.
9O misololay to patlac no tao i, o palowaday to sakasasiolaolah no tamdamdaw,
o caay pitawal a mi'intel to katlangay a dmak i, o palasawaday to kalawidang.
10Ano kapo'iyen to ccay a sowal ko citanengay a tamdaw i,
ikaka no pisti' to smo'ot (100) i maapaay a tamdaw ko nika ci^poc.
11O tatiihay a tamdaw i, sarocod sa a midmak to tatiihay,
saka o mamatiya o ma'edesay a coyoh ko patay a tayra i cingraan.
12O nika litmoh to masidayay ko wawa a tawinaan a tomay ko adahi to nika lalitmoh to mafolaay ko dmak a maapaay a tamdaw.
13Ano o tatiihay ko sapaco'ay iso to nga'ayay a tamdaw i,
caay ko mamiliyas i fawahan no loma' iso ko latiih a tahada'oc.
14Matiya o nifowahan a nanom ko satapangan no kacacolicoli,
orasaka, i 'ayaw no kacacoli i, 'meten ta caay pistol ko kacacoli.
15O tatiihay a tamdaw i, o mo^celay sanay, o mo^celay a tamdaw i,
o tatiihay sanay a mipastek i, o ka'osian no Tapang konini a tosa a dmak.
16Tona mafula ko maapaay a tamdaw, saka awaay ko ^poc a pakapayso a micakay to saka ci taneng.
17Mararid a masasiolaolah ko malawidangay,
o mamipadang a miharateng to pades ko salikaka no tireng.
18O mafokilay a tamdaw i, hai sa a mihosiw to kiyam no fiyaw ningra.
19O maolahay a ciraraw a tamdaw i, maolah a macacoli,
o maolahay a misatakaraw#17.19 misatakaraw -- o roma i, mipakowah (ka'amis), mipakowad (timol), ano ^ca i, o pahmekay to kacidafong a tamdaw. a tamdaw i, o sakaira no pades ningra.
20O tatiihay ko faloco' a tamdaw i, awaay ko kanga'ayan ningra,
o misamangahay ko sowal a tamdaw i, o aira a mararid ko pades ningra.
21Ano maapaay ko nihofocan a wawa i, o sakarawraw no wama ningra,
awaay ko lipahak no wama no maapaay a wawa.
22O lipahakay a faloco' i, matiya o nga'ayay a sapaiyo a patanektek to tireng,
o mararomay a faloco' i, matiya o tatiihay a adada a mipatay to tamdaw.
23O tatiihay a misawkitay i, milayap to sapa'alofo,
caay patalahkal cingra to mo^celay a dmak.
24O citangalay a tamdaw i, mataneng a dadmak, o maapaay a tamdaw i,
caay ka saccay ko faloco' ningra a tahada'oc.
25O maapaay a wawa i, o sakararom no wama ningra,
o sakaroray haca no wina ningra.
26Caay ka nga'ay a mitfoc to awaay ko raraw a tamdaw,
caay ko mo^celay a dmak ko pisti' to nga'ay a tamdaw.
27O citanengay a tamdaw i, trep sa a caay ka caciyaw,
o citangalay a tamdaw i, masinanot ko faloco' a damsay.
28Ano trep sa ko maapaay a tamdaw i, o citangalayto cingra,
ano trep sa cingra a caay ka caciyaw i, o citanengayto cingra.
Currently Selected:
Taneng 17: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
