Taneng 14
14
1O citanengay a fafahiyan i, mipatireng to loma',
o maapaay a fafahiyan i, to^to saan a mipleng to loma'.
2O mo^celay ko dmak a tamdaw i, o mangodoay to Tapang,
o ma'akongay ko dmak a tamdaw i, mi^pec to Tapang.
3Mararid a matefoc ko maapaay a tamdaw to nano nika lata'ang ningra,
o citanengay a tamdaw i, madipot no sowal ningra ko tireng ningra.
4Ano awaay ko kolong to sapikangkang i, nanicowa a ira ko panay,
ira ko kolong to sapikangkang saka, adihay ko panay.
5O tati'eren ko pipawacay no so'linay a tamdaw,
o kaniw ko pipawacay no misasamangahay a tamdaw.
6O mi^pecay a tamdaw i, caay pakalayap to taneng,
o citangalay a tamdaw i, narikay a mafana'.
7Piliyas to maapaay a tamdaw,
nawhani awaay ko aalaen i cangraan to sakafana'.
8O taneng no citangalay a tamdaw ko sakapakatama ningra to rarakaten ningra a lalan,
o apa no mafolaay a tamdaw ko sapisafana' ningra to tireng ningra.
9Ano ciraraw ko maapaay a tamdaw i, caay sapifalican a mimli to faloco',
o mo^celay a tamdaw i, maolah a mikilim to sakararihaday a masasisolol to raraw.
10O roray no faloco' iso i, deng kiso ko mafana'ay,
o lipahak no faloco' iso i, caay ko mama'isal no tao.
11O mamalefek ko loma' no tatiihay a tamdaw,
o tatanektek a tomireng ko loma' no mo^celay a tamdaw.
12Iraay ko roma a lalan, mo^cel a nengnengen,
'arawhani o sakatayra i kapatayan a lalan.
13Ma^deng a mitahpo to rarom ato ksem ko nika lipahak a matawa,
nikawrira, ano mahrekto ko nika lipahak i, oyananto a ira koya rarom.
14O ma'akongay ko faloco' a tamdaw i, cingra ko kakomaen to hci no tatiihay a dmak ningra,
o mo^celay a tamdaw i, o mamilayap to tatodong no nga'ayay a dmak ningra.
15O maapaay a tamdaw i, paso'lin to maamaan a dmak a ma^min,
o citangalay a tamdaw i, mina'on to rarakaten ningra a lalan.
16Miliyas to sakalatiih ko citanengay a tamdaw,
nikawrira, pakonahira sa ko maapaay a tamdaw a misacimacima.
17O karakteray a tamdaw i, o maapaay ko dmak ningra,
o mafana'ay a miharateng a tamdaw i, caay ka rawraw ko faloco'.#14.17 o misa'fitay a misahalaka a tamdaw i, o katli'ian no tamdaw -- ano ^ca i, o misa'fitay a misahalaka a tamdaw i, o katli'ian no tamdaw.
18O mafokilay a tamdaw i, cingra ko komaenay to hci no apa ningra,
o mafana'ay a tamdaw i, kalatamohong han ningra ko fana' ningra.
19O mamihinokop i ka'ayaw no mo^celay a tamdaw ko tatiihay a tamdaw,
o mamiki'a'am i ka'ayaw no fawahan no mo^celay a tamdaw ko tatiihay a tamdaw.
20O ka'osian no tamdamdaw ato fiyafiyaw ko pakosiya a tamdaw,
nikawrira, 'aloman a 'aloman ko widang no cidafongay a tamdaw.
21O sini'adaay to pakosiya a tamdaw i, o malmeday,
o mi^pecay to fiyafiyaw a tamdaw i, o ciraraway.
22O nga'ayay ko dmak a tamdaw i, o tata'ongen no tamdaw a mikangodo,
o tatiihay ko dmak a tamdaw i, o mamatfad a moraraw to lalan.
23O malalokay a matayal a tamdaw i, caay ka rawraw to saka'orip,
o saromi'ami'ad sanay a misacaciyaw i, o mamalapakosiya.
24O kadofah no citangalay a tamdaw ko malotamohong ningra,
o fokil no maapaay a tamdaw ko sakalata'ang ningra.
25O so'linay a pawacayay a tamdaw i, mipa'orip to 'orip no tamdaw,
o misamangahay ko sowal a tamdaw i, miri'ang to tamdaw.
26O mangodoay to Tapang i, ira ko piti'eran ningra,
halo paro no loma' ningra a rihaday a tanektek.
27O nika ngodo to Tapang i, o nemnem no sakaci'orip,
pakapaliyas to kacalemceman a patay ko taneng.
28O sakatadamaan no hongti i, o nika 'aloman no finawlan,
ano awaay ko finawlan no hongti i, awaayto ko maamaan ningra.
29O caay ka narikay a makter a tamdaw i, o citanengay a tamdaw,
o karakteray a tamdaw i, o patalahkalay to apa ningra.
30O nika sinanot no faloco' i, o sakatanektek no tatirengan,
o ma'inapay a faloco' i, o i laloma'ay no 'okak a ^kang.
31O mipa^klay to pakosiya a tamdaw i, o pisamsam to misanga'ay cingraan a Tapang,
o adayayay to pakosiya a tamdaw i, o so'linay a mita'ongay to Tapang.
32O miforiforay a dmak no tatiihay a tamdaw ko sakatkop ningra,
ano miso'aya'ayaw to patay ko mo^celay a tamdaw i, o mamadipot cingra.
33Ira i faloco' no citanengay a tamdaw ko fana' ningra,
nikawrira, awa ko fanafana' no maapaay a tamdaw.
34O mo^celay a dmak ko sakacakat no kitakit a ki^mel,
o sakangodo no finawlan ko raraw.
35O citanengay a matayalay a tapatapang i, o mamapakaolah no hongti,
nikawrira, o matokaay a matayalay a tapatapang i, o mamatfoc no hongti.
Currently Selected:
Taneng 14: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
