Taneng 13
13
1O citanengay a wawa i, mitngil to pipasifana' no mama ningra,
nikawrira, o malata'angay a tamdaw i, caay pitngil to pitoro' no tamdaw to patlac ningra.
2O nga'ayay a tamdaw i, o so'linay a sowal ningra ko sakalmed ningra,
nikawrira, o misafana'ay a tamdaw i, o pikari'ang ko patosokan ningra.
3O mina'onay to sowal a tamdaw i, o limlaay to 'orip,
nikawrira, o pacfa sanay a somowal i, o mitkopay to tireng ningra.
4Ano mangalangalay ko matokaay a tamdaw to maan i, awaay ko sapiala ningra,
nikawrira, o malalokay a matayal a tamdaw i, ira ko sapiala ningra to kangalayan ningra a ma^min.
5Ma'osi to misamangahay a sowal ko mo^celay a tamdaw,
nikawrira, o katliian, o kaackan ko tatiihay a tamdaw.
6Madipot no mo^celay a dmak nangra ko awaay ko raraw a tamdaw,
nikawrira, o sakatfad no ciraraway a tamdaw ko tatiihay a dmak nangra.
7O cidafongay a tamdaw kako saan ko roma a tamdaw,
'arawhani awaay ko maan aca ningra.
O pakosiya a tamdaw kako saan ko roma a tamdaw,
'arawhani adihay ko dafong ningra.
8O cidafongay a tamdaw i, o payso ningra ko sapi'aca to tireng ningra,
nikawrira, awaay ko mipatalaway to pakosiya a tamdaw.
9Matiya o matdiay a malikatay a dawdaw ko mo^celay a tamdaw,
nikawrira, matiya o mapadengay a dawdaw ko tatiihay a tamdaw.
10O palowaday to sakacacoli ko misatakaraway a faloco',
o citanengay a tamdaw i, mitngil to pisalof no tamdaw i cingraan.
11Ano caay ko nika rorayan iso ko sakacidafong iso i, ranikay a malasawad,
ano nano nika rorayan iso ko sakacidafong iso i, caay ko mamalasawad ko dafong iso.
12Ano malasawad ko nisafaloco'an i, matoled ko faloco',
ano malahci ko nisafaloco'an i, matiya o ci'oripay a kilang.
13O mi^pecay to sifana' i, o mamapades cingra,
nikawrira, o mido^doay to limo'ot i, rihaday ko 'orip ningra.
14O pasifana' no citanengay a tamdaw i, o nemnem no sakaci'orip,
pakapaliyas to kacalemceman a patay ko taneng.
15Kangodoen no tamdaw ko citangalay a tamdaw,
nikawrira, o mamatkop ko caay ka so'lin ko faloco'.
16O citangalay a tamdaw i, misaharateratengho ta midmak,
nikawrira, o maapaay a tamdaw i, misaakoakoay to fokil ningra.
17O sakalatiih ko sowal no mafolaay a tarokos,
nikawrira, o sakarihaday ko sowal no so'linay a tarokos.
18O mamalapakosiya a mapakangodo ko mana'ayay a salofen,
nikawrira, o kahmekan no tamdaw ko mitngilay to pisalof no tamdaw.
19Ano malahci ko kacifaloco'an i, lipahak ko faloco',
nikawrira, caay ka kahi a miliyas to tatiihay ko maapaay a tamdaw.
20O minaolay to citanengay a tamdaw i, o cacitaneng cingra,
o minaolay to maapaay a tamdaw i, o mamapakaroray cingra.
21Milpel to ciraraway a tamdaw ko pades,
nikawrira, milayap to nga'ayay a sapakaolah ko mo^celay a tamdaw.
22Misiday to dafong ko nga'ayay a tamdaw to saki tloc ningra,
nikawrira, misoped to dafong ko ciraraway a tamdaw to mamalo no mo^celay a tamdaw.
23Ano mipamatang a maomah ko pakosiya a tamdaw i,
adihay ko kinaira ningra a kakaenen,
nikawrira, o caay ka mo^cel a tamdaw i, caay ka ngalay a maomah.
24O caay pisti' to wawa a palatamdamdaw i, o caay ka olah to wawa ningra,
o maolahay to wawa i, ca^des ko pipasifana' ningra to wawa ningra.
25O mo^celay a tamdaw i, caay ka cango'ot to kakaenen,
o tatiihay a tamdaw i, mararid a macahiw.
Currently Selected:
Taneng 13: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
