Matay 10

O Tosaay ko Safaw a Tarokos

(Maroko 3.13-19; Luka 6.12-16)

1Tahidangen ni Yis ko tosaay ko safaw a nisawawaan Ningra a pasa'opo. Paflien Ningra cangra to 'icel to sapifahfah to kaackan a 'adingo ato sapiadah to masamaamaanay a adada. 2O ngangan nonini a tosaay ko safaw a tarokos i, ci Simon ko sa'ayaway (ci Pitiro han ko roma a ngangan), ta o safa ningra ci Antiri, ta o wawa ni Cipitay ci Yakop, ta o safa ni Yakop ci Yohani, 3ci Filip, ci Partolomay, ci Tomas, ci Matay o milisataay, ci Yakop o wawa ni Alfayus, ci Tatayus, 4ci Simon o malalokay to no kitakit a sa'opo, atoya pacakayay ci Yisan a Iskariyot a tamdaw ci Yuta.

O Piocor ni Yis to Tosa ko Safaw a Tarokos

(Maroko 6.7-13; Luka 9.1-6)

5Ocoren ni Yis konini a tosaay ko safaw a tarokos a palimo'ot i cangraan, <<Aka ka tayra i niyaro' no roma a finacadan. Aka picomod to niyaro' no Samariya a tamdaw. 6Katayra kamo i finawlan no Israil toya moraraway a siri. 7<Mangatato a talahkal ko Kitakit no Kawas,> han a patnak. 8O romasato, Adahen ko adadaay a tamdaw, palowaden a pa'orip ko mapatayay a tamdaw, adahen a mikorac ko malono'ay, fahfahen a pasadak nai tamdaw ko palafoay. O nitadoan namo konini a 'icel saka, haenen ko pipafli i cimacimaan. 9Ano romakat kamo i, aka picoled i safaked#10.9 safaked -- o roma i, safakec, satlec, safatel (Fata'an). namo to tada^kim ato ^kim ato fodawan a payci, 10aka pihawikid to lofoc ato saka tosa a riko' ato cokap ato cokor. Nawhani O papafliflien aca ko matayalay tonini.

11<<Ano micomod kamo to tata'angay a niyaro' ano ^ca i, o mamangay a niyaro' i, li'ayawenho a mitngil to cima ko makahiay a mihamham i tamowanan a tamdaw, ta itira han namo i loma' ningra a maro', tangasa i piliyasan namo toya niyaro'. 12Ano micomod kamo to ccay a loma' i, <Nanay marihaday kamo,> han ko sowal. 13Ano mihamham koya loma' i tamowanan i, itira toya loma' koya nitolonan namo a saparihaday. Ano caay pihamham cangra i tamowanan i, o papatiko i tamowanan koya nitolonan namo a sapakalmed. 14Ano ira ko caay pihamham tamowanan a caay pitngil to sowal namo a loma' ano ^ca o niyaro' i, tihtihen ko alafoh no saripa' namo a miliyas itira. 15So'linen Ako a somowal kamo, i pisawkitan a romi'ad i, o no Sotom ato Komora a nika tfoc ko kahmaway to nika tfoc nora niyaro'.

O Aira a Kari'ang

(Maroko 13.9-13; Luka 21.12-19)

16<<Na'onen! O nipiocor Ako tamowanan i, matiya o nipipacomod to siri i oleolesan. Kamatiya o 'oner kamo a tariktik. Kamatiya o topi kamo a damsay. 17Pina'on, nawhani o rarpeten no tamdaw kamo a patayra i piliclican. O mamasti' nangra kamo i kasa'opoan a loma' nangra. 18Tona mitoor kamo i Takowanan saka, o kakriden no tamdaw kamo a patayra i ka'ayaw no mikowanay ato hongtingti a maliclic. Onini i, o sakanga'ayaw namo a pawacay to Nga'ayay Ratoh i cangraan ato roma a finacadan. 19Ano mapatayra kamo i piliclican i, aka ka rawraw kamo to o maan ko sasowalen, ano^ca samaanen ko sapaca'of. Itiya i, o mamapafaloco' no Kawas kamo to malosasowalen. 20Nawhani o nisowalan namo i, caay ko nano tked namo a sowal, o nano pakayniay i 'Adingo no Wama i kakarayan ko sakasomowal namo.

21<<O salikaka ningra ko mamipatorod to salikaka ningra i mipatayay a tamdaw. O mama ningra ko mamipatorod to wawa ningra i mipatayay a tamdaw. O papacoli ko wawa to mama ato ina ningra a papipatay to tamdaw i cangraan. 22O mamaka'intel no tamdaw a ma^min kamo tona mitoor kamo i Takowanan. Nikawrira, o pakahadidiay a tamdaw tahira i pahrekan i, o mamapa'orip. 23Ano makari'ang no tamdaw kamo i ccay a niyaro' i, pipkaw a milaliw kamo a tayra i roma a niyaro'. Nawhani so'linen Ako a somowal kamo, caho ka ^min namo a mirakat ko niyaroaro' no Israil i, o aira koya Wawa no Tamdaw a tayni.

24<<Caay pikikaka to singsi ko nisawawaan ningra. Caay pikikaka to tawki ningra ko koli a tamdaw. 25Ano pakatodong to dmak no singsi ningra ko nisawawaan i, matatodongayto. Ano pakatodong to dmak no tawki ningra ko koli a tamdaw i, matatodongayto. Ci Pilcipul, ano han ko pitongangan to tawki no loma' i, mangalef ko nipitongangan to paro noya loma'.

Cima ko Katalawan Ita

(Luka 12.2-7)

26<<Orasaka, aka ka talaw kamo to tamdaw. Nawhani o tatalahkal a ma^min ko masimeday a maamaan. O mamahapinang a talahkal a ma^min ko nikilifan a dmak. 27O nidokdokan Ako a somowal i tamowanan i, patalahkalen namo a pasowal. O nihawhawan#10.27 nihawhawan -- o roma i, nilihodan (ka'amis). Ako a somowal i tamowanan i, lkalen haca a pasowal i 'alomanay. 28Ano mipatapatay to tireng no tamdaw ko mipatayay a tamdaw i, caay pakapatay to salo'afang. Saka, aka ka talaw kamo. Kaoya mitkopay i pisemseman to salo'afang ato tireng no tamdaw a Kawas ko kakatalawan namo. 29Talacowa ccay aca a laliping ko 'aca no tosa a 'alic#10.29 'alic -- o roma i, cirep (sifo')., nikawrira, ano caay ko nafaloco'an no i kakarayanay a Wama namo i, caay ka tfad i sra ko ccaccay aca nonini. 30Ano o fokesto no fongoh namo i, ma^minto a masa'osi Ningra. 31Orasaka, aka ka talaw kamo. Ikakaay no nika limla no Kawas to adihayay a 'alic ko nika limla Ningra i tamowanan.

O Patalahkalay ci Kristoan i Ka'ayaw no Tamdaw

(Luka 12.8-9)

32<<O patalahkalay i ka'ayaw no tamdamdaw to nika fana' ningra i Takowanan i, o papatalahkalen Ako i ka'ayaw no i kakarayanay a Wama Ako ko nika fana' Ako i cingraan. 33O mihakenoay i Takowanan i ka'ayaw no tamdamdaw i, o hahaenen Ako a mihakeno cingra i ka'ayaw no Wama Ako i kakarayan.

Caay ko Pararihadayay, o Patatoyay to Fonos ato 'Idoc

(Luka 12.51-53; 14.26-27)

34<<O sakatayni Ako i hkal i, o pararihadayay, aka ka saan ko harateng namo. Caay ko pararihadayay ko nika tayni Ako, o papatatoyay to fonos ato 'idoc ko nika tayni Ako. 35Nawhani o sakatayni Ako i, o papipacoliay to fa'inayan a wawa i mama ningra, o papipacoliay to fafahiyan a wawa i ina ningra, o papipacoliay to fafahiyan a kadafo i ina no fa'inay ningra. 36O mamala'ada no tamdaw ko paro no loma' ningra.

37<<Ano ikaka no nika olah no tamdaw i Takowanan ko nika olah ningra to mama ato ina ningra i, caay ka tatodong a malamitooray i Takowanan. Ano ikaka no nika olah no tamdaw i Takowanan ko nika olah ningra to fa'inayan ato fafahiyan a wawa ningra i, caay ka tatodong cingra a malamitooray i Takowanan. 38Oya caay kakahi a mi'orong to ciwcika no tireng a mitoor i Takowanan i, caayay ka tatodong a malamitooray i Takowanan. 39O limlaay to 'orip no tireng i, o mamafalah ko 'orip ningra. Nikawrira, ano saki Takowanan ko pikinafalah to 'orip no tireng i, o papakalayap to 'orip.

O Sowal to Sapakaolah

(Maroko 9.41)

40<<O mihamhamay i tamowanan a tamdaw i, o mihamhamay i Takowanan. O mihamhamay i Takowanan i, o mihamhamay to miocoray Takowanan a Kawas. 41O niocoran no Kawas cingra, ya sanay a mihamham to niocoran no Kawas i, o mamilayap to lalayapen no niocoran no Kawas a sapakaolah. Mo^celay a tamdaw cingra, ya sanay a mihamham to mo^celay a tamdaw i, o mamilayap to lalayapen no mo^celay a tamdaw a sapakaolah. 42So'linen Ako a somowal kamo, ano cimacima to i, ano o sasafasafaay koya tamdaw, o nisawawaan Ako cingra saka, pananomen ako cingra to ccay a takid a ki^tecay a nanom yasanay a cimacima a tamdaw i, caay ka ^ca o mamapakaolah cingra,>> han ni Yis.

Currently Selected:

Matay 10: AMIS2019

Highlight

Copy