Matay 9

O Piadah ni Yis to Ma'piay a Adadaay

(Maroko 2.1-12; Luka 5.17-26)

1Midakaw ci Yis to tamina a milacal to fanaw a minokay i niyaro' Ningra#9.1 niyaro' Ningra -- Kapirnaum (tiri'en i Matay 4.13).. 2Ira ko mililiday a tamdaw to ccay a ma'piay i kafoti'an a patayra i ka'ayaw ni Yis. Mahapinang ni Yis ko paso'lin no faloco' nangra saka, sowal sa toya ma'piay a tamdaw, <<Wawaaw, sanga'ayen ko faloco' iso. Mahpolayto ko raraw iso,>> han Ningra.

3Ira ko papinapina a pasifana'ay to Rikec. <<O milokesay ko sowal nonini a tamdaw!>> saan ko faloco' nangra.

4Mafana' ci Yis to niharatengan nangra saka, sowal sa, <<Nawiro matini ko nika tatiih no harateng namo saw? 5I cowaay ko rahodayay a sowal to nika <Mahpolto ko raraw iso,> sanay atoya <Kalomowad a romakat,> sanay a pasowal tonini a tamdaw saw? 6O papahapinangen Ako kamo to nika o cisakowanay ko Wawa no Tamdaw i tini i hkal a mihpol to raraw,>> han ni Yis. Ta pasowal sa toya ma'piay a tamdaw, <<Kalomowad, alaento ko kafoti'an iso a minokay i loma'!>> han Ningra.

7Saka, lowad sato koya ma'piay a minokay i loma' ningra. 8Safahka' sa a matalaw ko finawlan a minengneng tonini a dmak. Ta hmek sato cangra to Kawas to nipipafli Ningra to hatiniay a 'icel i tamdaw.

O Pitahidang ni Yis ci Matayan

(Maroko 2.13-17; Luka 5.27-32)

9Miliyas ci Yis itira, ta tala 'a'ayawho a romakat, ma'araw Ningra ko nika maro' ni Matay hananay a milisataay a tamdaw i pilisataan. <<Katayni a mitoor i Takowanan,>> han ni Yis cingra a somowal.

Saka, lowad sato ci Matay a mitoor i ci Yisan.

10Yo mitahka ci Yis i loma' ni Matay i, ira a miraod ko 'alomanay a milisataay ato tatiihay a tamdaw a mikapot i ci Yisan ato nisawawaan Ningra a komaen. 11Ira ko papinapina a Farisay a tamdaw to paka'araway, pasowal sa i nisawawaan ni Yis, <<Nawiro mikapot ko singsi namo to milisataay ato tatiihay a tamdaw a komaen saw?>> han nangra.

12Matngil ni Yis konini i, sowal sa, <<O tanoktokay a tamdaw i, caay ko papaisingen. Deng o adadaay ko papaisingen. 13<Oya maolah Kako to adayay no tamdaw. Caay ka olah Kako to pipato'aya no tamdaw,> sanay a sowal a matilid i Fangcalay Cudad i, o maan ko tatodong nonini saw? Olili, pinanamho kamo. O patosokan Ako a tayni i, caay ko mitahidangay to mo^celay a tamdaw, o mitahidangay Kako to ciraraway a tamdaw,>> han ni Yis.

O Pakayniay i Pisaliway a Licay

(Maroko 2.18-22; Luka 5.33-39)

14Itiya i, ira a tayra i ci Yisan a milicay ko nisawawaan no Paino'ay a Yohani, <<Kami ato Farisay a tamdaw marariday a misaliway, nawiro caay pisaliway ko nisawawaan Iso saw?>> han nangra.

15Paca'of sa ci Yis, <<Yo iraho i pitahkaan ko papararamoden a fa'inay i, mararom ko widang ningra saw? Caay. Nikawrira, ano maraodto ko romi'ad to pialaan toya papararamoden a fa'inayan i, itiyato cangra a misaliway.

16<<O romasato, awaay ko mitapiday i matlangay a riko' to fa^lohay a kiradom. Nawhani ano haenen i, macicih no fa^lohay a satapid ko matlangay a riko'. Satata'ang sato ko nika cicih noya riko'. 17O romasato, awaay ko miparoay i matlangay a falako#9.17 falako -- o roma i, takodas, 'pi (katimol). a lofoc to fa^lohay a ^pah. Nawhani ano haenen i, maftas koya falako a lofoc, ta mataktak koya ^pah. Awaayto ko ^poc toya falako a lofoc. O fa^lohay a ^pah i, o fa^lohay a falako a lofoc ko piparoan, ta mahatosato a nga'ay konini,>> han ni Yis.

O Fafahiyan a Wawa no Citodongay to Kasa'opoan ato Maleslesay ko Rmes a Fafahiyan

(Maroko 5.21-43; Luka 8.40-56)

18Yo somowalho ci Yis tonini a sowal i nisawawaan ni Yohani i, ira a tayra a mingitangit ko ccay a citodongay to kasa'opoan a loma' no Yutaya a kakridan. Pitosor sa a mita'ong i Cingraan, sowal sa, <<Mapatay i honi ko fafahiyan a wawa ako. Nanay tayniho Kiso a mikapa i cingraan, ta miliyaw a ma'orip cingra,>> han ningra.

19Lowad sato ci Yis a mitoor i cingraan. Halonisawawaan ni Yis a mihaklong.

20Ira ko ccay a malacaanay a fafahiyan to maleslesay ko rmes to tosa ko safaw no mihcaan. Tayra i aikor ni Yis cingra a mitfing to parongapingan no kafafang Ningra. 21Nawhani <<Ano matfingto ako ko kafafang ni Yis i, o mamaadah kako,>> saan ko harateng ningra.

22Pasiikor saan ci Yis a minengneng i cingraan. Sowal sa, <<Wawaaw! Sanga'ayen ko faloco' iso. Nano paso'lin iso to Kawas ko sakaadah iso,>> han Ningra. Itiya a maadahto koya fafahiyan.

23Yo tahirato ci Yis i loma' noya citodongay to kasa'opoan i, ma'araw Ningra ko mitipoloay a mitademay ato mararawraway a finawlan. 24Sowal sa i cangraan, <<Kasadak kamo a ma^min. Caay ko mapatayay konini a fafahiyan a wawa. O mafoti'ay cingra,>> han Ningra. Katawaen nangra ci Yis. 25Namapasadakto koya finawlan i papotal i, comod sato ci Yis i kafoti'an noya wawa. Tengteng han ni Yis ko kamay ningra i, lowad sato cingra. 26Matnak konini a dmak toya pala a ma^min.

O Piadah to Tatosaay a Mapohaway

27Yo miliyas ci Yis itira a romakat i lalan i, ira ko tatosaay a mapohaway a mitoor i Cingraan. Cli' sa cangra a somowal, <<O Wawa ni Tafiti, kasini'adaen kami haw!>> saan cangra.

28Yo micomod ci Yis i loma' i, miraod i Cingraan koya tatosaay a mapohaway. Pasowal han ni Yis cangra, <<Ma^deng a miadah Cingra, saan kamo a paso'lin i Takowanan saw?>> han Ningra.

Pasowal sa cangra, <<Hai, Tapangaw, paso'lin kami,>> han nangra.

29Saka, kapa han ni Yis ko mata nangra a somowal, <<Matiya o nipipaso'lin namo ko nika lahci nonini a dmak i tamowanan,>> han Ningra. 30Saka, paka'arawto ko mata nangra. Songila'en ni Yis cangra a palimo'ot. <<Aka ka pakafana'en ko cimacima tonini a dmak,>> han Ningra.

31Nikawrira, masadak cangra i, payakayaken nangra ko nano dmak ni Yis itira toya pala a ma^min.

O Piadah to Maapaay

32Yo masadak cangra i, ira ko patayraay i ci Yisan to ccay a maaro'ay no palafoay a maapaay a tamdaw. 33Mafahfah ko palafoay nai cingraan i, caciyawto koya tamdaw. Safahka' sa ko finawlan. Sowal sa, <<I tini i Israil, awaayho a ma'araw ita ko hatiniay a dmak,>> saan cangra.

34Nikawrira, sowal sa ko Farisay a tamdaw, <<O nano 'icel no palafoay ko sapifahfah Ningra a pasadak to palafoay,>> saan cangra.

O Adayay ni Yis to Finawlan

35Nanoya, rakaten ni Yis ko tata'angay ato mamangay a niyaro' a ma^min, pasifana' i kasa'opo'opoan a loma' a patnak to Nga'ayay Ratoh to pakayniay i Kitakit no Kawas. Ta adahen Ningra ko masamaamaanay a adada no tamdaw. 36Nengneng sa ci Yis to kasakapokapot no tamdaw i, saadayay sa ko faloco', nawhani awaay ko palawinaan nangra, matiya o malafelay a siri a awaay ko midipotay. 37Itiya i, sowal sa Cingra to nisawawaan, <<Adihay ko papanayen, nikawrira, caay ka 'aloman ko mipanayay. 38Orasaka, pingitangit kamo to Tapang no ciomahay a papiocor to matayalay a miritrit to panay Ningra,>> han Ningra.

Currently Selected:

Matay 9: AMIS2019

Highlight

Copy