Matay 11

O Piocor ni Yohani o Paino'ay to Nisawawaan Ningra i ci Yisan

(Luka 7.18-35)

1Mahrek ci Yis a palimo'ot to tosaay ko safaw a nisawawaan ningra i, miliyas ci Yis itira a tayra i niyaroaro' a pasifana' a patnak.

2Yo i pirofoan ci Yohani o Paino'ay i, matngil ningra ko pakayniay i nitayalan ni Kristo saka, ocoren ningra ko nisawawaan ningra a patayra i ci Yisan. 3Licay sa i Cingraan, <<Kiso koya nisowalan ni Yohani to tatayni a tamdaw haw? Ano ^ca i, o mamitalaho kami to roma a tamdaw haw?>> han nangra.

4Paca'of sa ci Yis, <<Olili, pakafana'en ci Yohani to nitngilan ato ma'araway namo a dmak. 5Paka'arawto ko mapohaway, romakatto ko mapi'iway, makoracto ko malono'ay, pakatngilto ko mado'engay, mapalowadto a mapa'orip ko mapatayay, mapatngilto ko pakoyoc a tamdaw to Nga'ayay Ratoh. 6O caay ka hinapec i Takowanan a tamdaw i, o malmeday han a pasowal,>> han ni Yis.

7Yo miliyasto ko nisawawaan ni Yohani i, pasowal sato ci Yis i finawlan to pakayniay ci Yohanian. Sowal sa, <<Yo tayra kamo i kohkohan a mikilim ci Yohanian i tiyaho i, o maan ko nanengnengen namo saw? O minengnengay kamo to mangiyangiay no fali a 'ardo haw? 8O maan ko nanengnengen namo a masadak saw? O minengnengay kamo to ma^resay ko ca'dong a tamdaw haw? Oya ci ca'dongay to hatiniay a riko' a tamdaw i, ira i loma' no hongti. 9Ano caay ka hatira i, o maan ko sakatayra namo saw? O sapinengnengaw namo to pali'ayaway to sowal no Kawas haw? Hai. Nikawrira, pasowalen Ako kamo, ikakaay no kalopali'ayaway to sowal no Kawas cingra. 10Ci Yohani ko nisowalan no matiliday i Fangcalay Cudad toya, O sowal no Kawas i, <Nengnengen, o a ocoren Ako ko tarokos Ako i 'ayaw Iso to mamipalalan to saki Tisowanan,> sanay. 11So'linen Ako a somowal kamo, i tini i polong no i hkalay a tamdaw i, awaayho ko ikakaay ni Yohani a tamdaw. Nikawrira, o sasafaay a tamdaw i Kitakit no Kawas i, ikakaho ni Yohani. 12Nanitiya ci Yohanian o Paino'ay a tahanini i, mararid a malood no ca^desay ko Kitakit no Kawas,#11.12 mararid a malood no ca^desay ko Kitakit no Kawas -- ano ^ca i, marariday a misa'icel a tala'a'ayaw koya Kitakit no Kawas. 'aloman ko sapi'afasananay a tamdaw to nikowanan no Kawas a kitakit a palanotireng. 13Tangasa i nika iraan ni Yohani, polong no pali'ayaway to sowal no Kawas a cudad ato Rikec ni Mosi pasowal to pakayniay i pikowan no Kawas. 14Ano mangalay kamo a paso'lin to nisowalan nangra a mafana' i, ci Yohani ko nisowalan nangra to pakayniay ci Iliyaan. 15Pitngil kamo, o pakatngilay ko tangila a tamdaw.

16<<O maan ko sapatinako Ako to aniniay a tamdaw hakiya? Matiya o maro'ay a wawa i pisalamaan, tahidangen nangra ko romaroma a wawa a micli', 17<Mitipolo kami to sakalipahak i, caay ka sakro kamo! Romadiw kami to sakararom i, caay ka tomangic kamo!> saan. 18Nawhani yo irato ci Yohani i, caay ka komaen, caay pita'owak cingra. Sowal sa ko tamdamdaw, <O maaro'ay no palafoay cingra!> saan. 19Nikawrira, yo taynito ko Wawa no Tamdaw i, komaen, mita'owak. Sowal sa ko tamdamdaw, <Nengnengen, o hali^pahay, o widang no milisataay ato romaroma a ciraraway a tamdaw Cingra,> saan cangra. Nikawrira, mahapinang i dmak no Kawas ko nika citaneng Ningra,>> han ni Yis.

O Caay Paso'lin to Kawas a Niyaro'

(Luka 10.13-15)

20Itiyasato, kakteren ni Yis ko nano paka'araway to adihayay a kafahka'an a pidmakan Ningra a niyaroaro', nawhani caay pasasiyor to faloco' ko i tiraay a tamdaw. 21Sowal sa ci Yis, <<O cacilafo kamo o Koracin. O cacilafo kamo o Pitsayta. Nawhani ano i tiraay Kako i Tiri ato Siton a midmak toya nidmakan Ako i tamowanan a kafahka'an a dmak i, kona i ti:ya aca cangra a ciriko' to pawti a mica'fon to 'afo i tireng a pahapinang to nika sasiyor no faloco' nangra a pasayni i Kawas. 22So'linen Ako a somowal kamo, i pisawkitan a romi'ad i, o no Tiri ato Siton a nika tfoc ko kahmaway to no namo a nika tfoc. 23Kiso o Kapirnaum, o mamapacakat kiso a tayra i kakarayan saan kiso saw? O mamatfad kiso i pisemseman! Nawhani ano i tiraay i Sotom Kako a midmak to nidmakan Ako i tamowanan a kafahka'an a dmak i, kona tahanini a ira ko niyaro' no Sotom. 24Miliyaw Kako a pasowal i tamowanan, i pisawkitan a romi'ad i, o no Sotom a nika tfoc ko kahmaway to no namo a nika tfoc,>> han ni Yis.

Katayni i Takowanan a Pahanhan

(Luka 10.21-22)

25Itiya i, sowal sa ci Yis, <<Wamaaw, o Tapang no kakarayan ato hkal Kiso. Miahowid Kako i Tisowanan. Nawhani o nikilifan Iso a dmak i citanengay ato mafana'ay a tamdaw i, patalahkalen Iso i mafokilay a tamdaw. 26Hai, Wama. O nafaloco'an Iso ko nika matini no dmak,>> saan Cingra a mitolon.

27Sowal sato Cingra, <<Mapatorodayto no Wama Ako i Takowanan ko polong no dmak. Awaay ko mafana'ay a tamdaw to o cima ko Wawa, Deng o Wama a ccay ko mafana'ay. Awaay ko mafana'ay a tamdaw to o cima ko Wama, Deng Kako o Wawa ato nipili'an Ako a tamdaw ko mafana'ay.

28<<Kamo o marorayay ato kartengay ko 'inorong a tamdamdaw i, katayni i Takowanan a ma^min ta pahanhanen Ako kamo. 29O damsayay Kako. O po^neray ko faloco' Ako saka, ca'dongen ko talo'odan Ako a minanam i Takowanan. Ta mapahanhan ko faloco' namo. 30Nawhani o nga'ayay a ca'dongen ko talo'odan Ako. O kahmaway ko sapa'orong Ako i tamowanan a 'inorong,>> han ni Yis.

Currently Selected:

Matay 11: AMIS2019

Highlight

Copy